AMOS 3 - ALLAH WENE FANO WENE

¹ Hit henunggul unuk Israel on Tuhan en o Mesir en og-heneplug wilibik wahasi on de Tuhan uruk ale su holiek! Tuhan en uruk kwit de,

² “O kwenangma oma ap homi enunggul unuk angge wereg on en de hit neg de henunggul unuk dem misik-misig An noluk deg lit fubi henobaharuk kahi on. Ai fam de henesiag hum-ham deg ma re demdoho An den unggum og-hesahuk,” isi ebag.

Nabi eyabuk anyo

³ Ap biren enele misig seberoho maruk fug angge en inim seberoho la alereg a?

⁴ No singa enggelama on en aren nauk angge hweag-da fug angge en ngin duk alereg a? Singa omalik kiling elma wereg lit nauk on eke hweag-da fug angge en kouwaruk alereg a?

⁵ Sabu yepdeg eleg kweleg suwe sabu elma luhut aik kuk alereg a? Eke luhut am fug kweleg sabu ele ketnog uk alereg a?

⁶ Weim yabukoho trompet ele fururuk kweleg ap homi o kota wereg on enowag elek duk fug angge welam alereg a? Tuhan en anggin-fanggin mondorik wam fug kweleg o kota enobam aik wam alereg a?

⁷ Tuhan Mun Leho wereg on en de Aren duhuk ulug ebereg ale re it amingming angge nabi omano fam ename fouk fug angge re dem misig ulug oho duk fug alereg.

⁸ No singa ele ngin durukmu re sa hag angge akol elegdoho welam alereg? Ne, Tuhan Mun Leho wereg on en ele uruk halug de, Aren iyug ulug uruk ale anyo unduhuk fouk eleg anggere ap san bik-bok atlug welam alereg?

Samaria lobag aruhu ebag on

⁹ Wene sure ap homi o Mesir bumbuk mel, Asdod bumbuk mel fam wereg on etma fam unduhuk feik lag. Hweag-esauk kwit de, “O Samaria horog kwe en dom-dom fene etma kabog-dulug de naleg-haleg deheg, enenggik omamne fam sebel enusug laheg hum ale duruk on etma furebeseiyug” ulug ebag.

¹⁰ Tuhan en uruk kwit, “Ap homi etman de o bumbuk etmano ap homi enangge enolok fam del heheg hwealuk on en hopo dik deberuk. Ai en iren de bekitdoho duruk alere mun enapeleg.

¹¹ Ai fam de it enobam indipmu etma re ap selei on en laborik watlug it enalong balegma etmano luluhun eseheg, it enobam bumbuk etmano del deheg, duhup.

¹² Ap gembala misig en owam domba singa en senggeldukmu esanggo beneleg nim eyog biren wutdoho sareg angge nim hweaharuk hag, ap homi Samaria on ketia enendama enahayegdoho enangge nohoruk angge mun ebe on fam yinggig wereg on etma re we dorangge neg welamuhup,” ulug ebag.

¹³ Tuhan Mun Along wereg lit Mun Leho wereg on anyo en uruk kwit, “Ketia furebelug de it Yakub ambiangma on etman wenggelukwag ulug eneluge feiyug.

¹⁴ Nukoho An den ap homi Israel on enesiag fahet unggum og-esahuk salim aire, mezbah o Betel wereg on etma mun siahap esahuk. Mezbah etma ebe domog ambiang sombo isil lahukmu re kwenangma loba uhu.

¹⁵ Enobam wirig o muru duruk li kel wat-daukmu fahet mel ne ahanhan duruk li kel wat-daukmu fahet mel wirig on etma An den mun luluhun esahuk. O andimuk on fam bi-boroho wirig on de dalo esahuk; ne o humon wirig on etma abiranggere mun welelenggen duhu.