AMOS 2 - ALLAH WENE FANO WENE

Moab enap fahet ebag on

¹ Tuhan en uruk kwit de, “Ap homi Moab on de hundig-handig siag neg duruk en de, demdoho An den unggum og-esahuk. Iren de raja Edom on waratsi on anyo wareg salegma leheswareg owag wausareg indokma yalswa ma ul atsi.

² Ai fam de An den o Moab fam etma indok mondorik waheg, Keriot hembirangge wirig on etma abirangge han yaleheg, duhuk. Ap homi Moab on de weim fam en enele saha-faha uruk kweleg, trompet ele furoho weim yabukoho amitmit durukmu sahalimu etman waramuhup.

³ O Moab fam etma it enalong wereg on mel ne at apma pemerintah enobahet yabuk duruk on de An den binggi enowaruhuk,” ulug ebag.

Yehuda enap fahet ebag on

⁴ Tuhan en uruk kwit de, “It ap homi Yehuda on de hundig-handig siag neg duruk en de, demdoho An den unggum og-esahuk. Ite An den nele diroho diyug airoho diyug ulug hweag-esauk kahi on dahan debeheg, An den hweag-esauk kahi ale anyo furebouk eleg angge deheg, duruk. Ite it enombasi en kembu ilah amu on apne wauk katswa on nale feseruk.

⁵ Ai fam An den o Yehuda fam indok mondorik waheg, ne Yerusalem fam fak lehet hembirangge wirig on abirangge han yaleheg, duhuk,” ulug ebag.

Allah en Israel on unggum og-esahuk ebag on

⁶ Tuhan en uruk kwit, “Ap homi Israel on de hundig-handig siag neg duruk en de demdoho An den unggum og-esahuk. Ap bekitdoho duruk on en ori enengge elamna ulug wasi on nikangge obalma foruk eleg on etmano re iren enamingming angge amag ulug onggo hun enepswa. Ai hagdoho re iren ap homi enenggik eleg on en baleg angge fahet onggo obalma fouk fug alereg on etmano oho, iren baleg angge aire eneyog ahut het duruk angge wutdoho we misig fahet onggo fouk ale hag on famen de airoho neg debeseruk.

⁷ Iren de ap homi enomamne eleg on enamu da fug alereg on etmano sebel eseheg, ap homi enenggik eleg on filig eseheg duruk. Akni et amloho et de hwele mingmingon wereg on anyo inim seberuruk fam An nunuk mun eneg on anyo emere foruk.

⁸ Wene kabog-duruk kwe etmano re iren sum enebe sum baleg angge fahet enenda lisig ulug ap enenggik eleg on fam en wauk on etmano wandoho nohoruk. It enakni Allah Obam etmano en de, ap homi it enobam baleg wereg on etmano enangge anggur etmano hwelalug nauk.

⁹ Airoho duruk kahep fahet de, yaho nomaliki, ap homi Amori on enebe e sin hagdoho yatdeg enap ne e batie hagdoho omamnereg enap anyo hit henobahetdoho An den elehap debeserihik.

¹⁰ Hit de o Mesir en An den og-heneplug wilibik lauihikdeg, iliangge lei kwe og-heneplug lauk men neg tahun 40 en duruhup. Ne, it Amori on enanggwenang de hit henonggwareg henangge on amag ulug An den og-hesauihik.

¹¹ Hit henomaliki on en enebe wenako nabi amag ulug momal-enebeheg, ne it sauwe on fomane re enebe ap nazir on welamag ulug momal-enepihik. Yaho hit Israel henap, etma re demdoho fug behep? An Tuhan en uruk kahi.

¹² Airoho deg famen de hiren de ap nazir on fam anggur nowag ulug og-eseheg, duruk fam iren enele sali uruk on anyo dahan deberuk. Ne, hiren de An den it nabi wene hweag-esowag ulug uruk kahi on etmano uk fug ulug ili uruk kahep.

¹³ Ma re ketiare An den hit al damdam hesahukmu re kereta gandum anggen kwelaplug lauk on hoporeg ma duruk hagdoho amuhup.

¹⁴ Ap folo-folo buroho lauk on ohore lil atlug lahu fug, ne ap enomamne hum deg on ohore enomamne eleg aruhu, ne ap neben-heben deg on de onggwareg en ahap wendat dahu fug.

¹⁵ Ap sehen anggen on hambuk ha fug ale aruhu, ne buroho lauk on la fug ale aruhu, ne it kuda anduhunmu lauk on de lil aruhu fug.

¹⁶ Nukoho ai salim ap tentara enambong mun sisereg enap famen ohore enaseheg lin-esalug heiye lahup. An Tuhan nele ihi,” ulug hweag-esebag.