Lúʼkáasʉ 14 - Kaa Shwî

Yěso ghʉ cǒ ngou shwítə leʼé nji Pəyúda

¹ Ə́ pə̂ có leʼé nji pəyúda, Yěso wô nzeʼ cǒ tə́-ndə̂ pəfalísia lə̂ nzʉ́ zə̂u. Pye pi gháp lə pə́ wó tâghʼ nyôghʼ lə́ zʉ́ lə̂ njwó ghíʼ a wo ghʉ̌.

² Cǒ ŋuu tə̂ʉ mbi zʉ́, mə́i a lə fəptə.

³ Yěso túŋú pəfalísia gháp pə pəkeʼtə́-lə́pə́ʉ Mə̌usə̂i ngô: «Ləpə̌ʉ zághʼə ghíʼi mbə́i ńgó mboʼ pə́ ghʉ ŋuu shwítə leʼé nji kəʉ ə́ ngə́?»

⁴ Gháp nâʼ ńgó ntə́uʼ. Yěso zápə pô yé lə́ ngou wêi, a shwítə, a ghʉ a lə̂r yé.

⁵ A pôu ndáʼ lə́ páp ngô: «Wǒ wə́ təcər pei yi môu ye kəʉ foŋ ye lə̌i mpfúŋ cər ghəm nci leʼé nji, a tî tə́ fátə́ fû cər wó kwarə́ yé?»

⁶ Ə́ ghâʼ gháp lə̂ mbwôr.

Sê pə̂i pə́ no ŋuu yi a shuʼú mbəʉ ye

⁷ Yěso jwô pəghəʉ kə̂u ndə̂ nkaŋ pə̂ məlwoŋ mi mbi, a lâghʼ saghʼ-ləghaa ńdáʼ lə́ páp ngô:

⁸ «Ŋuu lə̌i ngə́u ghô no lətsei lâa-ndə̂, o kə́u yʉʼ wó, o páa lə̂ nkâŋ pə̂ lwoŋ yi mbi. Ə́ mbə̂ có pə́ lə ghí ghə̂u ghô gháʼá, ə́ nkə́ ngə̂u cǒ ŋuu yi a lěi ghô.

⁹ Mpfu pôu nkûʼ, ŋuu yi a kə ghə́u wéi zʉ́ tó ndâʼ lə́ ghô ngô: Lěsê nyér yʉʼ lə́ ntikáŋ wo. O cʉ̂ʼ ndésê, ə́ ndǎghʼ sə̂ʉ ńdə̌r lə̂ nzəm.

¹⁰ Pə́ lə̌i ngə́u ghô no lətsei, o tó ńkə́u yʉʼ wó, o wo nyáŋ pə́ nzəm, ńjí ńgó mpfu pou nkǔʼ, ŋuu yi a kə ghə́u ghô tô ńdâʼ lə́ ghô ngô: Sə̌u ghâa! Lěsê ńtó ńnyáŋ lə̂ yʉʼ yi shʉʼʉ. Ə́ pə̂ yə́rə́, ə́ ndaghʼ ḿbə́ məkuʼ mbó gho mbi pye pi pei pəpǎp wo nǎa nyáŋ zʉ́ zə̂u.

¹¹ Ə́ pəi mbə́ ńgó, wǒwó yi a ŋáʼtə́ mbəʉ yé, pə́ ghʉ̌ shúʼú yé ńŋə́ sê; ŋuu yi a pǒu shúʼú mbəʉ yé ńŋə́ sê, pə́ ghʉ̌ ŋáʼá yé ńŋə́ tʉ́.»

Ə́ poŋ ńgó pə ghə́u pəpûŋ záp lə́wó no lətsei

¹² Yěso pôu ndáʼ lə́ ŋuu yi a lə ghə́u yé no lətsei zêi ngô: «O lə̌i nyáŋ tə mə́ ngwô nzághʼə pye, koo o ghə̂u ghô pəsə̌u pô, koo o ghə̂u ghô pəfə̌r pô, koo o ghə̂u ghô cǒ ŋuu lə̂ ngər zei, tə mbaa pəghaŋə ləpar nzeʼ pô pi gháp pə́ pəghaŋə zə̂u, ńté no mboʼ gháp tâa ngə́u ghô zô lə́wó, ə́ ndaghʼ ńcwə́ghʼ shʉ̂ʼ ghô.

¹³ O lə̌i mə́ ngwô nzághʼə pye, o ghə̂u pəpûŋ, ə́ ngə́u pənkhwô, pəkə́tyaŋə́-ku gháp pə fwoghʼ-mə́nyôghʼ.

¹⁴ Ə̂ lêitə́ yə́rə́, o táa ngwô mbwórə, ńté ńgó káa gháp ghwô gháp có zə̂u yi mboʼ gháp laghʼ ńcwə́ghʼ shʉ̂ʼ ghô. Sê lə̂ táa cwə́ghʼ shʉ̂ʼ ghô mpfu yi pəghʉ̌-shʉʼʉ ntáa zʉ́ʉ lə̂ ləwʉ̂.»

Saghʼ-ləghaa pəghəʉ

¹⁵ Cǒ ŋuu yi pə́ lə ghə́u yé yé no lətsei lə́wó, zûʼ mətsâr mêi, ə́ ndǎʼ lə́ Yěso ngô: «Ndʉʉ-mboŋ ŋuu yi a táa zʉ́ mé məzʉ̂ cər Ləfou Sê!»

¹⁶ Yěso pyêtə wo saghʼ-ləghaa ńdâʼ yé ngô: «Cǒ ŋuu lǎʼ nyáŋ tə ntʉ́ŋ leʼé lətsei, ə́ ngə́u pye tə nzáa.

¹⁷ Mpfu nzʉ̂ zə̂u ghʉ̂ nkûʼ, a tə̂u ngaŋə-faʼ ye ńgó a wó fúŋ gháp ńgó mboʼ gháp tô mpfu wo, ńté no zə̂u tsəm pəu mə́.

¹⁸ Lə́ gháp pə́tsəm laghʼ zúŋ, ə́ nkə̂ ndə̂ʼ gháp pə̂ moʼ moʼ, nduŋ-mbi lâʼ lə́ ngaŋə-faʼ wêi ngô: N nkə zə̂u nkâʼ ghâa có, ə́ pə́ ntúŋú ńgó n ngwó ńjwó, tə́sə́u lǎʼ lə́ zʉ́ ńgó n ngwo tô ghâa po.

¹⁹ Cǒ lâʼ ngô: N nkə zə̂u məfoŋ ləghə̂m lə̂ ndághʼ ńfǎʼ, m mə̌ ndou lə̂ ngwó nzʉ́ʼ gháp njwó, wo sʉ́ʉtə́ ye ńgó koo a fə̂r yé ghâa.

²⁰ Cǒ tâʼ cʉ̂ʼ ndâʼ yé ngô: M mbyěr pfû ngwě ghâa pfǔ, ə̂ zə̂u yi ə́ ghʉ̌, mboʼ m mbə̂ ghâa yʉʼ wó po.

²¹ Ngaŋə-faʼ wêi pə̂ʉ nzəm, ə́ mbyétə́ məno mêi mə́tsəm ńdáʼ tə́-faʼ ye. A zûʼ, ə́ záŋə yé, a lâʼ lə́ zʉ́ ngô: kə́ ncʉ́ʼ ndêi-lěi ńgwó ndəu məzǎa gháp pə məlaŋə́-ndə̂u túsoŋ ə́ ndǒu pəpûŋ lə́ pənkhwô, ə́ nkʉʼʉ́ pəfwoghʼ gháp pə pəkə́niʼí-ku, ə́ ndághʼ gháp ńtó.

²² Ngaŋə-faʼ lə̂r mbǒu nkwó ńtó ńdáʼ tə́-faʼ ye ngô: Ə́ Nde, zə̂u yi o yǎa ndǎʼ, n ngʉ mə́ zěi, lə́ lənyǎŋ kə́ mbou mbyér yé pə́ wó.

²³ Tə́-faʼ cʉ̂ʼ lə́ ndǎʼ lə́ ngaŋə-faʼ ye ngô: Wǒ lə́ pəshwáŋə-láŋə́-ndə̂u mpfu wo, tə mbaa mənkaŋ nkâʼ lə́wó, ə́ njwó pə́ warə́-warə́ ŋuu, o ŋə̂ʼtə yé ńdaghʼ yé ńtó ńcághʼə́ yé ndə̂, ə́ njí ńgó pə́ kə́u tə́ ndóghʼó ndə̂ zâa.

²⁴ Məŋ ndaʼ wéi, mboʼ cǒ ŋuu lə́ pye pi n ndə ghə́u gháp tâa nzʉ̂ʼ yé məzʉ̂ mâa po.»

Ə́ poŋ ńgó ngaŋə-ku Yěso mêʼ zə̂u tsəm, ə́ ntsə́ʉ nzəm zʉ́

²⁵ Nou lâʼ lə tsə́ʉ nzə̂m Yěso gháp pə pǎp pə̂ ŋə̂i, a shə́rə ńdáʼ lə́ ŋuu tsəm ngô:

²⁶ «Ŋuu lə̌i ntsə́ʉ nzəm məŋ, ə́ ndə́iʼ kǒŋ ghâa lěi tə́ ye, ə́ lěi mə́ ye, ə́ lěi ngwě ye, ə́ lěi ghəpə́ yé, ə́ lěi pəfə̌r pé pi mbiŋə gháp pi pəngyě, tə mbaa tû-mbəʉ yé po, mə́i káa a kûʼ yé lə̂ ḿbə́ ngaŋə-jyêʼ-no ghâa.

²⁷ Ŋuu lə̌i ndə́iʼ khwor yé tʉ̌-mbʉ̂ŋtə lə̂ ndághʼ ńtsə́ʉ nzəm məŋ po, mə́i mboʼ a pə̂ yé ngaŋə-jyêʼ-no ghâa po.

²⁸ Tə mboʼ cǒ ŋuu lə́ pei pə̂ ngwô nkə̂r ndə̂, lə́u ntsə̌mbi nyáŋə́ sê, ə́ kwaŋə́ tû yé tə njwó ńgó a ghwo nkâp yi mboʼ a lâghʼ ńkə́r tə myâghʼ po?

²⁹ Ə́ kə́ ndə́iʼ yə́rə́ po, mə́i a lə̌i cóghʼ ndə̂ sê, ə́ ndə́iʼ kuʼ yé lə̂ nkə́r tə myâghʼ po; mə́i pye táa nyáŋ lěi jwó, ə́ jwi yé

³⁰ ə́ laʼ ngô: Wo ŋuu lə jî lə̂ nkə́r ndə̂ lə́ káa pǒu kuʼ yé lə̂ myaghʼə́.

³¹ Kəʉ mboʼ tâʼ fou tə̂u pə́ ngwô nkəm cǒ lə̂ ntso, ə́ ngwǒ pəlwóʼó-ntso pé tóusʉ ləghə̂m a títə́ ntsə̌mbi nyáŋə́ sê nkwáŋə́ tû yé ńgó tə mboʼ pé pêi tóusʉ ləghə̂m kə̂u nkúʼ lə̂ ndághʼ ńdwóʼó ŋuu yi a ghwǒ pé tóusʉ mə̂m mbwô?

³² Ə́ njwó ńgó káa a kûʼ yé mə́u ngwó, mə́i wêi fou wo pyér pə́ ndǐ təsə, â tə́u pye lə́ zʉ́ ńgó a láʼ yé mbə̂u yi mboʼ gháp zʉ́ laghʼ ńtsúŋtə́ ńnyáŋ lə̂ mbwórə.»

³³ Yěso pôu nkə́ ncí ndâʼ ngô: «Ə́ laghʼ ḿbə́ ńgó mboʼ ŋuu lə́ pei lə́iʼ měʼ zə̂u pé tsəm po, a kuʼ yé lə̂ mbə́ ngaŋə-jyêʼ-no ghâa po.»

Koo ngaŋə-ku Yěso cʉ̂ʼ ləpə ngwâŋ

³⁴ Ə ngwâŋ zə̂u shʉʼʉ, lə́ ə́ mbə́ yi ə́ lə̌i ncʉ́ʼ ndə́pə ləpə́, mə́i mboʼ pə́ pou ngʉ̂ gháʼá mə́u tə ə́ kə̂ ncí ndə̂ʉ?

³⁵ Mboʼ pə́ kə̂ ndâghʼ yé mêi ngwâŋ ə́ ngʉ̌ ndesé po, ə́ nkə́ ndâghʼ ḿbwórə yé ndesé po, pə́ kə́ cʉ́ʼ mêʼ meʼé. Ŋuu yi a ghwǒ mətuŋú lə̂ ńdághʼ ńzúʼ no, â zúʼ.