Jâŋ 1 - Kaa Shwî

Ə tsâr ə̂ nkeʼ, ə́ mbə́ ləcwôr

¹ Nzʉ̂ lə ghí jǐ, ə tsâr pə̂ wó. Tsâr gháp Sê lə nǎa mbə́, ə tsâr lə pə́ Sê.

² Tsâr zêi gháp Sê lə pə́ tə fú ləjitə́.

³ Sê lə lei lə́ zʉ́, ə́ ntsuŋú zə̂u tsəm, kâa có zə̂u pə̂ yé wó yi Sê lə tsuŋú tə́ zʉ́.

⁴ Ləcwôr lə pə́ lə́ zʉ́, ə́ mbə́ ləcwôr yi a keʼ pye-mə́soŋ.

⁵ Nkeʼ pə̌ nkêʼ nzə̌m, lə́ kâa nzə̌m pə́ fwôtə yé.

⁶ Ə Sê ghʉ̂ ntə̂u cǒ ŋuu ləjôghʼ yé pə̂ Jâŋ.

⁷ A tô, ə́ mbə́ nzǔʼ-njwó lə̂ ndâʼ pye no yi a jǐ lə̂ nkeʼ zêi, lə́ pə́ yi wǒwó wo lei lə́ zʉ́, ə́ pə́i no nkeʼ zêi.

⁸ Káa a lə pə̂ yé nkeʼ, a lə tô yé pə́ lə̂ ndâʼ pye no ńté nkeʼ.

⁹ Ə́ pə̂ kwaʼ nkeʼ yi ə́ lə tó ndəu nzʉ̂ lə̂ nkêʼ maa ŋuu ntsəm.

¹⁰ Tsâr zei lə pə́ cər nzʉ̂, káa pye-mə́soŋ jî gháp yé, lə́ ə́ mbou ngáʼá ə́ ndə lěi pə́ lə́ zʉ́ mboŋə́ pə́ wó.

¹¹ A lə tó lâʼ páp, káa pye lâʼ páp pfû gháp yé.

¹² Lə́ ngwǒ lə́ pye pi gháp lə pfú yé, ə́ mbə́i no yé, mə́i a lə ŋə́ gháp mətəʉ lə̂ ndághʼ ńcʉ́ʼ ghəpə́ Sê.

¹³ Gháp ghí pə́ ghəpə́ Sê, káa fú pə́ lə̂ məci, káa fú pə́ lə̂ mbap mbəʉ, káa fú pə́ lə̂ ləkoŋtə pye-mə́soŋ, lə́ ə́ fú pə́ lə̂ ləkoŋtə Sê.

¹⁴ Ə tsâr lə shərə ńcʉ́ʼ ŋuu-məsoŋ, ə́ ntó ńnyáŋ təcər paghʼə, paghʼə jwô ləghûʼ ye, a pə̂ ləghûʼ Môu moʼ yi a ghwǒ mbwórə, gháp no lə́nə́ʉ yi ə́ fú mbó Sê.

¹⁵ Jâŋ lâʼ no yi a pə̌ njí lə́ ŋuu wêi lə̂ təʉ ngô: «Yo ŋuu yi n ndə lǎʼ wéi ngô: “A pə́ nzəm məŋ mə́ ntó, ə́ ndéi ghâa lə̂. Pə́ lə ghí jí ghâa, mə́i a kə pə́ mə́ wó.”»

¹⁶ A kə tó, ə́ ndǎghʼ poŋə-ntə̂ʉ yé ə́ ŋə́ məfuʼ mághʼə, ə́ mbyə́ghʼə́ ńŋə́, ńté no nkoŋə ye zǎa gháʼate.

¹⁷ Sê lə lei lə́ Mə̌usə̂i, ə́ ŋə́ ləpə̌ʉ, lə́ mbwórə gháp no lə́nə́ʉ lei lə́ Yěso Kəlísto, ə́ mbə́ wó.

¹⁸ Ŋuu laa kə́ jwô yé Sê, lə́ Môu moʼ yi a pə̌ Sê, ə́ mbə́ lə́ Tə́ lə ghʉ pə́ jî yé.

Jâŋ Mbaptísʉ pə̌ ntsətə nkəʉ yi a ghwǒ

¹⁹ Yo nzǔʼ-njwó yi Jâŋ lə lǎʼ mpfu yi pəyúda lə fú Yelúsalêm, ə́ ntə́u pənuŋú-poʼ Sê gháp pə pye ngər Levî ńgó gháp wó ntúŋú yé ngô: «Ô wǒ?»

²⁰ A sâa-sǎa ndâʼ lə́ ŋuu ntsəm tə́ mʉ̂ŋtə ngô: «Káa m mbə̂ ghâa Kəlísto yi Sê lə tsóʼ.»

²¹ Gháp túŋu yé ngô: «Tə o pə̌ pə̂ wǒ? Ô Elyê?» Jâŋ pwôr ngô: «Ə́ ngə́, káa m mbə̂ ghâa zʉ́.» Gháp kə̂ ncí ntúŋú yé ngô: «Ô ntsətə-nkəʉ Sê áa?» A pwôr ngô: «Ə́ ngə́»

²² Gháp cʉ̂ʼ ndáʼ lə́ zʉ́ ngô: «Tə o pə̌ pə̂ wǒ? Paghʼ kə́u lǎʼ pye pi gháp yǎa ntə́u wághʼ ńgó ho? Lǎʼ wághʼ no lə̂ tû-mbəʉ zô. Ə nkwar ndə̂ zô ə̂ hó?»

²³ Jâŋ lâghʼ tsâr yi Esǎya ntsətə-nkəʉ Sê lə lǎʼ, ə́ mbwôr ngô: «Mə̂ŋ “nji ŋuu yi pə̌ koŋə-məkwaʼá ə́ mə́ ndâʼ ngô: Pei shítə́ laŋə́-ndə̂u Nde ə̂ tə́ʉ ndʉŋ-ndʉŋ!”»

²⁴ Pye pi pə́ lə tə́u gháp lə́ Jâŋ lêi, ə́ lə pə́ pəfalísia.

²⁵ Gháp kə̂ ncí ntúŋu yé ngô: «Kôo pə́ nzaʼ-nkʉ, káa pə́ Elyê, káa kə́ pə́ ntsətə-nkəʉ Sê, ə́ mbǒu ŋə̂ pye nci ńté hó?» Jâŋ pwôr lə́ páp ngô:

²⁶ «Ə́ wo lə́ məŋ, mə́i n ndaghʼ zâa pə̂ nci ńŋə̂ nci lə́ pye. Lə́ cǒ ŋuu pə́ təcər pei yi káa pei pə́ njî wéi yé.

²⁷ A pə́ nzəm məŋ mə́ ntó, lə́ káa m mbə́i nkuʼ ghâa lə̂ nkéʼ nkʉ laŋə́ yé.»

²⁸ Pə́ lə túŋu jâŋ məno mwo gháʼa Betanî lə̂ cǒ njʉŋə́ nci Yuudêŋ, ə́ yʉʼ yi a lə ŋə̂ pye nci wó.

Yěso Môu ndənzʉ Sê

²⁹ Nzʉ̂ fôghʼ, Jâŋ jwô Yěso pə̂ ntó ńcə́r yé, a lâʼ ngô: «Yo môu ndənzʉ yi a soghʼ məfaa pye-mə́soŋ.

³⁰ Ə̂ zʉ́ yi n ndə laʼ wéi ngô: “cǒ ŋuu pə́ nzəm məŋ mə́ ntó, ə́ nděi ghâa, pə́ lə ghí jí ghâa, mə́i a lə pə́ mə́ wó.”

³¹ Kwaʼ məŋ, káa n ndə pə́ njî ghâa ŋuu yi â zʉ́. Lə́ n ndə tô zâa, ə́ mə́ ndâghʼ nci ńŋə̂ Mbaptísʉ lə́ pye lə̂ ndághʼ ngʉ̌ ńgó pye Ísə́lahêl jí yé.»

³² Jâŋ pə̂i nzǔʼ-njwó, ə́ ndǎʼ ngô: «N ndə jwô Zəghʼə Sê fû tʉ̌-lə́pû shíʼ, ə́ mbə́ ghíʼ pə́ptə́, ə́ nyáŋ ndəu zʉ́.

³³ Kwaʼ məŋ, káa n ndə pə́ njî ghâa yé. Lə́ Sê yi a lə tə́u ghâa ńgó n ngwó ńdǎghʼ nci ńŋə́ Mbaptísʉ lə́ pye lə laʼ lə́ məŋ ngô: “O lə̌i ntáa njwó Zəghʼə Ndə̂i-lěi shíʼ ńnyáŋ lə́ ŋuu, o jî ńgó â zʉ́ yi a wo ndaghʼ Zəghʼə Ndêi-lěi ńŋə́ pye nci.”

³⁴ N ndə jwô, ə́ mbou ndéʼtə́ lə̂ lâʼ ńgó â môu Sê.»

Pəluŋ-mbi pəghaŋə-jyêʼ-no Yěso

³⁵ Nzʉ̂ fôghʼ, Jâŋ gháp pə có ngaŋə-jyêʼ-no yé pwô kə̂ ncí mbə́ yʉʼ wó.

³⁶ A jwô Yěso pə̂ ndêi, a lâʼ ngô: «Yo môu ndənzʉ Sê.»

³⁷ Ngaŋə-jyêʼ-no Jâŋ pêi pwô zûʼ tsâr zei, ə́ ntsə́ʉ nzəm Yěso.

³⁸ Yěso shə́rə ńjwó gháp nzəm zʉ́, ə́ ntúŋú gháp ngô: «Pei lou hó?» Gháp pwôr ngô: «Cícye, o cî ghó?»

³⁹ A lâʼ lə́ páp ngô: «Pei tó, pei wo jwó.» Gháp tsə̂ʉ nzəm zʉ́, ə́ nkə́u ńjwó yʉʼ yi a cî wó. Ə́ ghi pə́, ə́ mbə́ pəmə́nəu pə́tárə́ mpfu mbwǒr-nəu, gháp pə pǎp nyâŋ tə myâghʼ zêi leʼé mbî.

⁴⁰ Ləjôghʼ cǒ tâʼ lə̂ ngaŋə-jyêʼ-no Jâŋ pə́pwô pi gháp lə zúʼ tsâr yé ə́ ntsə́ʉ nzəm zʉ́ lêi, ə́ lə pə́ Aŋderê fə̌r Pyêh.

⁴¹ Nduŋ-mbi ŋuu yi Aŋderê wǒ ńjwó yé, ə́ ndǎʼ yé ńgó gháp jwó mə́ Nzaʼ-nkʉ pə̂ fə̌r Pyêh.

⁴² Ə́ ndǎghʼ Síməu ńgwó ńcə́r Yěso, Yěso náŋtə yé, ə́ ndǎʼ lə́ zʉ́ ngô: «Ô Síməu môu Jâŋ, pə́ ghʉ̌ cʉ́ʼ fúŋ ghô pə́ ńgó Sefásʉ.»

Fílîp gháp Natanayêl

⁴³ Nzʉ̂ fôghʼ, Yěso pə̂ ndə̂r lə̂ Galilêi, ə́ nkə́u laŋə́ ńjwó Fílîp, ə́ ndǎʼ lə́ zʉ́ ngô: «Tsə́ʉ nzəm məŋ!»

⁴⁴ Fílîp wêi pə̂ ŋuu Betsayída, ə́ pə̂ túsoŋ pə Aŋderê gháp Pyêh.

⁴⁵ Fílîp wo njwó Natanayêl, ə́ ndǎʼ lə́ zʉ́ ngô: «Paghʼ jwǒ ŋuu wə̂ yi pə́ lə lǎʼ no ńté yé cər ŋwaʼa ləpə̌ʉ Mə̌usə̂i mbaa cər ŋwaʼa pətsətə́-nkəʉ Sê lə̂, ləjôghʼ yé Yěso, a pə̂ môu Yosêp ŋuu Nǎazalêi.»

⁴⁶ Natanayêl túŋu Fílîp ngô: «Tə mboʼ có zə̂u kwar Nǎazalêi tə mbôŋ?» A pwôr ngô: «Tó ńjwó.»

⁴⁷ Yěso jwô ghíʼ Natanayêl pə̌ ntó ńcə̂r yé, ə́ náŋtə́ yé, ə́ ndǎʼ lə́ zʉ́ ngô: «Yo kwaʼ môu Ísə́lahêl yi káa a pə̂ yé ngaŋə píʼí.»

⁴⁸ Natanayêl túŋu Yěso ngô: «O jǐ ghâa ghó?» Yěso pwôr ngô: «Fílîp tə̌i ngǐ fúŋ ghô ləcʉŋə́ figyê, m mə̂ njwô ghô.»

⁴⁹ Natanayêl lâʼ ngô: «Cícye, ô Môu Sê, ô fou pye Ísə́lahêl.»

⁵⁰ Yěso laʼ lə́ zʉ́ ngô: «O pə̂i mpfu wo ńté no n ndaʼ ńgó n ntə̌i njwó ghô ləcʉŋə́ figyê, lə́ o pǒu kə́ cí jwó məcó məzə̂u mi ə́ lěi mwo.»

⁵¹ Yěso pou nkʉ́ʼʉ́ ndǎʼ ngô: «Kwaʼ lə́nə́ʉ, pei ghʉ̌ jwó ghíʼ ntsʉ tʉ̌-lə́pû tsóʼó ńtə́ʉ, pəcwôʼ Sê pə́ shíʼ ńtó ńcə̂r Môu ŋuu mbou mbə̂ʉ ńkóʼ.»