Jâghʼ 4 - Kaa Shwî

Ə nkôŋ nzʉ̂, ə́ mbâa Sê

¹ Məfeʼ gháp məlâʼ fû ghó təcər pei? Ə́ fû lə̂ mbə̂u yi məntə̂ʉ méi laghʼ ńcʉ́ŋə wéi mpfu tsəm lə̂ ndághʼ məzə̂u pye ńgʉ̂ méi.

² Pei tsâa məzə̂u káa kǔʼ lə̂ ngwô, ə́ ncʉ́ʼ ntə́ʉ pə́ lə̂ njwí ŋuu. Pei jwô zə̂u ŋuu, ə́ ntsáa ńgó mboʼ ə́ tə̂i mbə́ pə̂ zéi lə́ káa kuʼ wéi lə̂ ngwô, ə́ ncʉ́ʼ njî lə̂ kóo ntsʉ, ə́ ngʉ́ məfeʼ. Pei tsâa zə̂u káa ghwǒ ńté no káa pei pə́ njî wéi ndóu mbó Sê.

³ Pei lôu káa Sê ŋə́ ńté no məkwaŋtə mi pei laghʼ ńdóu kâa pôŋ yé. Pei lôu pə́ lə̂ ngwo ńcôŋ, ə́ ndaghʼ ńgʉ́ pə̂ məzə̂u mi ə́ wo poŋə́ pə́ wéi.

⁴ Pei, pəlǎŋ-nzəm-pwô káa pei pə́ njî ńgó pei lə̌i mə́ nzûŋ nzəm məzə̂u nzʉ̂ pei cʉ̂ʼ pəghaŋə mbəu Sê mo? Ŋuu lə̌i mə́ nkôŋ lə̂ mbə́ sə̌u məzə̂u nzʉ̂, a cʉ̂ʼ ngaŋə-mbəu Sê.

⁵ Ŋwaʼa Sê laʼ lə́ paghʼə ngô: «Sê sâa-sǎa nkôŋ Zəghʼə yi a lə cóghʼ lə́ paghʼə» gháʼá, káa laʼ pə̂ fefe.

⁶ Lə́ poŋə́ ntə̂ʉ Sê nzəm paghʼə ghúʼ gháʼate. Ə̂ zə̂u yi ə́ ghʉ̌, a lâʼ cər ŋwaʼa ye ngô: «Sê ləʼ no ngaŋə-ŋâʼtə, ə́ mbǒu ndághʼ poŋə-ntə̂ʉ yé náŋtə́ ngaŋə-shúʼu-mbəʉ.»

⁷ Pei shúʼú mbəʉ zéi mbi Sê. Pei lə̂ʼ no Sə́tə, a khʉ́ wéi.

⁸ Pei cʉ́ŋə́ mbáatə́ Sê, a cʉ́ŋə́ mbáatə́ wéi. Pei ngaŋə-məfaa, pei sóghʼ mbô méi; pei pye tə́poŋ pi pei ghwǒ məntə̂ʉ mə́mbwô, pei kwárə́ məno tə́poŋ məntə̂ʉ pei!

⁹ Pei jí ńgó pei pəghaŋə ngwôʼ. Ə́ núŋú ləwʉ̂ ndǎa, ləjwi wei cʉ́ʼ ləghe, lətsei wei cʉ́ʼ ləmoghʼ.

¹⁰ Pei shúʼú mbəʉ zéi mbi Nde, a ŋáʼá wéi ŋə́ tʉ́.

Koo ŋuu tô lǒʼ fə̌r ye

¹¹ Pəfə̌r pâa, koo ŋuu kʉ̂ʉ fə̌r ye tə́poŋ, ŋuu lə̌i nkʉ́ʉ fə̌r ye tə́poŋ mbǒu tó lǒʼ yé, mə́i a tô gháʼá lǒʼ ləpə̌ʉ Sê, ə́ mbou nkʉ̂ʉ gháʼa ləpə̌ʉ Sê tə́poŋ.

¹² Ndaʼ Sê ŋuu yi a tâghʼ ləpə̌ʉ, ə́ mbǒu ndághʼ ńfěʼ pye. Ə́ nkǔʼ lə̂ ngʉ́ ŋuu cwôr, kəʉ lə̂ ngʉ́ a kwʉ̂ lo. O zô wǒ tə tô lǒʼ fə̌r gho?

Koo ŋuu ŋáʼte mbəʉ ye

¹³ Pei zʉ́ʼtə́ ńzúʼ, pei pi pei laʼ ngô: «paghʼ wo lə̌r lə̂ túsoŋ keke, ə́ leʼé wo kəʉ pə̂ zou lo, ə́ nyáŋ wó tâʼ nguʼ ə́ táŋ mətǎa, ə́ ghwǒ nkâp.»

¹⁴ Káa pei pə́ njî wéi ghíʼ ləcǐ-mbî wei ghʉ̌ zou pə́! Pei pə́ ghíʼ məlâm mi ə́ kôʼ mbóu sěi ə́ mə̂.

¹⁵ Pei təi lǎʼ pə́ ngô: «Ə Nde lə̌i mbə́i, ə́ ghʉ́ ngǐ pə́ zou paghʼ pyêr wó, paghʼ ghʉ̂ yo, ə́ ngʉ́ yi.»

¹⁶ Pei wô mpfu wo mə́ ndâghʼ ŋâʼtə ńtâghʼ məzə̂u mi pei ghʉ̌ lǎghʼ ndʉʉ mətəʉ wéi ghʉ̌, lə́ mbə̂u ləŋâʼtə zêi kâa pôŋ yé.

¹⁷ Ə́ pə̂ yə́rə́, ŋuu lə̌i mə́ njî ngʉ́ no shʉʼʉ ə́ mbǒu ndə́iʼ ghʉ̌ po, mə́i a ghʉ no tə́poŋ.