Jâghʼ 3 - Kaa Shwî

Pei fə̂iʼ tsâr zéi

¹ Pəfə̌r pâa, koo pye tə nzáa təcər pei lou lə̂ mbə́ pəjyéʼ-pye zə̂u. Pei tsúŋú njí ńgó paghʼ pi paghʼ jyêʼ pye zə̂u, waghʼ kôr ghʉ̌ tə̌i lěi yi pəcó pye.

² Paghʼə pə́tsəm pə́ ngwʉ no mbə̂u lə̂ mbə̂u. Ŋuu lə̌i mbə́ yi a tsâr tə́ kotə, a pə̂ ŋuu ndʉŋ-ndʉŋ, ə́ kǔʼ lə̂ ngwôtə́ məyʉʼ mbəʉ mé mə́tsəm.

³ Paghʼə lei tə cóghʼ kə̂ʉ ntsʉ lwô, ə́ ndaghʼ ńgʉ́ a zûʼ ntsʉ wághʼə, ə́ pə̂ yi mboʼ paghʼə ghʉ̂ lə́ zʉ́ ghíʼ paghʼə kǒŋ.

⁴ Pei náŋtə́ Láanji ńjwó, a ghǔʼ tə nkə́u ghó, kəfwor yi a cʉ́ŋə yé pôu ntə́i ńkə́u ghó, ŋuu yi a shuŋ wěi laghʼ pə́ môu mətsə̌m tə̌ʉ nyárə yé ndə̂u yi a tóghʼó.

⁵ Ə́ kə́ mbə́ pə́ yə́rə́ lə̂ lə̂ʉ ŋuu, ə́ pə́ tə ngwô lə̂ məyʉʼ mbəʉ ŋuu, ə́ mbə́ pə́ yi mə́ceʼé, lə́ mboʼ ə́ ŋâʼtə ńgó ə́ pə́ ngʉ məno jwǐ. Pei jwó təsaʼ-mǒghʼ ghíʼ a tou məmbə̂i jwǐ.

⁶ Ə lə̂ʉ ŋuu kə́ mbə̂ yé ghíʼ mǒghʼ. Ə̂ yʉʼ mbəʉ zághʼə yi məno tə́poŋ cî wó, ə́ nâa mbəʉ zághʼə tsəm côŋ. Lə̂ʉ zághʼə côghʼ mǒghʼ lə̂ ləcǐ-mbî wághʼə lə̂ fú leʼé lə́jí ə́ ngwo nkə́u leʼé yi paghʼə kwʉ̌. Mǒghʼ wêi pə̂ yi fú cər ghəm mǒghʼ tə́ láʼ ncwí.

⁷ Ŋuu-məsoŋ kuʼ lə̂ ngʉ́ mənye ləghěi mə́tsəm mbə̂u lə̂ mbə̂u, pəshʉ̌ŋ, mənye mi ə́ shuŋu məpəm máp pə́ sê, mbaa məshû zûʼ ntsʉ yé. A pəi mə́ ngʉ̌ tə gháp pə̂ nzúʼ.

⁸ Lə́ ngwǒ lə̂ lə̂ʉ ŋuu, mə́i ŋuu yi mboʼ a ghʉ̂ tə ə́ zûʼ ntsʉ yé kâa pə́ wó. Lə̂ʉ ŋuu ə̂ no tə́poŋ yi mboʼ ŋuu jîʼ yé po. Ə́ ghwo məcap mi mboʼ ə́ jwî ŋuu.

⁹ Paghʼə laghʼ pə́ zěi ńgûʼtə Nde wághʼə, ə́ mbə́ Tə́ wághʼə, ə́ mbou nkə́ ndâghʼ pə́ zěi ńcôghʼ ndou tû pye-mə́soŋ pi Sê lə tsuŋú, ə́ ngʉ́ gháp shwî yé.

¹⁰ Ə mbwórə gháp ndou naa kwâr cər tâʼ ntsʉ. Pəfə̌r pâa kâa pôŋ ńgó ə̂ pə́ yə́rə́.

¹¹ Tə mboʼ tâʼ ləsǎʼ nci pə̂ ŋə̂ nci nǒ ə́ mbou nkə́ mə́ ŋə̂ yi pə́ ndǐ?

¹² Pəfə̌r pâa tə mboʼ tʉ̌ zou zə̂m mbwʉ̌? Ləpi kə̂ nzə́m zou? Mboʼ ləsǎʼ nci ngwâŋ ŋə̂ yé nci nǒ po.

Ə jîno yi ə́ fû tʉ̌-lə́pû

¹³ Mboʼ cǒ ŋuu pə̂ təcər pei yi a kwǎŋ ńgó a ghwô jîno mbóu ntóghʼ nzúʼ no mo? A lə̌i mbə́ wó, a lâghʼ cǐ shʉʼʉ yé gháp məfaʼ mi a laghʼ mbwórə gháp jîno ńfâʼ, ə́ nyarə́.

¹⁴ Lə́ ə́ mbə́ yi pei lə̌i ngwô fúʼ-lóŋ yi ə́ lə gháʼ mə́ məntə̂ʉ pei, mbaa ngwô kwaŋtə lə̂ nzôŋ lə̂ nkə́ ntə̂ʉ pə́ tû-mbi lə̂ məno mə́tsəm. Koo pei cî ŋâʼtə́ wó, ə́ ndághʼ məlaa ḿbə́ghʼ no lə́nə́ʉ.

¹⁵ Ə mbə̂u Jîno zêi kâa pə̂ yé yi ə́ fú tʉ̌-lə́pû. Ə̂ yi ndəu ndesé, ə́ mbə́ yi pye-mə́soŋ, ə́ mbə́ yi məzəghʼə tə́poŋ.

¹⁶ Ə yʉʼ tsəm yi pye ghwǒ fúʼ-lóŋ wó gháp nzôŋ lə̂ ntə́ʉ tû-mbi, ə́ ghwo tághʼə́ mbaa məno tə́poŋ mbə̂u lə̂ mbə̂u.

¹⁷ Lə́ ŋuu yi a ghwǒ jîno yi ə́ fú tʉ̌-lə́pû, â ŋuu yi a pə̌ tə́ lǒʼ, ə́ mbə́ ŋuu ŋə̂i pə́ lə̂ mbwórə. Ə́ mbáatə́ mbə́ ŋuu mbwórə, ə́ ngʉ̂ məno mé kuʼú-kuʼú, ə́ ngwǒ tsâa-mə́jʉ̂ŋ gháʼate, ə́ nkə́ fâʼ məfaʼ shʉʼʉ pə́ yə́rə́, káa ghwô yé peʼe-mbî, ə́ mbou káa pə́ ngaŋə-nkoŋə-mənyôghʼ.

¹⁸ Pye pi gháp nyâŋ lə̂ mbwórə təcər pye-mə́soŋ pi zə̂u cər mbwórə, məntǎa mi gháp kâp, pə̂ lənyâŋ yi Sê pə̌ nkoŋ wěi.