Jâghʼ 2 - Kaa Shwî

Koo pei ghwô peʼe-mbî təcər pei

¹ Pəfə̌r pâa pei pi pei pə̌i mə́ no Yěso Kəlísto Nde wághʼə yi a ghwǒ ləghûʼ, koo pei ghwô peʼe-mbî ńté pəcó pye.

² Paghʼə pyé fəiʼ lə́ pye pə́pwô pi gháp ghí kə́u ndə̂ cûʼtə pei, tâʼ ŋuu mâʼ ndǐ nkâp, ə́ ngwér kə̂ʉ lətəi-ndwuŋ, cǒ mâʼ yé pə̂ məndǐ mi ə́ pəpə mə́,

³ pei tághʼ nyôghʼ lə́ ŋuu yi a wě ndǐ nkâp, ə́ ndáʼ lə́ zʉ́ ngô: «Tó nyáŋ lə̂ yʉʼ məkuʼ yo.» Ə́ ncʉ́ʼ ndáʼ lə́ ŋuu yi a mǎʼ məndǐ mi ə́ pəpə mə́ ngô: «Tə́ʉ yʉʼ wə̂» ə́ nkə́ ndə́iʼ yə́rə́ po: «O tô ńtə́m cû zô sê lə̂ lətǎghʼ məku zâa.»

⁴ Pei lə̌i ngʉ́ yə́rə́, mə́i káa pei ghwô gháʼa peʼe-mbî ńté pəcó pye mo? Káa pǒu lǎghʼ gháʼá məkwaŋtə tə́poŋ feʼ pye mo?

⁵ Pei pəfə̌r pi lətəi-ndwuŋ, pei tsúŋú nzúʼ! Kâa Sê lə̂ lə tsóʼ pye pi gháp pə́ cər nzʉ̂ pə́ fûŋ gháp ńgó pəpûŋ ə́ ndaghʼ ńgʉ́ pəghaŋə-zə̂u cər pə̂i-ntə̂ʉ nzəm Kəlísto, ə́ njí ńgó gháp kə́u cər Ləfou Sê tʉ̌-lə́pû, ə́ pə̂ yʉʼ yi a lə ghʉ̌ ndaʼá mə́u lə̂ ngʉ́ ŋə́ lə́ pye pi gháp kǒŋ no yé.

⁶ Ə́ ngwǒ lə́ pei, pei shúʼu ndwuŋ pəpûŋ, ə́ ŋáʼá ndwuŋ pəghaŋə-zə̂u; lə́ ə́ pə̂ páp pi gháp jwôghʼ ŋə̂ wéi ngwôʼ, ə́ shûŋtə wéi ə́ ndaghʼ ńŋə̂i pəkôr.

⁷ Kâa kə́ mbə́ pə́ páp pəghaŋə-zə̂u pi gháp zoutə ləjôghʼ shʉʼʉ yi Sê lə ŋə́ lə́ pei lə́ mo?

⁸ Pei lə̌i ngʉ́ zə̂u yi ləpə̌ʉ jwǐ yi pə́ ŋwáʼá cər ŋwaʼa Sê ngô: «Kǒŋ fə̌r gho ghíʼ o koŋ tû mbə̂ʉ zô, mə́i pei ghʉ shʉʼʉ.»

⁹ Lə́ pei lə̌i mə́ ngwô peʼe-mbî ńté pye, pei jî ńgó pei ghʉ mə́ gháʼa no tə́poŋ, ləpə̌ʉ ghou wéi ńté ńgó káa pei ŋə̂i wéi gháʼá ghíʼ ə́ pə́ ntúŋú.

¹⁰ Ńté no ŋuu lə̌i mə́ ŋə̂i ghíʼ ləpə̌ʉ pə́ ntúŋú lə́ mbǒu fâa pə́ tâʼ ntǎghʼ mə́u, ə́ pə̂ ńgó a fâa ləpə̌ʉ tsəm.

¹¹ Ŋuu yi a lə lǎʼ ńgó koo o ghʉ̂ məghap, zʉ́ lə́ lə kə́ ncí ndáʼ ńgó koo o jwî ŋuu. Ə́ laghʼ mbə́ ńgó o lə̌i ndə́iʼ ghʉ̌ məghap po, lə́ mbǒu njwí ŋuu, ə́ pə̂ ńgó o pfuŋ mə́ lə̂ ləpə̌ʉ tsəm.

¹² Ə́ pə̂ yə́rə́, ə́ mə́ ntúŋu ńgó pei tsár mbou ngʉ́ ghíʼ pye pi gháp pə́ njî ńgó Sê táa lǎghʼ ləpə̌ʉ yi ghʉ gháp cʉ̂ʼ pəfou-ndʉʉ, ə́ fěʼ gháp.

¹³ Ńté ńgó ə́ pə́ mpfu yi Sê pə̌ feʼ pye, kâa ghwo yé tsâa-mə́jʉ̂ŋ ńté ŋuu yi káa ghwô yé tsâa-mə́jʉ̂ŋ lə́wó ńté pəcó pye. Lə́ káa ŋuu yi a pə̌ ntsâa məjʉ̂ŋ pəcó pye, ghwô yé lə̂ nkə́ mbóghʼ ńgó Sê wo feʼ yé.

Pə̂i-ntə̂ʉ nzəm Kəlísto gháp məfaʼ

¹⁴ Pəfə̌r pâa pi lətəi-ndwuŋ, ŋuu lə̌i ndáʼ ńgó a ghwô pə̂i-ntə̂ʉ nzəm Sê ə́ ndə̌iʼ lǎghʼ məfaʼ mé ńnyárə́ po, zěi pfûtə yé lə̂ hó? Mboʼ mbə̂u pə̂i-ntə̂ʉ zei ghʉ tə ŋuu cwôr?

¹⁵ Tâʼ fə̌r yi mbiŋə kəʉ yi məngyě lə̌i mə́ ŋə̂i ntsəmə ə́ mbóu mə́ mbûŋ zə̂u yi mboʼ a zʉ̂ lə̂ leʼé mbî,

¹⁶ cǒ ŋuu təcər pei lâʼ lə́ páp ngô: «Pei lə̂r lə̂ mbwórə, ə́ mǎʼ məndǐ fwôghʼ, ə́ nzʉ́ njwə́r!» Ə́ ndǎʼ yə́rə́ tə́ ŋə̂ có zə̂u yi ə́ wo pfútə́ gháp, mə́i ndâʼ yə́rə́ zêi wo pfútə́ gháp lə̂ hó?

¹⁷ Ə́ kə́ mbə́ pə́ yə́rə́ lə̂ pə̂i-ntə̂ʉ nzəm Kəlísto, o lə̌i ngwô pə̂i-ntə̂ʉ nzəm Kəlísto pə́ lə́iʼ pə́ jwô lə̂ məfaʼ po, ə́ pə̂ ńgó ə̂ pə̂i-ntə̂ʉ yi ə́ kwʉ́ mə́.

¹⁸ Cǒ ŋuu wo lǎʼ ngô: «O ghwô pə̂i-ntə̂ʉ nzəm Kəlísto, məŋ ngwô məfaʼ.» O lə̌i ndâʼ yə́rə́, mə́i n ngwo pwǒr lə́ gho ngô: «Nyarə́ ghâa pə̂i-ntə̂ʉ nzəm Kəlísto tə́ məfaʼ zô, m mbóu ndǎghʼ məfaʼ mâa ńnyarə́ ghô pə̂i-ntə̂ʉ zâa.»

¹⁹ O pə̌i ńgó Sê pə̌ tâʼ môʼ? Ə́ poŋ. Məzəghʼə tə́poŋ kə́ mə́ mbə̂i záp lə́wó, ə́ mbǒu mə́ mbóghʼ tə ngwə̂r.

²⁰ Gho ghəghəʉ yo! O pə̌ nkoŋ njí ńgó pə̂i-ntə̂ʉ nzəm Kəlísto yi tə́ məfaʼ ə̂ yi ə́ nkwʉ́ mə́?

²¹ Káa Sê lə pə́i ńgó Tə́ waghʼə Ábələhâm pə́ ndʉŋ-ndʉŋ ńté məfaʼ mé ghíʼ a lə pə́i lə̂ ŋə́ môu ye Ísaghʼ lənuŋú poʼ Sê lə́ mo?

²² O jwǒ ńgó pə̂i-ntə̂ʉ yé nzəm Kəlísto gháp məfaʼ mé lə tə̂m ku ŋə̂i, pə̂i-ntə̂ʉ yé ghûʼ ńté ghíʼ məfaʼ lə pə́ ncághʼə zěi.

²³ Ə́ lə pə́ yə́rə́, ə́ ndaghʼ mbə̂utə́ lə̂ no yi pə́ lə ŋwáʼá cər ŋwaʼa Sê ngô: «Ábələhâm lə pə̂i no Sê, Sê fû mə́u mbyé yé ghíʼ ŋuu ndʉŋ-ndʉŋ, ə́ fúŋ yé ńgó sə̌u ye.»

²⁴ Pei lâghʼ ńjwó ńgó ŋuu ghí pə́ ndʉŋ-ndʉŋ mbi Sê, ə́ lei pə́ lə̂ məfaʼ mé, káa lei yé pə́ ndaʼ lə̂ pə̂i-ntə̂ʉ nzəm Kəlísto.

²⁵ Ə́ lə kə́ mbə́ pə́ yə́rə́ lə́ Rahâp kwarə məngyě yi Sê lə pə́i ńgó a pə̂ ndʉŋ-ndʉŋ, ə́ ndeitə́ ghíʼ a lə pfû mənâŋ pye Ísə́lahêl pi pə́ lə tə́u gháp, ə́ mbou nyárə́ gháp có laŋə́-ndə̂u yi gháp wo fú mə́u pə̌ʉ tə́ ghó có zə̂u ghʉ gháp.

²⁶ Ghíʼ mbəʉ tə́ Zəghʼə ə̂ yi ə́ kwʉ́ mə́ lə̂, ə́ kə́ mbə́ ndʉŋ-ndʉŋ ghíʼ pə̂i-ntə̂ʉ nzəm Kəlísto tə́ məfaʼ ə̂ yi ə́ kwʉ́ mə́.