Galâtə 6 - Kaa Shwî

Pei tóutə́ mbəʉ zéi təcər pei

¹ Pəfə̌r pâa nzəm Kəlísto, pei pi Zəghʼə Ndêi-lěi lə́ pə́ ncághʼə wéi, pei lə̌i njwó ŋuu wei pə́ ngʉ̂ no tə́poŋ, pei shə́rə yé ntághʼ lə̂ laŋə́-ndə̂u shʉʼʉ; lə́ mə́ shə́rə yé, pei lâghʼ pə̂ mbwórə. Ə́ mbou mbáa lə́ pə́ yi mboʼ pei zéi lə́wó pfûŋ cər nkwaʼtə.

² Məno ŋuu lə̌i mə́ ngâʼ yé, fə̌r ye tôutə yé: pei lə̌i ngʉ́ yə́rə́, ə́ pə̂ ńgó pei pə̌ ngʉ ghíʼ ləpə̌ʉ Kəlísto pə́ ntúŋú.

³ Ŋuu lə̌i ndáʼ ńgó a fǔ mbə́ ŋuu gháʼate, lə́ ngǐ lǎʼ káa kuʼ yé có zə̂u, mə́i a futə pə̂ mbəʉ ye.

⁴ Wǒwó lə́ pei náŋtə́ ngʉ̌ məno yé, a lə̌i náŋtə́, ə́ njwó ńgó faʼ ye poŋ, mə́i mbəʉ ye wo pǒŋ gháʼate, ńté ghíʼ a ghʉ̌ faʼ shʉʼʉ, tə lə́u fəiʼ yé ngʉ̌ məno yé pə́ lə́ mi cǒ ŋuu po.

⁵ Ńté ńgó wǒwó ghwo lə̂ ngʉ̂ faʼ yi Sê lə cóghʼ mbó zʉ́.

⁶ Ŋuu lə̌i mə́ njyêʼ gho tsâr Sê, o wô lə̂ məzə̂u mi o ghwǒ, ə́ ndâghʼ məcó ńtóutə́ yé.

⁷ Koo pei fûtə mbəʉ zéi lə̂ no zêi yo: Koo ŋuu kwâŋ ńgó mboʼ a zôutə Sê. Wǒwó ghʉ̌ kə́ káp pə̂ zə̂u yi a lə pǐ.

⁸ Ŋuu lə̌i mbî zə̂u yi ə́ pfûtə pə̂ mbəʉ yé, mə́i a ghʉ̌ káp məntǎa mi mbəʉ ye zêi zə̂m, ə̂ pə́ ləwʉ̂, â kwʉ́ tə nkwʉ́ lə̂ kwěi pé; lə́ ŋuu póu mbǐ zə̂u yi ə́ pǒŋ Zəghʼə Ndêi-lěi, mə́i a ghʉ̌ zə́m məntǎa mi Zəghʼə Ndêi-lěi zei zə̂m, ə̂ pə́ ləcwôr tə me.

⁹ Koo paghʼə kâa lə̂ ngʉ́ no shʉʼʉ; ńté ńgó paghʼə lə̌i nkə́ mə́ ngʉ̂ pə̂ məno shʉʼʉ ndaghʼ ńdə́r lə̂ mbi, mə́i leʼé ghʉ̌ kǔʼ paghʼə káp məntǎa shʉʼʉ.

¹⁰ Ghíʼ ə́ kə́ mbə́ yə́rə́ lə̂, paghʼə lə̌i ngwô saa pə̂ mpfu hó, paghʼə ghʉ̂ zə̂u yi ə́ wo pfûtə ŋuu ntsəm, ə́ ngʉ́ faʼ yi ə́ wo pfútə́ pəfə̌r paghʼə pi gháp ghwǒ pə̂i-ntə̂ʉ nzəm Kəlísto.

Ndyəghʼ-nzəm tsâr gháp tsêʼtə

¹¹ Pei pə̌ njwô mbə̂u yi mənyôghʼ ŋwaʼa lǎghʼ ngúʼtə́. Məŋ ndǎghʼ ndʉʉ pô ghâa ŋwáʼá yo yʉʼ.

¹² Pye pə̂ pi gháp ŋə̂ʼtə wéi ńgó pei pə́i pə púʼ wéi lə̂, ə̂ pye pi gháp lou ńgó pye-mə́soŋ fə́tə́ gháp. Gháp pôghʼ ńgó pye-mə́soŋ wo ŋə́ gháp ngwôʼ, ńté no gháp pə́ ndaʼ no ńté ghíʼ Kəlísto lə kwʉ́ lə̂ tʉ̌-mbʉ̂ŋtə.

¹³ Pye pêi pi gháp ŋə̂ʼtə pye ńgó gháp pə́i pə púʼ gháp lêi, kâa pə́ ŋə̂i gháp lə̂ ləpə̌ʉ tsəm; gháp lou ńgó pə púʼ wéi, gháp lághʼ ńŋáʼtə́ ńgó gháp lu tə pə́ pûʼ wéi.

¹⁴ Ə́ ngwǒ lə́ məŋ, mə́i n ngwo pə́ tâʼ zə̂u yi m mboʼ ndâghʼ ńŋáʼtə́: ə́ pə̂ ghíʼ pə́ lə kʉ̌ʉ Nde waghʼə Yěso Kəlísto lə̂ tʉ̌-mbʉ̂ŋtə; ńté ńgó ə́ lei lə̂ ləwʉ̂ ye lə̂ tʉ̌-mbʉ̂ŋtə, ə zə̂u tsəm ndəu nzʉ̂ pə̂ mbó məŋ, ə́ mbə́ ńgó měi lə kwʉ́tə́ mə́, n nkə̂ mbə̂ zâa mbó pye ndəu-nzʉ̂, ə́ mbə́ pə́ ghíʼ mpfu yi n ndə kwʉ́ mə́.

¹⁵ Ə zə̂u yi ə́ pə́ yi lətəi-ndwuŋ mbó məŋ, kâa pə̂ yé mbúʼ ŋuu kəʉ títə́ púʼ: ə̂ nkə́p cǐ yé, ə́ ncʉ́ʼ ŋuu shwî.

¹⁶ Ə́ ngwǒ lə́ pye pi gháp pə́ ŋəi ghíʼ n ndaʼ lo, ńgó Sê cóghʼ mbwórə lə́ páp, ə́ mbou mpfútə́ gháp lə̂ ngʉ́ shʉʼʉ, mbaa lə́ pye Sê pə́tsəm.

¹⁷ Lə̂ fú mpfu wo, koo ŋuu kə̂ mbóu ngʉ̌ məŋ njwô ngwôʼ. Ńté ńgó məlaghʼə́ məfʉ̌ŋ mi ə́ pə́ ndəu məŋ pə́ nyárə ńgó məŋ ŋuu Kəlísto.

¹⁸ Pəfə̌r, ńgó Nde waghʼə Yěso Kəlísto cóghʼ mbwórə lə́ pei pə́tsəm. Ə̂ pə́ yə́rə́.