Efêzə 5 - Kaa Shwî

Pei ŋə̂i cər nkeʼ

¹ Ghíʼ pei pə̌ ghəpə́ pi Sê kǒŋ gháp lə̂, pei sáʼ mətəʉ lə̂ mbə́ ghíʼ zʉ́.

² Pei nyáŋ lə̂ nkoŋə, ə́ ndʉŋ-ndʉŋ ghíʼ Kəlísto yi a lə kǒŋ wághʼə tə ndághʼ tû-mbəʉ yé ńnúŋú poʼ mbi Sê ńté tû zághʼə, ə poʼ wêi pə̂ yi jaghʼə́ zěi poŋə́ Sê gháʼate.

³ Ghíʼ pei pə̌ ghəpə́ Sê lə̂, kâa pôŋ yé ńgó pə tó təcər pei ə́ njwó pye pi gháp pəu pə̌u nzóʼ, kəʉ pye pi gháp ghʉ məno coŋ ndwuŋ, kəʉ ngaŋə fúʼ lóŋ pi gháp lou ńgó zə̂u tsəm pə́ pə̂ záp.

⁴ Kâa kə́ ncí mbôŋ yé ńgó pə nyáŋ nzûʼ məshwi-shwí mətsâr, kəʉ məghəghəʉ mətsâr, kəʉ mətsâr coŋ ndwuŋ kwâtə ntsʉ pei. Tə ncʉ́ʼ yə́rə́, mətsâr méi pə̂ pə́ mi pei laghʼ ńŋə̂ nkhwo mbó Sê lə̂ məno shʉʼʉ mi a ghʉ lə́ pei.

⁵ Pei tsúŋú ńjí ńgó pye pi gháp pəu nzóʼ kəʉ ngʉ̂ məno coŋ ndwuŋ ghʉ̌ kə̂u gháp cər ləfou Kəlísto mbaa yi Sê po; tə mbaa ngaŋə fúʼ lóŋ yi a nâŋ zə̂u tsəm ńgó ə́ təi pə́ pə̂ yé ghʉ̂ kə̂u yé cər wó po. Ńté no ə́ náŋ zə̂u tsəm, ə́ ndôu ńgó ə́ təi pə́ pə̂ zô kə́ mbə́ pə̂ cǒ mbə̂u ngúʼtə́ məzə̂u, ə́ fúŋ ńgó Sê.

⁶ Koo ŋuu lâghʼ məfwǒ mətsâr ńfutə́ wéi: Ə̂ mbə̂u mətsâr mi ə́ ghʉ Sê záŋə-lóŋ lə́ pye pi gháp ləʼ lə̂ nzûʼ ntsʉ yé.

⁷ Ghíʼ ə́ pə́ yə́rə́ lə̂, koo pei pə mbə̂u pye zêi təm no.

⁸ Pei lə pə́ mpfu cǒ ə́ mbə́ cər nzə̌m, pei pou ngǐ tə́ʉ mpfu wo, ə́ ndághʼ ghíʼ pei lǎr mbəʉ zéi lə Nde ə́ ncʉ́ʼ mbə́ pə́ cər nkeʼ. Ghíʼ ə́ kə́ mbə́ yə́rə́ lə̂, pei ghwô mbəʉ zéi ghíʼ pye pi gháp pə́ cər nkeʼ,

⁹ ńté no nkeʼ ə̂ zə̂u yi ə́ ghʉ pə́ ghʉ məno shʉʼʉ, ə́ ngʉ́ pə́ pə̂ ndʉŋ-ndʉŋ mbi Sê, ə́ mbou ngʉ́ pə́ laʼ no lə́nə́ʉ.

¹⁰ Pei wó lə́ maa zə̂u tsəm yi pei ghʉ, ə́ náŋtə́ ńjwó ńgó kəʉ yi pei ghʉ pə́ mboŋə́ Nde lo.

¹¹ Koo pei kə̂u wéi lə̂ məno mi kâa pə́ mpfutə́ yé ŋuu lə̂ có zə̂u, ə́ mi pye ghʉ cər nzə̌m; tə ncʉ́ʼ yə́rə́ pei sə̂-nzəm zěi sə̌.

¹² Ə́ yaa ngǐ pə́ məno mi pye ghʉ ləlwǒ lêi, ə sə̂ʉ pə́ mə́u tə káa pə́ yi mboʼ pə́ nyâŋ nkʉ̂ʉ měi.

¹³ Lə́, pə́ lei tə sə̂-nzəm məno mêi, ə́ fôghʼ, ńté no nkeʼ lei tə́ mbə́ lə̂ zə̂u, pə́ sâa-sǎa njwó;

¹⁴ ə̂ zə̂u yi ə́ ghʉ̌ pə́ ŋwaʼa cər ŋwaʼa Sê ngô: «Gho yi o pə̌ ndé, jye, lěsê nou pəpfû-sê, Kəlísto cóghʼ nkeʼ ye lə́ gho.»

¹⁵ Ghíʼ ə́ pə́ yə́rə́ lə̂, pei laghʼə́ tû zéi lə̂ ləŋəi wei. Koo pei ŋə̂i ghíʼ məghəghəʉ, pei ŋə̂i ghíʼ pye pi jîno záp pə́ wó,

¹⁶ ə́ pi gháp jî nzʉ́ pəi məleʼé-lâʼ mi Sê ŋə̂ lə́ páp, ə́ fâʼ məfaʼ shʉʼʉ, ńté no mpfu mbi yo kâa pôŋ yé.

¹⁷ Ə̂ zə̂u yi ə́ ghʉ̌, koo pei nyâŋ ghíʼ pye pi káa jîno záp pə́ wó, lə́ pei wó lə̂ maa zə̂u tsəm, ə́ náŋtə ńjwó ńgó kəʉ yi pei ghʉ pə́ mboŋə́ Sê lo.

¹⁸ Koo pei pə̂i məluʼ zʉ̂ wéi: pei lə̌i mbə́i məluʼ zʉ́ wéi, mə́i ə́ wo cʉ́ŋə́ wéi pei cʉ́ʼ ngʉ̂ pə̂ məno tə́poŋ; lə́ pei pə́i Zəghʼə Ndêi-lěi lə̂ zʉ́ wéi.

¹⁹ Pei lâghʼ pə́ nzâp məzap-nci mi kwar cər ŋwaʼa Sê ńtôutə mbəʉ zéi, ə́ nzǎp məzap-nci pye Kəlísto, mbaa mi Zəghʼə Ndêi-lěi côghʼ məntə̂ʉ pei; pei zâp yə́rə́ ndaghʼ ńŋə́ ləghûʼtə mbó Sê lə̂ ntə̂ʉ wéi tsəm.

²⁰ Pei ŋə́ nkhwo mbó Tə́ waghʼə Sê ə́ mpfu tsəm, lə́ maa zə̂u tsəm ə́ ndeitə́ lə̂ ləjôghʼ Nde waghʼə Yěso Kəlísto.

Ə mbə̂u yi mboʼ pəngyě gháp pə pələ̂u páp laghʼ ńnyáŋ

²¹ Pei lághʼ ghíʼ pei shúʼu-mbəʉ zéi mbi Kəlísto, wǒwó təcər pei shúʼú mbəʉ ye mbi fə̌r ye.

²² Ə́ ngwǒ lə́ pei pəngyě, wǒwó shúʼú mbəʉ ye mbi ndə̂u ye, ə́ ndʉŋ-ndʉŋ ghíʼ a shúʼu-mbəʉ ye mbi Nde.

²³ Ńté ńgó ŋuu mbiŋə â tû lə̂ nkáŋ-mbəʉ, məngyě pə̂ nkáŋ-mbəʉ, ə́ ndʉŋ-ndʉŋ ghíʼ Kəlísto pə̌ tû lə̂ cûʼtə pye pé, cûʼtə pye pé pə̂ nkáŋ-mbəʉ. Kəlísto lə̂ ghʉ cûʼtə pye pé ghwo ləcwôr.

²⁴ Pəngyě ghwo lə̂ shúʼú mbəʉ záp mbi pələ̂u páp lə́ maa zə̂u tsəm, ə́ ndʉŋ-ndʉŋ ghíʼ pye Sê shúʼu mbəʉ záp mbi Kəlísto lə̂.

²⁵ Ə́ ngwǒ lə́ pei mbiŋə, wǒwó kôŋ ngwě ye, ə́ ndʉŋ-ndʉŋ ghíʼ Kəlísto lə kǒŋ cûʼtə pye pé tə ŋə́ tû yé ńté zěi;

²⁶ ə́ ngʉ yə́rə́, ə́ ndaghʼ ńfâghʼ cûʼtə yé ńcôghʼ mbó Sê, ə́ ngí ghʉ yə́rə́, mə́i a laghʼ nci gháp tsâr, ə́ ndaghʼ ńkwárə́ lǒʼ lə́ páp.

²⁷ A lə pə́ ndôu ńgó cûʼtə pye pé ghí tə́ʉ mbi zʉ́ ə́ ngwó ngəwoghʼ, ə́ mbə́ tə́ pǎp, tə́ có yʉʼ yi ə́ ŋwúʼtə́ mə́u, ə́ mbə́ tə́ có lǒʼ, ə́ có zə̂u póu mə́ mbûŋ yé mə́u po. A lə nkoŋ ńgó cûʼtə zêi pə́ ndêi-lěi, tə́ có zə̂u yi mboʼ pə́ lei mə́u ə́ ntó lǒʼ zěi.

²⁸ Ə́ pə̂ yə́rə́, mə́ ntúŋu ńgó ŋuu mbiŋə kôŋ ngwě ye, ə́ ndʉŋ-ndʉŋ ghíʼ a koŋ ndʉʉ mbəʉ ye. Ŋuu yi a koŋ ngwě ye koŋ gháʼá pə̂ tû-mbəʉ yé.

²⁹ Ńté no ŋuu laa kə́ shə́rə́ ə́ mbǎa ndʉʉ mbəʉ ye; tə ncʉ́ʼ yə́rə́ a zághʼə zěi zághʼə́ ə́ mbou mbápə́, ə́ ndʉŋ-ndʉŋ ghíʼ Kəlísto ghʉ lə̂ cûʼtə pye pé,

³⁰ yi ə́ pə́ mbəʉ ye, paghʼə pə̂ məyʉʼ měi.

³¹ Ə́ ndʉŋ-ndʉŋ ghíʼ pə́ lə ŋwaʼá cər ŋwaʼa Sê ngô: «Ə̂ zə̂u yi ə́ ghʉ̌ ŋuu mbiŋə ghʉ̌ nyér tə́ ye gháp mə́ ye, ə́ wǒ cə́r ngwě ye gháp zʉ́ tə́mtə́ ə́ ncʉ́ʼ tâʼ ŋuu moʼ.»

³² Tâʼ tə́koʼ no lə́nə́ʉ lwo cər nkaŋ ŋwaʼa wêi wo. Məŋ, n ndaʼ ńgó ə no yi ə́ lwǒ lêi, ə̂ ləiʼi yi ə́ nyárə nkoŋə yi pə̌ təcər Kəlísto gháp pə cûʼtə pye pé.

³³ Lə́ no zêi yo kə́ mə́ nâŋtə wéi zéi lə́wó: ə́ pə́ túŋu ńgó warə́ warə́ ŋuu mbiŋə kôŋ ngwě ye ghíʼ a koŋ tû-mbəʉ yé, wǒwó məngyě pôu ŋə́ məkuʼ ndə̂u ye.