Efêzə 4 - Kaa Shwî

Pye-Kəlísto kəitə mbə́ pə́ tâʼ mbəʉ

¹ Məŋ yi məŋ mbə̌ ngaŋə-tsâŋ ńté ńgó mə̂ŋ ngaŋə-faʼ Nde, m mbou mə́ mbûʼ mbó lə́ pei ngô: pei pi Sê lə fúŋ wéi, pei ŋə̂i ghíʼ a lə ghí fúŋ wéi, ə́ mə́ nkôŋ ńgó pei ŋə̂i yə́rə́.

² Pei wó lə̂ zə̂u tsəm, ə́ shúʼú mbəʉ zei ńŋə́ sê, ə́ mbə́ ngaŋə mbwórə, ə́ mbou ngwô shəghʼ-ntə̂ʉ. Ŋuu wei fâa no mbó fə̌r ye, a lâghʼ nkoŋə yi ə́ pə̌ təcər pei, ə́ shə̌ghʼ.

³ Pei sáʼ təʉ lə̂ nkə́ ngwô pə́ tâʼ ntsʉ yi Zəghʼə Ndêi-lěi ghʉ pei ghwô, ə zěi ŋə̂ wéi mbwórə, ə́ mbou ngʉ́ pei ghwô tâʼ ntsʉ təcər pei.

⁴ Ə mbəʉ pə́ pə́ tâʼ moʼ, Zəghʼə Ndêi-lěi kə̂ mbə́ pə́ tâʼ moʼ, ə zə̂u yi Sê lə fúŋ wághʼə lə̂ ntsə́ʉ nzəm Kəlísto ə́ ngʉ́ ngwǒ kə̂ mbə́ pə́ tâʼ moʼ.

⁵ Paghʼə pə́tsəm ghwo pə́ tâʼ Nde moʼ, ə no yi paghʼə pə̂i zěi pə̂ pə́ tâʼ moʼ, mə́i paghʼə pə́tsəm lə pou mpfú nci pə́ lə̂ ləjôghʼ tâʼ ŋuu moʼ;

⁶ Sê pə̌ pə́ tâʼ moʼ, ə́ mbə́ Tə́ pə ŋuu ntsəm, ŋuu ntsəm zûʼ pə́ mbó zʉ́, a laghʼ pye pə́tsəm ńfâʼ faʼ yé, ə́ mbə́ lə́ ŋuu ntsəm.

⁷ Lə́ wǒwó təcər paghʼə ghwo ndʉʉ fuʼ ye; ə́ pə̂ yi Sê lə ŋə́, Kəlísto pfû, ə́ ngaptə́ ə́ ŋə́ yi wǒwó yi ə́ kǔʼ lə́ zʉ́.

⁸ Ə̂ zə̂u yi ə́ ghʉ̌, pə́ ŋwáʼa cər ŋwaʼa Sê ngô: «A lə kóʼ lə̂ tʉ̌-lə́pû, ə́ ngí kóʼ, ə́ ndǎghʼ pəghaŋə-tsâŋ ntso ńdə̂r; ə́ ŋə́ məfuʼ mbə̂u lə̂ mbə̂u mbó pye-mə́soŋ.»

⁹ Pə́ laʼ ngô: «A lə kóʼ lə̂ tʉ̌-lə́pû.» Ə́ ndaʼ yə́rə́, ə́ ndaghʼ ńdâʼ ńgó ho? Ə́ ndaghʼ ńdâʼ ńgó Kəlísto lə yaa shíʼ tə nkə́u kwaʼ tə cʉŋə sê.

¹⁰ Ŋuu yi a lə shíʼ tə nkə́u tə cʉŋə sê lei, ə́ kə́ mbə́ pə́ zʉ́ yi a lə pǒu kóʼ ńdə́r lə̂ tə tʉ̌-lə́pû lə́ pə́ yi zə̂u tsəm cʉ́ʼ zûʼ pə́ mbó zʉ́.

¹¹ Zʉ́ lə́ lə cwǐ fuʼ yi wǒwó ə́ ŋə́: Ə́ ndǎghʼ pəcó pye ńgʉ́ pəghaŋə-ntə̂u pé, ə́ ndǎghʼ pəcó ńgʉ́ pye pi gháp nyâŋ ntsə́tə Nkəʉ Sê, ə́ ndághʼ pəcó ńgʉ́ pətsətə Nkəʉ Shʉʼʉ, ə́ ndághʼ pəcó ńgʉ́ pəpápə́ məndənzʉ Sê, ə́ ndághʼ pəcó ńgʉ́ pəjyéʼ ləpə̌ʉ Sê.

¹² Yo mbə̂u yi a lə lǎghʼ ńgʉ́ pye Sê kuʼ lə̂ fâʼ faʼ yé, ə́ ndaghʼ ńgʉ́ ńgó cûʼtə pye pé pi ə́ pə́ nkáŋ-mbəʉ Kəlísto ghúʼ ńdə́r lə̂ mbi,

¹³ tə paghʼə pə́tsəm cʉ́ʼ ngwô pə́ tâʼ pə̂i-ntə̂ʉ moʼ nzəm Yěso Kəlísto, ə́ mbou nkə́ njí pə́ ndaʼ yé ghíʼ Môu Sê; ə́ ngúʼ tə có zə̂u kə́ mbûŋ yé lə́ paghʼə po, ə́ ndʉŋ-ndʉŋ ghíʼ Yěso kə̌ mbə̂ yé tə kâa có zə̂u púŋ yé lə́ zʉ́ lə̂.

¹⁴ Ə̂ pə́ yə́rə́, lə́u paghʼə kə́ mbyêr wághʼə pətəcʉŋ ghəpə́ po; ə́ pi pye kwaŋtə məno mi káa cwíʼi yé lə̂ tsâr Sê, ə́ ntó ńjyêʼ gháp ə́ ndaghʼ ńfûtə gháp, gháp cʉ̂ʼ ghíʼ kənyúʼ yi mələ̂ʉ nci káa sófərə́ cwôʼ ńcʉ̂ʼ ndəu nci; lə́u pye kə́ mbyér mə́ ndâghʼ gháp píʼí ńfútə wághʼə, paghʼə pə̂i məlaa mi gháp tâŋ měi po.

¹⁵ Lə́ ə́ mbə́ yi paghʼə lə̌i ndághʼ nkoŋə ńdáʼ no lə́nə́ʉ, mə́i paghʼə wo ghúʼ lə̂ məsʉ̂ mə́tsəm tə pə́ ghíʼ Kəlísto yi a pə̌ tû lə̂ nkáŋ-mbəʉ yi ə́ pə́ cûʼtə pye Sê.

¹⁶ Ə́ lei pə́ lə́ zʉ́, məyʉʼ mbəʉ mə́tsəm təmtə mbə̂ tâʼ nkáŋ-mbəʉ. Ə́ ngí təmtə́ yə́rə́, məlʉŋə́ mbəʉ tə nzáa zʉŋtə məyʉʼ mbəʉ lə̂ məcó, zarə́-zarə́ yʉʼ mbəʉ lei tə mə́ fâʼ yé faʼ, ə mbəʉ tsəm nâa ngúʼ, ə́ təitə́ ńté nkoŋə yi ə́ pə̌ təcər páp.

Lənyâŋ pye Kəlísto yi shwî

¹⁷ Ə̂ zə̂u yi ə́ ghʉ̌, m mə̂ ndaghʼ ləjôghʼ Nde ńdâʼ lə́ pei tə ncôghʼ ntə̂ʉ ngô: koo pei kə̂ nyáŋ ghíʼ pye pi káa gháp pə́ njî gháp no Sê; məkwaŋtə máp pou káa pə́ pfûtə yé ŋuu lə̂ có zə̂u.

¹⁸ Ə nzə̌m lə tsághʼə́ mə́ jîno záp, lənyâŋ gháp pôu lə́u mbə̂ yé yi a fǔ mbó Sê po. Lə́u gháp pou mə́ njî gháp laŋə́-ndə̂u Sê po, ńté ńgó məntə̂ʉ máp lə təi mə́.

¹⁹ Kâa sə̂ʉ pyér mə́ nkô yé gháp; gháp lə̌i ncí ngʉ̂ gháp pə̂ məno tə́poŋ, ə́ ngʉ məno coŋ ndwuŋ mbə̂u lə̂ mbə̂u pə́ tə ghwotə́ mbəʉ zap.

²⁰ Lə́ ə́ ngwǒ lə́ pei, mə́i kâa pə̂ yé məzə̂u mi pə́ lə jyéʼ wéi lə̂ no Kəlísto!

²¹ Kwaʼ lə́nə́ʉ, pei lə zûʼ zə̂u tsəm yi ə́ náŋtə́ no yé, pə́ pou ndâghʼ no yi pei pə̌ pye Sê, ə́ njyéʼ wéi no lə́nə́ʉ tsəm yi ə́ pə̂ lə́ Yěso.

²² Ə́ pə̂ yə́rə́, ə́ mə́ ntúŋu ńgó pei mê lə̂ mbə̂u lənyâŋ yi pei lə ghwǒ cǒ mpfu. Pei lə pə́ cǒ mpfu, ə́ ntsâa pə̂ məzə̂u mi ə́ futə wéi ə́ mbou mbə̂ghʼ wéi. Pei mê lə̂ ndwuŋu cǐ yi pei lə ghwǒ cǒ mpfu, ə́ ngwǒ yi shwî; ə́ ndʉŋ-ndʉŋ ghíʼ ŋuu sar ndwuŋu ndǐ ndəu zʉ́ ə́ mêʼ, ə́ mbyê yi shwî mǎʼ lə̂.

²³ Ə́ poŋ ńgó pei pə́i, ə Sê kə́p ntə̂ʉ wéi, ə̂ cʉ́ʼ yi shwî; ə́ mbou nkə́p jîno zéi, ə̂ cʉ̂ʼ yi shwî.

²⁴ Pei shə́rə́ ncʉ́ʼ pye shwî, ə́ ndʉŋ-ndʉŋ ghíʼ ŋuu maʼ ndǐ shwî, ə́ kə́pə yé lə̂. Ŋuu shwî wêi, â yi a wo pə́ ghíʼ Sê pə̌ nkoŋ ńgó ŋuu pə́ yə́rə́: ə no lə́nə́ʉ wo ghʉ̌ â pə́ ndʉŋ-ndʉŋ mbi Sê, ə́ mbou mbə́ ŋuu yi a fǔ ŋə́ mbəʉ ye tsəm mbó Sê.

²⁵ Ə̂ zə̂u yi ə́ ghʉ̌, koo pei kə̂ ntáŋ məlaa! Wǒwó lâʼ no lə́nə́ʉ lə́ fə̌r ye, ńté ńgó paghʼə pə́tsəm naa mbə́ məyʉʼ tâʼ mbəʉ moʼ.

²⁶ Pei lə̌i mə́ nzáŋə́ lóŋ, koo pei ghʉ̂ no tə́poŋ; ə́ nděi tə njî lə̂ nzáŋə́ lóŋ, koo mə́nəu ghi tsó, pei pyêr mə́ nzáŋə́ lóŋ.

²⁷ Koo pei tsôʼ saa tə Sə́tə lêi mə́u, ə́ mǎʼ wéi nzʉ́.

²⁸ Ŋuu yi a lə pə́ njû, nyér lə̂ nkə́ njû; ə́ njǐ lə̂ ndâghʼ mbô mé ńfâʼ, ə́ ngǐ ghwo yé zə̂u, ə́ ngwǒ lə̂ laŋə́-ndə̂u no lə́nə́ʉ, ə́ mpfútə́ ŋuu yi a pə̌ mbúŋ.

²⁹ Koo có tsâr tə́poŋ kwar ntsʉ pei; pei tsâr pə̂ mətsâr shʉʼʉ mi ə́ wo pfútə́ pye lə̂ no yi ə́ yǎa mə́ ngághʼə gháp, ə́ pǒu cóghʼ mətəʉ máp, pei ghʉ̂ yə́rə́ ndaghʼ ńgʉ́ shʉʼʉ lə́ pye pi gháp zûʼ mətsâr méi.

³⁰ Koo pei ghʉ̂ Zəghʼə Ndêi-lěi yi Sê lə cóghʼ lə́ pei záŋə lóŋ; ə́ pə́ ndəu pei, ə́ mbə́ ləiʼi yi ə́ nyárə ńgó leʼé ghʉ̌ kǔʼ, ə Sê tsûʼ wéi, pei cwór.

³¹ Koo pei lóʼo no tə́poŋ yi ŋuu ghʉ̌ lə́ pei, ə́ ntə̂ʉ pei, koo pei cátə mbəʉ zei, koo pei záŋə lóŋ, koo pei kə̂m məlaʼ, koo pei zôutə pye, pei pə́ghʼ no tə́poŋ lə̂ məsʉ̂ mə́tsəm təcər pei.

³² Pei ghwô ntə̂ʉ shʉʼʉ təcər pei, ə́ ngwǒ tsâa-mə́jʉ̂ŋ təcər pei; ŋuu lyə́ghʼə́ məfaa fə̌r yé, â kə́ ndyə́ghʼə yé ye lə́wó, ə́ ndʉŋ-ndʉŋ ghíʼ Sê lə lěi lə́ Kəlísto ə́ ndyə́ghʼə́ məfaa wei.