Efêzə 3 - Kaa Shwî

Ə faʼ yi Pôl ghwǒ lə̂ fâʼ ńté pye pi káa gháp pə̂ gháp pəyúda

¹ Ə̂ zə̂u yi ə́ ghʉ̌, məŋ Pôl, yi m mbə̌ ndə̂ tsâŋ ńté no n nkə lâʼ no Yěso Kəlísto mbó pei pi káa pei pə̂ wéi pəyúda; m mbə̂ mpfu tsəm, ə́ mə́ sʉ̂ʉtə Sê ńté wéi.

² Pei fu mə́ nzúʼ faʼ yi Sê lə lǎghʼ poŋə-ntə̂ʉ yé ńcóghʼ mbó məŋ ghíʼ n ngwo fǎʼ zěi ńté wéi, pei zʉ́ pəi zěi.

³ Məno mi Sê lə tághʼ lə̂ ntáa ngʉ́ lə pə́ ləlwǒ, a ŋéʼe nyôghʼ mâa n njwô měi ghíʼ n ntə̌i fú ngěi, ə́ ŋwáʼá měi ə́ mə́ ndâʼ wéi, lə́ káa ŋwaʼa ghâa ə̂ sâghʼ lə̂.

⁴ Pei wo fúŋ měi, ə́ fú mə́u zúʼ mbə̂u yi n ndǎghʼ ńjí no yi ə́ lə pə́ ləlwǒ lə̂ no Kəlísto.

⁵ Ə́ lə pə́ cǒ mpfu, káa Sê kêʼ yé no zêi yi ə́ lə pə́ ləlwǒ lêi mbó pye-mə́soŋ, lə́ Sê pou mbə́ mpfu wo, ə́ ndǎghʼ Zəghʼə Ndêi-lěi yé ńgʉ́ pəghaŋə-ntə̂u pé jî, mbaa ngʉ́ pye pi gháp nyâŋ ntsə́tə nkəʉ Sê kə̂ njî záp lə́wó.

⁶ Ə no yi ə́ lə pə́ ləlwǒ lêi pə́ ngô: ə́ wo leitə́ lə̂ Nkəʉ Shʉʼʉ, pye pi káa gháp pə̂ gháp pəyúda gháp pə pəyúda nâa ngwǒ məfuʼ mi Sê lə tsuŋtə́ ə́ ntághʼ, ə́ mə́ ndághʼ ńzʉ̂ʼtə pye pé. Gháp pêi pə́tsəm naa mbə́ məyʉʼ tâʼ mbəʉ moʼ, ə́ nkə́ ngwô záp zə̂u lə̂ məzə̂u mi Sê lə ghʉ̌ ndaʼá mə́u lə̂ ngʉ́ ŋə́ ńgó pye-mə́soŋ ghʉ̌ leitə́ lə́ Yěso Kəlísto, ə́ ghwǒ.

⁷ N ngí cʉ́ʼ ngaŋə-faʼ lə̂ Nkəʉ Shʉʼʉ, ə Sê lêitə lə̂ poŋə-ntə̂ʉ yé yi tə́ ndaghʼə ə́ ŋə́ zei fuʼ lə́ məŋ. A lə lâghʼ pə̂ mətəʉ mé ńgʉ́ yə́rə́.

⁸ M mbə́ təcər pəpə́i-no Sê, káa pə́ ghâa có zə̂u; lə́ pou mbə́ gháʼá, mə́i Sê lə ŋə́ zei yo fuʼ tə́ láʼ mé lə́ məŋ ńgó n ndáʼ pye pi káa gháp pə́ gháp pəyúda ndwuŋ yi məfuʼ mi ŋuu lei nzəm Yěso Kəlísto ngwô lǎghʼ nzáa.

⁹ Mbaa ghíʼ n ngwo ghʉ̌ pye-mə́soŋ pə́tsəm sâa-sǎa njí mbə̂u yi Sê wo ghʉ̌ ə́ pə jí məno mi ə́ lə pə́ ləlwǒ. Zʉ́ yi a lə tsuŋú zə̂u tsəm, a lə fú lənuŋú ngoŋ ə́ ntághʼ məno mêi, lə́ ə́ ndoʼó měi pə́ ləlwǒ,

¹⁰ ńjí ńgó, pətə́-ndə̂ məzəghʼə mi ə́ pə́ tʉ̌-lə́pû mbaa mətəʉ mə́tsəm mi ə́ pə́ tʉ̌-lə́pû ghí tə́ʉ mpfu wo, ə́ ndéitə́ lə̂ cûʼtə pye Kəlísto ə́ njí mbə̂u yi Sê lǎghʼ ńjí no lə̂ məsʉ̂ mə́tsəm.

¹¹ Sê lə ghʉ yə́rə́, ə́ laghʼ ḿbə̂utə lə́ no yi a lə tághʼ lə̂ ngʉ́ tə mbyér pə́ tə tsúŋú ngoŋ; ńgó a ghʉ̌ leitə́ lə́ Nde waghʼə Yěso Kəlísto ə́ ghʉ̌ zêi zə̂u.

¹² Ə́ leitə́ lə̂ mbə̂u yi paghʼə lǎghʼ ńdǎr mbəʉ zághʼə lə́ Kəlísto, mbaa mbə̂u yi paghʼə lǎghʼ ńgwǒ pə̂i-ntə̂ʉ nzəm zʉ́, laŋə́-ndə̂u tsóʼó mbi paghʼə lə̂ ndə́r tə ntə́ʉ mbi Sê, tə́ pôghʼ có zə̂u.

¹³ Ə́ pə̂ yə́rə́, m mə̂ ndâʼ lə́ pei ńgó koo pei jwô ngwôʼ yi n njwô ńtê tû zéi lo, ə́ nkáa. Ə ngwôʼ yi n njwô zěi ŋáʼa pə̂ ndwuŋ wéi.

Ə nkoŋə yi Kəlísto ghwǒ nzəm pye-mə́soŋ

¹⁴ Ə̂ zə̂u yi ə́ ghʉ̌, n shîʼ ńkʉ́ʼtə́ mbi Tǎa Sê,

¹⁵ ə́ zʉ́ yi məcʉŋə-ndə̂ mə́tsəm mi ə́ pə́ tʉ̌-lə́pû mbaa ndəu ndesé ghí pə́ wó ə́ ndwúʼu pə́ yé.

¹⁶ M mə̌ sʉ̂ʉtə yé ńgó a lâghʼ ghíʼ ləghûʼ yé pə̌ tə́ fəiʼi zěi wó lə̂, ə́ mbə́i ə́ mbou ngʉ́ ńgó mətəʉ mi ə́ fû lə̂ Zəghʼə yé, ə̂ ŋə́ wéi mətəʉ ńjí ńgó məntə̂ʉ méi tsuŋú ntəitə́.

¹⁷ Ə́ mbou mə́ sʉ̂ʉtə yé ńgó a ghʉ̂ ńgó Kəlísto lêitə́ lə́ ghíʼ pei pə̌i no yé lə̂, ə́ nyáŋ məntə̂ʉ pei. N nkə̌ ncí mə́ sʉ̂ʉtə yé ńgó a ghʉ̂ pei kôŋ Sê, ə́ mbou ngwô nkoŋə təcər pei, ə̂ lêi yə́rə́, pei tə́ʉ ntə̂i ghíʼ tʉ̌ yi məŋaŋə měi kə́u kwaʼ tə sê, mbaa ghíʼ ndə̂ yi cû zěi kə́u sê kwaʼ shʉʼʉ,

¹⁸ ńjí ńgó pei pə pye Sê naatə, ə́ nkǔʼ lə̂ nzúʼ mbə̂u yi nkoŋə yi Kəlísto ghwǒ nzəm pye-mə́soŋ lǎghʼ ńshaghʼə́; ə́ sǎghʼ; ə́ nkóʼ ńgwó tʉ́; ə́ mbou shîi ńkə́u sê.

¹⁹ Ə́ mbou njí mbə̂u yi nkoŋə yi Kəlísto ghwǒ nzəm pye-mə́soŋ lǎghʼ nděi maa jîno tsəm. Ə̂ lêi yə́rə́, zə̂u tsəm yi ə́ pə́ ntə̂ʉ Tǎa Sê kə́ mbə́ yé ntə̂ʉ pei tə lə́u có zə̂u pûŋ yé mə́u po.

²⁰ Sê pə̌ ndaghʼ mətəʉ mé fâʼ cər məntə̂ʉ paghʼə. A kuʼ lə̂ ŋə́ wághʼə zə̂u tə ə́ lei ndwuŋ yi paghʼə yǎa ndóu yé. Mətəʉ mé lei maa jîno tsəm.

²¹ Ləghûʼ pə́ mbó zʉ́ cər cûʼtə pye Kəlísto ə́ ndêitə́ lə́ Yěso Kəlísto lə̂ mənguʼ mənguʼ! Ámeŋ.