Efêzə 2 - Kaa Shwî

Sê leitə́ lə́ Kəlísto ńŋə́ ləcwôr

¹ Pei lə pə́ cǒ mpfu, ə́ mbə́ mbó Sê ə́ mbə́ pə̂ pəpfû, ńté ghíʼ pei lə pə́ ngaŋə-məfaa, ə́ mbə́ pəghʉ̌ məno tə́poŋ.

² Pei lə pə́ mpfu wêi, ə́ ngʉ̂ pə̂ məno tə́poŋ, pei lə ŋəi pə́ ghíʼ pye nzʉ̂ yo ŋəi, ə́ nzûʼ pə̂ ntsʉ fou məzəghʼə tə́poŋ yi a sâʼ məzəghʼə tə́poŋ mi ə́ pə́ tʉ́ cər fwôghʼ, zʉ́ yi a pə̌ mpfu wo, ə́ mbə́ zəghʼə tə́poŋ yi ə́ pə́ cər məntə̂ʉ pye pi gháp lə̂ʼ lə̂ nzúʼ ntsʉ Sê; ə́ mə́ ncʉ́ŋə gháp, gháp ghʉ məno tə́poŋ.

³ Paghʼə pə́tsəm, paghʼə lə kə́ mbə̂ zághʼə pə́ ghíʼ páp, paghʼə lə ghʉ pə̂ məzə̂u mi məmbəʉ mághʼə cʉ́ŋə wághʼə lə̂ ngʉ́. Paghʼə lə ghʉ məzə̂u mi mbəʉ zaghʼə gháp pə məkwaŋtə tə́poŋ mághʼə cʉ́ŋə wághʼə lə̂ ngʉ́ měi. Ə́ laghʼ ḿbə́ ńgó pə́ lə jí wághʼə, paghʼə pə̂ pye pi Sê pə̂ mpfu tsəm mə́ nzáŋə́ lóŋ lə́ páp ghíʼ a záŋə-lóŋ lə́ pəcó pye.

⁴ Lə́, ə Sê ghwo tsâa-mə́jʉ̂ŋ nzəm pye-mə́soŋ gháʼate; ə́ ngwo yə́rə́, ńté mbə̂u yi a lə lǎghʼ nkôŋ wághʼə,

⁵ ə́ ngʉ́ ńgó paghʼə pə Kəlísto kə́ ncí mbə́ wó; tə mbaa ghíʼ paghʼə lə pə̂ cǒ mpfu ə́ mbə́ mbi Sê, ə́ mbə́ pəpfû ńté məno tə́poŋ mághʼə. A lâghʼ poŋə-ntə̂ʉ yé yi tə́ ndaghʼə, ə́ ngʉ́ paghʼə cwôr.

⁶ Paghʼə pə Yěso Kəlísto lə təmtə ńcʉ́ʼ tâʼ, Sê ghʉ̂ paghʼə pə pǎp naa nzʉ́ʉ lə̂ ləwʉ̂, ə́ nǎa nkóʼ lə̂ tʉ̌-lə́pû, ə́ nyáŋ wó; ə́ ncʉ́ʼ mə́ sâʼ zə̂u tsəm yi ə́ pə́ wó.

⁷ Ə́ pə̂ yə́rə́, Sê ghi pə́ nyarə poŋə-ntə̂ʉ yé ńtê wághʼə nzəm Yěso Kəlísto, ə́ mə̂ ndôu ńgó pye-mə́soŋ lə̂ məwěi məwěi jwó mbə̂u yi poŋə-ntə̂ʉ yé yi tə́ ndaghʼə lǎghʼ ńgúʼ.

⁸ Ńté ńgó pei lə leitə́ pə́ lə̂ poŋə-ntə̂ʉ Sê yi tə́ ndaghʼə ə́ ngwǒ ləcwôr, ńté ghíʼ pei ghwǒ pə̂i-ntə̂ʉ nzəm Kəlísto. Ləcwôr wêi kâa lə fû yé mbó pei, ə́ pə́ pə̂ fuʼ yi Sê lə ŋə́ lə́ pei.

⁹ Káa kə́ fû yé lə̂ có faʼ yi pei fǎʼ zěi; ə́ laghʼ ḿbə́ ńgó mboʼ cǒ ŋuu lâghʼ yé wěi ńŋáʼtə́ po.

¹⁰ Ńté ńgó paghʼə məzə̂u mi a lə tsuŋú. Sê lə leitə́ lə́ Yěso Kəlísto, ə́ ntsúŋú wághʼə ńté məfaʼ shʉʼʉ mi a lə záʼ nzʉ̂ ntsúŋtə́ ghíʼ paghʼə wo fǎʼ měi.

Pye pə́tsəm leitə́ nzəm Yěso Kəlísto ə́ ncʉ́ʼ tâʼ ŋuu

¹¹ Pei kʉ́ʉtə́ zə̂u yi pei lə pə́ zěi cǒ mpfu! Káa pei pə̂ wéi pəyúda tə fú leʼé lə́jí; pəyúda pi pə́ lə púʼ gháp, gháp pə̂ ndâʼ ńgó gháp pye Sê, ə́ mə́ ntyê wéi ńgó káa pə lə pûʼ yé wéi, ə́ ndaghʼ ńdâʼ ńgó káa pei pə̂ wéi pye Sê, lə́ ə mbúʼ gháp zêi pə̂ pə́ ləiʼi yi pə́ lə lǎghʼ pô ńcóghʼ lə̂ có yʉʼ mbəʉ záp.

¹² Pei kə́ ncí nkʉ́ʉtə́ ńgó pei lə pə́ mpfu wêi, káa pə́ jî wéi ŋuu yi pə́ fûŋ yé ńgó Kəlísto; pye Ísə́lahêl jwô wéi pə́ ghíʼ pəghəʉ; pei pə̂ mbó páp, káa pə̂ wéi pye Sê; káa ghwo wéi no lə̂ məzə̂u mi Sê lə ghʉ̌ ndaʼá lə̂ ngʉ́ ńŋə́ lə́ pye pi gháp pə pǎp lə wǎr kaa; pei lə pə́ cər nzʉ̂, káa pə́ zʉ̂ʼtə wéi có zə̂u mbó Sê, káa kə́ pə́ jî wéi yé.

¹³ Pei lə pə̂ cǒ mpfu, ə́ mbə́ ndǐ təsə lə̂ Sê, lə́ ə́ pou ngǐ tə́ʉ mpfu wo, mə́i Sê ghʉ mə́ pei cʉ́ŋə tə mbáatə́ yé, ńté ghíʼ pei lǎr mbəʉ zéi lə́ Yěso Kəlísto, lə́ zʉ́ yi a lə cwə̌r məci mé ńté tû zéi.

¹⁴ Ńté no Kəlísto, zʉ́ tû-mbəʉ yé lə́ lə ŋə́ wághʼə mbwórə, ə́ ngʉ̌ pye pi gháp pə́ pəyúda gháp pə pye pi káa gháp pə́ gháp pəyúda təmtə ńcʉ́ʼ tâʼ ŋuu. A lə ŋə̂ tû yé ə́ ndaghʼ ḿvóghʼ tâa-nkâʼ yi a lə maʼ ngaptə təcər páp, ə́ ngʉ gháp cʉ̂ʼ pəghaŋə mbəu.

¹⁵ A lə pə̂ghʼ ləpə̌ʉ pəyúda yi ə́ laʼ ngô: ghʉ̌ yo, ghʉ̌ yi mboŋə́ pə́ ŋuu Sê. A lə ghʉ yə́rə́ lə́ pə́ yi pye pi gháp pə́ pəyúda gháp pə pye pi káa gháp pə̂ gháp pəyúda wo lǎghʼ ghíʼ gháp pə́i no Yěso Kəlísto, ə́ ncʉ́ʼ tâʼ lâʼ yi shwî. Ə̂ ghíʼ a lə ghʉ̌, ə́ ndághʼ ńcóghʼ mbwórə təcər páp.

¹⁶ Kəlísto lə laghʼ ləwʉ̂ yi a lə kwʉ́ wěi lə̂ tʉ̌-mbʉ̂ŋtə, ə́ ntə́mtə́ gháp, gháp cʉ̂ʼ tâʼ ŋuu moʼ, a myâghʼ sǎʼ yi ə́ lə pə́ təcər páp pə Sê; a lə ghʉ kəpaa tsəm mê.

¹⁷ Ə́ laghʼ ḿbə́ ńgó Kəlísto lə tô lə̂ ntsə́tə́ Nkəʉ Shʉʼʉ yi ŋə̂ mbwórə mbó pei pi gháp lə pə́ ndǐ təsə, mbaa mbó pye pi gháp lə nyáŋ mbáatə́ Sê.

¹⁸ Ńté no ə́ leitə́ pə́ lə́ Kəlísto, pəyúda gháp pə pye pi káa gháp pə̂ gháp pəyúda kuʼ lə̂ ndə̂r tə ntə́ʉ mbi Sê, ńté tâʼ Zəghʼə moʼ yi a lə kə́u ndəu páp, ə́ mbə́ Zəghʼə Ndêi-lěi.

¹⁹ Ghíʼ ə́ kə́ mbə́ yə́rə́ lə̂, pə́ kə́ fûŋ yé wéi ńgó pəghəʉ, kəʉ ńgó məkhʉ-lâʼ po; pei pə pye Sê cʉ́ʼ nâa mbə́ pə́ pye tâʼ lâʼ, pei ghwo zéi yʉʼ cər cʉŋə-ndə̂ Sê.

²⁰ Pêi cʉ̌ʼ mbə́ ghíʼ mbələ̂ghʼ yi pə́ lǎʼ mbóu ndə̂, pəghaŋə-ntə̂u Yěso Kəlísto gháp pə pətsətə́-nkəʉ Sê pə̂ cû zěi. Yěso Kəlísto zʉ́ tû-mbəʉ yé pə̂ ləghǒ yi pyěʼ ndə̂ tsəm.

²¹ Zʉ́ lə́ ghʉ məsaghʼə́ ndə̂ mə́tsəm təitə, ə́ nkóʼ ńkə̂u tʉ́, ə́ ncʉ́ʼ mbə́ ndə̂ yi Sê nyâŋ cər wó.

²² Ə́ leitə́ ghíʼ pei pə Kəlísto təmtə́ ncʉ́ʼ tâʼ, pei poŋə́ pə̂ zéi mbələ̂ghʼ yi pə́ lǎghʼ mbóu məsaghʼə́ ndə̂ zêi. Pei pə pəcó pye cʉ́ʼ nâatə́ mbə́ ndə̂ zêi yi Sê laghʼ Zəghʼə yé ńcî cər wó.