Romafɔ 4 - Bulu Ntam Pɔpwɛ mʋ́a Israel Ɩlʋ

Abraham Ɩwɩ Asʋn Lasuna Alɩá Hogyi Bʋ Labi

¹ Sei a, amansʋ anɩ Yudafɔ abɛ́blɩ tsu anɩ nain Abraham ɩwɩ? Ntɔ olowun tsu Bulu ahahɔ asʋn anfɩ ɩwɩ?

² Nɩ yilebwɛ sʋ Abraham legyi asʋ Bulu ansɩtɔ a, mʋmʋ ɔbʋ tɔá ɔbɔ́pʋtsu ɩwɩ, tamɛ megyi Bulu ansɩtɔ.

³ Nkalɩ Bulu asʋn wanlɩnhɛ amʋ lɛblɩ? Ɩlɛblɩ ɔbɛɛ, “Abraham lɔhɔ Bulu gyi. Mʋ́ sʋ Bulu lotsu mʋá mʋ asʋn da ɔkpa.”

⁴ Nɩ ɔkʋ ɔyɔ agyʋma a, bʋtɛka mʋ ɩkɔ. Megyi atokiehɛ ɩkɔka amʋ gyi. Igyi tɔá ilehian ánɩ́ obénya tsu mʋ agyʋma yɔtɔ.

⁵ Tamɛ megyi aha bwɛhɛ sʋ, mboun amʋ́ hogyi sʋ Bulu totsu amʋ́ ánɩ́ amʋ́ asʋn da ɔkpa. Tsufɛ Bulu tɛha lakpan abwɛpʋá bɔhɔ mʋ gyi bʋtegyi asʋ mʋ ansɩtɔ.

⁶ Owie Dawid lɛblɩ oyula asʋn anfɩ kɛn dodo. Ɔlɔtɔɩ tsu aha ánɩ́ Bulu mɛkɩ amʋ́ bwɛhɛ asa olotsu amʋ́ ánɩ́ amʋ́ asʋn da ɔkpa ɩwɩ. Ɔlɔwanlɩn mʋ́ wa Bulu asʋn amʋtɔ ɔbɛɛ,

⁷ “Bulu layula aha ánɩ́ alasi amʋ́ lakpan kie amʋ́, alagyʋra amʋ́!

⁸ Aha amʋʋ Bulu lasi amʋ́ lakpan kie amʋ́, ɔmɛ́ɛtra kaɩn mʋ́sʋ amʋ bégyi ɔdwɛ!”

⁹ Kete atɩnpʋ nkʋlɛ bʋ ɔdwɛgyi anfɩ Owie Dawid dɛ mʋ́ ɩwɩ asʋn blɩ anfɩ? O-o! Aha amʋʋ bʋmɛtɩn kete amʋ ɛ bʋbʋ mʋ́tɔ. Kaɩn ánɩ́ anɩlakla asʋankʋ Bulu asʋn wanlɩnhɛ amʋtɔ. Anɩaa, “Abraham lɔhɔ Bulu gyi. Mʋ́ sʋ Bulu lotsu mʋá mʋ asʋn da ɔkpa.”

¹⁰ Brɛ mɔmʋ Bulu lotsu mʋá mʋ asʋn da ɔkpa? Ɔlɛtɩn kete asa loo? Ɛkɛkɛɛkɛ! Bulu lotsu mʋá mʋ asʋn da ɔkpa dodoodo.

¹¹ Ɔma-ɔma asa ɔlɛbɛtɩn kete pʋhɩɛ mʋ nsʋ. Ilosuna ánɩ́ mʋ hogyi sʋ Bulu lotsu mʋ ánɩ́ mʋ asʋn da ɔkpa. Ɩnɩ sʋ ogyi fɛ aha amʋʋ bʋmɛtɩn kete, tamɛ bɔhɔ Bulu gyi, Bulu lotsu amʋ́ ánɩ́ amʋ́ asʋn da ɔkpa amʋ. Mʋ́ sʋ ogyi amʋ́ fɛ́ɛ́ ɔsɩ nɩ.

¹² Ogyi kete atɩnpʋ amʋ ɛ ɔsɩ. Tsufɛ megyi amʋ́ ketetɩn sʋ, mboun amʋ́ Bulu-hogyi sʋ. Fɛ alɩ amʋʋ Abraham lɔhɔ Bulu gyi asa bɛtɩn mʋ kete amʋ.

Tɔá Bulu Lɛhɩɛ Yaɩ Mʋ Ahogyipʋ

¹³ Bulu lɛhɩɛ Abraham mʋa mʋ abi-aná ánɩ́ ɔyɩtɔ fɛ́ɛ́ ɩbɔ́bwɛ amʋ́ klɛ. Megyi bɛɛ Abraham legyi Mose mblasʋ, sʋ Bulu lɛblɩ asʋn anfɩ. Tamɛ ɩnɩá ɔlɔhɔ Bulu gyi, Bulu ɛ lotsu mʋá mʋ asʋn da ɔkpa mʋ ansɩtɔ sʋ.

¹⁴ Nɩ aha ánɩ́ bʋdɛ Mose Mbla amʋtɔ obégyi Bulu atɔ a, mʋmʋ ɔha Bulu hogyi igyi kpaalɩ. Bulu nhɩhɩɛ ha ɔha ɛ ɩma labi kʋkʋ.

¹⁵ Tsufɛ Bulu ɔblɔ mbla amʋ tɛtɩ. Tamɛ nɩ mbla má ɩnʋ a, mblatʋn ɛ ɩma ɩnʋ.

¹⁶ Mʋ́ alɩ sʋ ɩna hogyisʋ aha bɛ́talɩ nya atɔá Bulu lɛhɩɛ yaɩ ha amʋ́. Atokiehɛ amʋʋ ɔbɔ́pʋha Abraham abi-aná amʋ ɩbɛ́da amʋ́ ɩbɩ. Megyi aha ánɩ́ bʋtegyi mblasʋ nkʋlɛ bʋ, tamɛ aha ánɩ́ bɔhɔ Bulu gyi fɛ Abraham ɛ. Tsufɛ Abraham gyi anɩ fɛ́ɛ́ ɔsɩ.

¹⁷ Fɛ alɩ amʋʋ Bulu asʋn wanlɩnhɛ amʋ ɩlɛblɩ ɔbɛɛ, “Napʋ fʋ bwɛ ɔmá tsɔtsɔɔtsɔ ɔsɩ amʋ. Abraham gyi anɩ fɛ́ɛ́ ɔsɩ Bulu ansɩtɔ.” Tsufɛ olohogyiá Bulu tɛha awupʋ nkpa, ɔtɛha tɔá ɩma ɩnʋ yaɩ ɩtɛba mʋ́tɔ fɛ tɔá ɩbʋ ɩnʋ yaɩ.

¹⁸ Brɛá tɔtɔ ma ɩnʋá Abraham ɔbɔ́pʋ mʋ ansɩ dɩnka mʋ́sʋ a, ɔlɔhɔ Bulu gyi ánɩ́ ɔbɔ́bwɛ mʋ ɔmá tsɔtsɔɔtsɔ ɔsɩ alɩ amʋʋ ɔlɛblɩ yaɩ amʋ. Bulu lɛbla mʋ ɔbɛɛ, “Fʋ abi-aná bɛ́klɛɩ fɛ ntsrakpabi.”

¹⁹ Alɩ brɛ amʋtɔ a, Abraham lahɔ nfi lafakʋlɛ (100). Mʋ́ sʋ aladan tsʋn kwɩɩsʋ. Alɩ kɛn mʋ ka Sara ɛ ɔkwɩɩpuni lawu, ɔmɛ́ɛtra kwɩɩ nɩ. Oyin ɩnɩ fɛ́ɛ́, tamɛ ɔmɛkpa mʋ hogyi ɔma.

²⁰ Ɩnɩ fɛ́ɛ́ ɔma a, omegyi nwɛn ɔbɛɛ, ɩtɔ amʋʋ Bulu lɛhɩɛ mʋ amʋ ɩmɛ́ɛba mʋ́tɔ. Mboun ɔlɛkɩta mʋ hogyitɔ kinkiinkin, ɔlɛkanfʋ Bulu mʋ́ sʋ.

²¹ Tsufɛ ɔhɩɛ oyin ánɩ́ Bulu ɔbɛ́talɩ bwɛ ɩtɔ amʋʋ alahɩɛ ha mʋ amʋ.

²² Mʋ hogyi anfɩ sʋ Bulu lotsu mʋá mʋ asʋn da ɔkpa nɩ.

²³ Megyi mʋ nkʋlɛ sʋ bɔwanlɩn wa Bulu asʋn amʋtɔ bɛɛ, “Bulu lotsu mʋá mʋ asʋn da ɔkpa.”

²⁴ Anɩ ɛ anɩ sʋ bɔwanlɩn mʋ́. Nɩ anɩlɔhɔ Bulu gyi a, obótsu anɩ ánɩ́ anɩ asʋn da ɔkpa. Mʋgyi ɔha ánɩ́ ɔlɔkʋsʋa anɩ Wie Yesu tsu afulitɔ.

²⁵ Anɩ lakpan sʋ Bulu lɛha bɛlɛ mʋ ha bɔmɔ mʋ. Bulu lɔkʋsʋa mʋ tsu afulitɔ, mɛnɩ obótsu anɩ ɛ ánɩ́ anɩ asʋn da ɔkpa.