Israelfɔ Ɩlʋ 8 - Bulu Ntam Pɔpwɛ mʋ́a Israel Ɩlʋ

Nana Bulu Ɩda Lɔkʋkʋ Moni

Dawid kanfʋ-ɩlʋ ha ɩlʋ osunapʋ. Bɔ́pʋ Gatfɔ ɔmɛ wa mʋ́.

¹ Oo anɩ Wie Nana Bulu, fʋ ɩda lɔkʋkʋ moni ɔyɩtɔ o! Fʋ numnyam lɔfʋa dafa nwʋlʋta.

² Fasuna nyebi mʋ́a abi bɔbwɛ alɩá bʋkanfʋ fʋ. Ɩlaha fʋ alupʋ bawun fʋ ɔwʋnlɩn. Mʋ́ sʋ amʋ́a aha ánɩ́ bʋtamasi ɩla kie bakpa ɔnɔ bun.

³ Nɩ notsu ansɩ kɩ ɔsʋsʋ, fʋ ɩbɩ ɔnɔ atɔ bwɛhɛ, ɔtsra mʋ́a ntsrakpabiá fɔbwɛ dɩnka nwʋlʋtasʋ a,

⁴ ntɛfɩtɛ mɩ ɩwɩ mbɛɛ, “Ntɔ nyankpʋsa lɔkʋkʋ ogyi, sʋ fʋtɔgywɩɩn mʋ ɩwɩ alɩ? Ntɔ nyankpʋsa gyi, sʋ fʋtɛkɩ mʋsʋ?”

⁵ Fɛba mʋ asɩ dʋn fʋ abɔpʋ. Fɔpʋ numnyam pʋ́ obú dɩnka mʋsʋ.

⁶ Fɔbwɛ mʋ fʋ ɩbɩ ɔnɔ atɔ bwɛhɛ fɛ́ɛ́sʋ ogyipʋ, fɔpʋ togyitɔ wa mʋ asɩ.

⁷ Akufa, nnantswie pʋ́ pututɔ-mbwɩ fɛ́ɛ́;

⁸ mbubwi mʋ́a ntsutso-aye pʋ́ ntobiá bʋna ɔpʋtɔ fɛ́ɛ́.

⁹ Oo anɩ Wie Nana Bulu, fʋ ɩda lɔkʋkʋ moni ɔyɩtɔ o!