Israelfɔ Ɩlʋ 7 - Bulu Ntam Pɔpwɛ mʋ́a Israel Ɩlʋ

Nana Bulu Gyi Aha Fɛ́ɛ́ Asʋn Ogyipʋ

Benyaminyin Kus ɩwɩ awɩrɛhɔ-ɩlʋá Dawid lɔwa ha Nana Bulu.

¹ Oo Nana Bulu, mɩ Bulu, fʋ nasrɩ tanʋ. Hɔ mɩ, afʋlɛ mɩ tsu aha ánɩ́ bʋdɩn mɩsʋ fɛ́ɛ́ ɩbɩtɔ.

² Nɩ megyi alɩ bɛ́kɩta mɩ, tɩtɩ mɩ fɛ gyata; mma ɔhɔpʋ.

³ Oo Nana Bulu, mɩ Bulu, nɩ nawa ɩbɩ lalahɛtɔ,

⁴ nɩ napʋ lalahɛ ka mɩ ba kɔ, ntɛ nasisi mɩ olupʋ kʋkʋ kpalɩ. Nɩ napʋ ɩnɩtɔ ɩkʋ gyi ɔkʋ fiin.

⁵ Mʋmʋ ha mɩ alupʋ abʋdɩnka mɩsʋ, abʋnya mɩ. Bʋtsatsa mɩsʋ, abʋsʋpa mɩ fuli. Ɩya.

⁶ Nana Bulu, pʋ ɔblɔ kʋsʋ lɩɩ. Mɩ Bulu kʋsʋ, mɩ alupʋ bawa ɩyɩn. Fʋlɔpʋ asʋngyi ba.

⁷ Ha ɔmá-ɔmá abʋbefia fʋ ansɩtɔ, afʋtsia fʋ owie-obiasʋ ɔsʋsʋ gyi amʋ́ asʋn.

⁸ Nana Bulu, fʋgyi ɔyɩtɔ aha fɛ́ɛ́ asʋn ogyipʋ. Oo Nana Bulu, gyi ha mɩ, tsufɛ mɩ asʋn da ɔkpa. Ɔlala ɩma mɩ ɩwɩ.

⁹ Bulu, ɔnɔkwalɩpʋ fʋgyi. Fʋtɛkali anɩ agywɩɩn pʋ́ anɩ ɩklʋntɔ asʋn. Ka lalahɛ abwɛpʋ tin, afʋha yile abwɛpʋ abʋlɩɩ.

¹⁰ Bulu legyi ɩban wa mɩ. Mʋtɔhɔ aha ánɩ́ amʋ́ asʋn da ɔkpa.

¹¹ Asʋn ogyipʋ ɔnɔkwalɩpʋ Bulu gyi. Ɔtɛlɛ mʋ ɔblɔ suna ekekegyiɛkɛ.

¹² Nɩ bʋmɛtsɛ amʋ́ itsiatɔ a, ɔbɛ́ya mʋ ɔdayi. Alabɩtɩ mʋ ɔbɩn dodo.

¹³ Alakʋla mʋ akɔtɔ akinkin tsan, nɩna mʋ mbɩn pɩɔn-pɩɔn.

¹⁴ Kɩ alɩá banya lalahɛ ɔmɛ́. Lakpan ɔmɛ́ ɩdɛ amʋ́ dwiin. Bɔ́kwɩɩ afunu.

¹⁵ Bʋtokwi ɔbɔ, loti mʋ́tɔ klukluuklu, amʋ́ onuto bʋtɛkpa wie mʋ́tɔ.

¹⁶ Amʋ́ onuto lalahɛ teyinki ba amʋ́sʋ. Amʋ́ owuntɔlɩn teyinki bobun amʋ́ nwunsʋ.

¹⁷ Nɛ́da Nana Bulu ɩpan mʋ ɔnɔkwalɩwa sʋ. Nɔ́wa ɩlʋ kanfʋ Nana Bulu, Ɔsʋsʋʋsʋ mʋ Wie ɩda.