Israelfɔ Ɩlʋ 6 - Bulu Ntam Pɔpwɛ mʋ́a Israel Ɩlʋ

Nana Bulu, Damli Kɩ Mɩ Afʋtsa Mɩ Ɩlɔ

Dawid kanfʋ-ɩlʋ ha ɩlʋ osunapʋ. Bɔ́pʋ ɔsankuo ɔmɛ ikwesɩ da mʋ́.

¹ Oo Nana Bulu, máwa ɩyɩn wa mɩ ɔblɔsʋ. Mákʋla ɔblɔ bɩtɩ mɩ ɩsʋ!

² Nahɩɛ pɔn, sʋ wun mɩ nwɛ. Awútɔ dɛ mɩ dwiindwiin, lawa mɩ ɔwʋnlɩn.

³ Oo Nana Bulu, ifu dɛ mɩ ɔkla. Máha mʋ́ ɩwa ɔpá asa afʋtsa mɩ ɩlɔ.

⁴ Nana Bulu, damli kɩ mɩ afʋhɔ mɩ nkpa. Fʋ ɔdwɛ ma ɔka. Mʋ́ sʋ lɛ mɩ tsu lowutɔ.

⁵ Tsufɛ ɔha owu a, ɔtamatra kaɩn fʋsʋ. Ma ɔbɛ́talɩ kanfʋ fʋ afulitɔ?

⁶ Ahʋmɩtɩ dɛ mɩ mɔ. Onyegyionye nɛklɛdɩ ntosu, fɔ mɩ sumuɛ mɩɔn-mɩɔn-mɩɔn.

⁷ Mɩ alupʋ baha nasu alɩɩ, mɩ ansibi lapunya tin. Mmɛdɛ atɔ wun.

⁸ Lalahɛ abwɛpʋ, mlɩnatɩ tɛɩ mɩsʋ, tsufɛ Nana Bulu lanu mɩ isu.

⁹ Alanu mɩ isu, ɔbɔ́sɔ mɩ ɔnɔ.

¹⁰ Pɛlɩ bɛ́kɩta mɩ alupʋ fɛ́ɛ́, ifu bɛ́kɩta amʋ́. Bɔ́pʋ nsʋpa yinki ɔma ɔsasʋ.