Israelfɔ Ɩlʋ 4 - Bulu Ntam Pɔpwɛ mʋ́a Israel Ɩlʋ

Nokpoli Bulu Ɔtɔsɔ Mɩ Ɔnɔ

Dawid kanfʋ-ɩlʋ ha ɩlʋ osunapʋ. Bɔ́pʋ ɔsankuo da mʋ́.

¹ Oo Bulu, nɩ nosu kpoli fʋ a, sɔ mɩ ɔnɔ. Fʋtɛha ntegyi asʋ! Brɛá mbʋ ɩkplantɔ a, fɛlɛ mɩ. Wun mɩ nwɛ, afʋsɔ mɩ ɔnɔ.

² Oo anyankpʋsa, mlɩméesi mɩ kpɔɩ? Mlɩméesi asʋn ánɩ́ ɩma labi ɔma gya, si afunu buo? Ɩya.

³ Mlɩbɩá Nana Bulu lalɛ ɔha ánɩ́ ɔtamakpa mʋ ɔma yaɩ ha mʋ ɩwɩ. Nɩ nokpoli mʋ a, ɔtɔsɔ mɩ ɔnɔ.

⁴ Ɔblɔ ɩkɩta mlɩ a, ɩmáha amlɩbwɛ lakpan. Nɩ mlɩda mlɩ ɔklansʋ a, mlɩbwɛ diin amlɩyɔ mlɩ ɩklʋntɔ. Ɩya.

⁵ Mlɩbɔ afɔdɩɛ wanklaan, amlɩpʋ ansɩ dɩnka Nana Bulusʋ.

⁶ Aha tsɔtsɔɔtsɔ bʋdɛblɩ bɛɛ, “Ma ɔbɔ́bwɛ yile ha anɩ?” Oo Nana Bulu, wa awɩtɔlɛ ha anɩ.

⁷ Faha ansɩ lahɩɛ gyi mɩ, dʋn ansɩá itegyi amʋ́ brɛá amʋ́ atogyihɛ pʋ́ amʋ́ nta labusʋ.

⁸ Nɛ́klɛdɩ iwilwiitɔ, dɩdɩ fɛ́ɛ́. Oo Nana Bulu, fʋ nkʋlɛ ɔbɛ́ha tɔtɔ mɔ́ɔbwɛ mɩ.