Israelfɔ Ɩlʋ 3 - Bulu Ntam Pɔpwɛ mʋ́a Israel ƖlʋNana Bulu Ɩbɩtɔ Nkpahɔ Bʋ Ɩkanfʋ-ɩlʋá Dawid lɔwa brɛá mʋ bi Absalom gya mʋ. 1 Oo Nana Bulu, mɩ alupʋ badʋbɩ! Adʋn bakʋsʋ mɩsʋ! 2 Bʋdɛtɔɩ mɩsʋ bɛɛ, “Bulu mɔ́ɔhɔ mʋ ɛkɛkɛɛkɛ!” Ɩya. 3 Oo Nana Bulu, fʋlegyi ɩban wa mɩ. Fʋgyi mɩ numnyam, fʋtotsu mɩ ansɩtɔ fʋa. 4 Nosu kpoli Nana Bulu kʋklʋkʋʋ. Ɔlɔsɔ mɩ ɔnɔ tsu mʋ onuto ɩbʋ amʋsʋ. Ɩya. 5 Nɛklɛdɩ dɩdɩ. Nalatsinki, tsufɛ Nana Bulu togyo mɩ ɩwɩ. 6 Alupʋ idu-lafa babomli mɩ, mmɛdɛ amʋ́ ifu nya. 7 Oo Nana Bulu, kʋsʋ. Mɩ Bulu, hɔ mɩ. Tsufɛ fʋtɛda mɩ alupʋ lɛ da, kpa awuntɔlɩnpʋ abɩn. 8 Nana Bulu, fʋ ɩbɩtɔ nkpahɔ bʋ. Ha fʋ oyula ɩba fʋ abisʋ. Ɩya. |
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
Wycliffe Bible Translators, Inc.