Israelfɔ Ɩlʋ 148 - Bulu Ntam Pɔpwɛ mʋ́a Israel Ɩlʋ

Mlɩ Fɛ́ɛ́, Mlɩkanfʋ Nana Bulu Ɩda

¹ Mlɩkanfʋ Nana Bulu! Mlɩkanfʋ mʋ tsu ɔsʋsʋ. Mlɩkanfʋ mʋ ɔfʋakpa ɩnʋ!

² Mʋ abɔpʋ fɛ́ɛ́, mlɩkanfʋ mʋ. Ɔsʋsʋ ɩsa akɔpʋ fɛ́ɛ́, mlɩkanfʋ mʋ!

³ Owi mʋ́a ɔtsra, mlɩkanfʋ mʋ. Ntsrakpabiá ɩtɔwankɩ fɛ́ɛ́, mlɩkanfʋ mʋ!

⁴ Ɔsʋsʋʋsʋ, kanfʋ mʋ. Nwʋlʋtasʋ ntsu, kanfʋ mʋ.

⁵ Amʋ́ fɛ́ɛ́, bʋkanfʋ Nana Bulu ɩda, tsufɛ mʋlɛlɛ ɔnɔ, bɛlɩn.

⁶ Ɔlɛyaɩ amʋ́ ha brɛ fɛ́ɛ́, ɔlɔtswɩ ɔka ha amʋ́, bʋmɛ́ɛtalɩ dafa mʋ́sʋ.

⁷ Mlɩkanfʋ Nana Bulu ɔsʋlʋsʋ. Ɔpʋtɔ-mbwɩ akpɔnkpɔntɩ pʋ́ mʋ́ ibuntɔ ntobi fɛ́ɛ́, mlɩkanfʋ mʋ.

⁸ Ogya mʋ́a atsufolibi, atsufɔlɩ pʋ́ ogyasi tuun, pʋ́ atsufu fɛ́ɛ́ bʋtegyi mʋ asʋnsʋ!

⁹ Abʋ mʋ́a nkuku fɛ́ɛ́, nyi swie-abi mʋ́a Lebanon ndum,

¹⁰ pututɔ mʋ́a woyitɔ-mbwɩ, mbwɩ wɔlɩhɛ pʋ́ mbubwi fɛ́ɛ́, mlɩkanfʋ Nana Bulu!

¹¹ Ɔsʋlʋsʋ awie pʋ́ ɔmá fɛ́ɛ́, wulu ahandɛ pʋ́ ɔmásʋ agyipʋ fɛ́ɛ́,

¹² nyasubi mʋ́a mbitebi, nyebi-ahandɛ fɛ́ɛ́!

¹³ Mlɩ fɛ́ɛ́, mlɩkanfʋ Nana Bulu ɩda, tsufɛ mʋ ɩda nkʋlɛ pɛ lɔfʋa. Mʋ numnyam lɔfʋa dʋn ɔsʋ mʋ́a asɩ.

¹⁴ Alawa mʋ ɔmá ɔwʋnlɩn. Mʋ aha ánɩ́ bʋtamakpa mʋ ɔma pʋ́ mʋ ɩklʋnsʋ aha Israelfɔ bʋkanfʋ mʋ. Mlɩkanfʋ Nana Bulu!