Israelfɔ Ɩlʋ 147 - Bulu Ntam Pɔpwɛ mʋ́a Israel Ɩlʋ

Bulu Lala Ɔdɛ Yerusalem Wulu Da

¹ Mlɩkanfʋ Nana Bulu! Ɩbʋ alɛá abɔ́wa ɩlʋ kanfʋ anɩ Bulu. tsufɛ ɩbʋ ɔdwɛ, iletsia mʋ.

² Nana Bulu lala ɔdɛ Yerusalem wulu da. Ɔdɛ Israelfɔá olegya wa aputu kpa ba.

³ Ɔtɛtsa aha ánɩ́ asʋn ladʋn amʋ́, yia amʋ́ ɔlɔ, wa mʋ́ afa.

⁴ Oyin ntsrakpabi ɔdʋdʋɔ, ɔlɛha okugyiɔkʋ ɩda.

⁵ Anɩ Wie lomoni, ɔhɩɛ ɔbʋ tumi! Mʋ asʋn-asɩnu ɩma ɔka.

⁶ Ɔtɛkpa ahianfɔ, ɔtɛfɩn awuntɔlɩnpʋ da ɔsʋlʋtɔ.

⁷ Mlɩwa ansigyi ɩlʋ da Nana Bulu ɩpan. Mlɩda nsankuo ha anɩ Bulu amʋ.

⁸ Ɔtɔpʋ agyinde tin nwʋlʋta, ha nyankpʋ totswie wʋlɩ ɔsʋlʋsʋ, ɔtɛha ɩfa tɔkwɛ abʋsʋ.

⁹ Ɔtɛha mbwɩ atogyihɛ, ha klankpa-abi atɔ bʋtegyi nɩ bʋdesu.

¹⁰ Mʋ ansɩ tamagyi ɔpɔnkɔá ɔbʋ ɔwʋnlɩnsʋ, ɔsrɩpʋ ayabi ɔsa tamagyi mʋ ansɩ.

¹¹ Aha ánɩ́ bʋtenya Nana Bulu ifu, bʋtɔpʋ ansɩ dɩnka mʋ ɔdwɛá ɩma ɔkasʋ mboun ɩwɩ tegyi mʋ ansɩ.

¹² Oo Yerusalemfɔ, mlɩkanfʋ Nana Bulu. Sionfɔ, mlɩkanfʋ mlɩ Bulu!

¹³ Tsufɛ mʋtɛha mlɩ wulu ɔnɔ aklʋn tɔwa ɔnlɩn, otoyula wulu amʋtɔ abi.

¹⁴ Mʋtɛha mlɩ ɔmátɔ tolwii, ɔtɔpʋ atogyihɛ wanklaan bʋla mlɩ.

¹⁵ Mʋ ɔlɛ ɔnɔ, ɩtɔkɔsɩ ba mʋ́tɔ ɔsʋlʋsʋ.

¹⁶ Ɔtɛha atsufɔlɩ tesin ɔsʋlʋsʋ fɛ opuli-mputɔ. Ɔtɛda obétsu saɩn fɛ nsuo.

¹⁷ Mʋtɛha atsufolibi tɛkpa tsu ɔsʋsʋ. Ma ɔbɛ́talɩ lɩɩ mʋ atsalɩ ɔnɔ?

¹⁸ Ɔlɛ ɔnɔ ɩtɛyɛ. Ɔha afu tsʋn a, ɩlamli ntsu tsʋnhɛ.

¹⁹ Ɔlɔpʋ mʋ asʋn ha Yakob abi-aná, pʋ mʋ mbla mʋ́a mʋ amandɩɛ ha Israelfɔ.

²⁰ Ɔmɔkʋbwɛ mʋ́ odu ha ɔmá bamba kʋkʋ kɩ. Mʋ́ sʋ bʋmeyin mʋ amandɩɛ. Mlɩkanfʋ Nana Bulu!