Tito 3 - Nivaclé Bible

Pava tanyôjijayesh papi nicacujanjasa

¹ Avôntôyitemch'e japi lhech ca napecshichamc'oya yi'shi pa vatvacleyash ca nanc'ashamemsha'ne, shi' ca yajateesh ca nasnatesh pava isis.

² Ca ya aj na ca niteetsha papu ca niysa', jaspa canoach'enshi pa isisasha'ne shta. Tajulhey ca nitô'nôclitshem pap'elh pa lhtants'aclanjayash.

³ Lhech casjunash shta casvaatsha jeelh nalhu nishtacajôyshaysha'ne, pa tanca shtanc'ashamem shta pa Dios. Jacuclônelhvatsham'in pa yalhancashaclelhjop pava niysisa vataychavalhjanôc shi' pava janashjateshelh. Jôveelhshi pa niysa' pa javancajuctsen'in. Chitsicônitshielh pa jacônitshielh vitsha pap'elh.

⁴ C'oya ti nôclitelhyam pa cas Lhavqu'ilhjenaj Dios pa t'avisi shi' pa lhencheyasha napi nivacle yiey na cotsjaat,

⁵ pa shinalhjeneelhsha'ne. Navôque tanca tôlheshelha na yifanishelhyivach ti is, vooy pa lhcavts'aclayjayashelhyish pa Dios tô'lha. Chits'ilhjeneshelh lhayaash ti chitsicleshelhsha'ne lhech pa Espíritu Santo tô'lha, ti tsachajelhey ti tsivat'aselh pa jôveelhshi pa nich'a vatmônlhajayash.*xg* *xh*

⁶ Tôlha'jop ja cas Lhavqu'ilhjenaj Jesucristo ti yashjatjoom pa Dios ti nijutjooy pa Espíritu Santo.

⁷ Lhayaash pa t'avisi ti t'acumjelhyijulh, pa nijutelhyi pa vatmônlhajayash ôyjôlhôyech pan yacaclecshelhc'oya. ,

⁸ Navôque uj ti yijô', pa jayeetajesh ca iyitesh ca avanqu'eyjatsjanesh navôque matas, jaspa yaychavalhey jayu jum ca nasnatesh pa is papi nincacuesh pa Dios. Navôque uj ti isis pa tajulhey ti t'ajuyelh'a avaatsheelh alhacôm'aelh.

⁹ Istaa ca acavoyjulh pava china'sheshvanôcji ninatcajôyshaych'esha'ne shi' pava chaych'e capi acchevot'elh. Sasjop shta ca ôc'ôtelh'apee ca ivalhelhva'ne ti lhtaniyôseshelh java lhayôjijates pa Moisés. Cavôque cha'lheesh pa ampa ca nitô'lha.

¹⁰ Ca nicaajtaj papi yicatsônjatsham japi lhtatvelhavot'esh ja iglesia, pa istaa ca ashantesh ca ve'lhaaesh ja't'ajesha ca npueesh. Ca ninach'antaja pa ayjatelh'atshi.

¹¹ Pa lhech lhet lhfanishlhavach nivacle vatcôccheyjayan lhavaatsha, pa vapecleshlhavne pava lhsasch'e ti yiclôyit.

Nava chiyôji'sha papu

¹² Ca jachentaj'ay ja Artemas ja't'ajesha ja Tíjico, pa anifaclityiy ca asvan'e na yitsaat Nicópolis, lhayaash ti jôqueshch'e jayu na cloop ti yamônlhan'e.*xi*

¹³ Istaa ca efenesh pava matas ja nivôntôyitesh nava vatyôjijates lhey Zenas, shi' ja Apolos, pa ajutelhey pavan suyshemshi t'ajuya ja lhôcjayaash, jaspa tanca natjuyey'in pa'na.*xj*

¹⁴ Japi shtantsôt'ajesh tajulhey ca nineyjatsjanesh ca nasnatesh pa is, shi' ca nivanqu'efenesh pava chisuyeshi, pa lhecheesh pa nitajulhey pa lhjunash pa lhamônlhajayash. ,

Pa vat'aacjujunjayash shi' pa is vatvanqu'efenjayash yôj'esha'ne

¹⁵ Lhacôm'a napi yi'yijop yicjuelh'ay. C'acjuey shta japi yenjaseshjop pa nivatcacujayasha. Vooy pa Dios tajulhey ca nijutelh'ay pa is alhacôm'aelh. Amén.