Tito 1 - Nivaclé Bible

Pa Pablo yiisshem'e pa Tito

¹ Yivaatsha, ya Pablo, lhcavoyish pa Dios, pa lhcachenachyish shta ja Jesucristo. Niyôjeeshyi lhavaatsha jaspa jachajey ts'ivee pa nilhcacujayasha japi vooyshilhatam pa Dios. Jaspa nitôfaclesh jayu shta pa yijô' shi' nan shtachajch'e.

² Shi' na vach'anjayashc'oya pa vatmônlhajayash ôyjôlhôyech. Ninôôlhjôn'in pa Dios ti nifac pa lhech vatmônlhajayash lhapesh ti jôjjeclay ninavclan'e na cotsjaat.

³ Vooy nôqueesh shtamey na yitsjulh'ejop, pa shtantô'ya nava nifac shi' navan vanqu'eyjatsjanesh'in. Navôque javanqu'eyjatsjanesh niyôjeeshyi pa Dios cas Lhavqu'ilhjenaj jaspa janôyôjem pap'elh.

⁴ Qu'i'sesh'eam nôque yiqu'isjayanach, Tito, lhayaash ti yijô' ti yô'sesh'ajop pa nivatcacujayasha nan shinpunatjop. Jayeetajesh ca nicaaj'am pava vatcufayjates, shi' pa vatcavts'aclayjayash, shi' pa vatcanoyash tô'lha pa Dios Catsitata shi' ja Lhcaanvacle Jesucristo cas Lhavqu'ilhjenaj.

Pa lhcumjayash'een pa Tito yiey pa Creta

⁵ Jaelh nalhu c'amônlhanitesh'e ja yichjop'in ja yinôôt lhey Creta, jaspa asclanch'eyam nava jôjjeclay niyvaclhitesh. Pa c'ayôjeesh'a shta ca avooy papi lhanvaclesesh ja iglesia yiey ts'ivee java yitsates.

⁶ Pa lhanvacleesh isjop ca nitaasclansha'ne, pa ya aj ca nitôyôjijan'in. Tajulhey ca ve'lhaa lhpa lhch'acfa, vooy papi lhcles tajulhey ca nit'ujansha'ne pa ya aj na ca nitôlhjatlhavne pava niysisa, pa tanca shta ca ojiyisa.

⁷ Vooy pa lhanvacleesh pa iglesia pa lhech chiyclôvalhchiyinesh java yitsôt'ajesh pa Dios. Pa nôquen lhayaash tajulhey ca nicaajem pa lhamônlhajayash yivo'yeshch'e, pa ya aj na ca yôjijamat'a. Nintajulhey shta ca ojeya pa lhfanishlhavach, pa ya aj na shta ca yôjanaja. Ya aj na shta nivooy pa vatshanjayash pa tanca nen atesha pava pesoc ca nôvey.

⁸ Tajulhey ca yajateesh ca natcuumjulh papi nachey pa lhajpôyich. Pa lhech nivacle tajulhey pa isa' shta pa lhjunash pa nivo'yeshch'e pa nivatvenchatesh pa Dios pa nivatcajôyshiyan.

⁹ Tajulhey ca niyitesh ca nivôtcôt'ata pa yivo'yeshch'e Ya'clish ti vanqu'eyjatsjanesh, pa jaspa isa'jop shta pa nifaycuta na is vatneyjatsjanjayash shi' ca nicajôyshiyanesh papi yit'esha pava niysisa.

¹⁰ Lhayaash ti acloj papi yôjijamatsha'ne papin yi'shi' japi judíos papi lhech chayeshch'e pap'elh pava niysisa, pa yijôts'ôclônesh'in pap'elh nivacle.

¹¹ Papi lhech tajulhey ca ap'oojam lhashi, lhayaash ti yistanjatesh'in ja t'ajôôjamsha'ne. Vanqu'eyjatsjanesh pava niysisa pa yentaj ca chinjutey pava pesoc.

¹² Caaj pa ve'lha chiytôyjata pava ti vaclan tôlh'e ja yichjop'in ja yinôôt lhey Creta. Pa lhech yit'esha papi lhchifas: “Japi Creta lhavos yajatesh ti cuts'ajis, lhjunashjulh pava yaquisetes lhaviyjônjas, uj ti lhavcônjas pa ninancumjayuvatsham'in.”

¹³ Yijô' ti yit'esh; pa lhe'naa ti uja'esh ca ayôjieshaan, jaspa is jayu pa nilhcacujayasha ts'ivee.

¹⁴ Jaspa nivô'mesh jayu ti yaychavalhch'e java chaych'een japi judíos shi' cava jayôjeeshey papi tanuc'oya pa yijô'.

¹⁵ Papi is pava lhaychavalhjanôc, pa iseem shta pava matas. Vooy papi cacujanjas niysisa pava lhaychavalhjanôc. Papi lhech ampa ca isaem, lhayaash niysisa pava lhaychavalhjanôc pa samsam'in shta.

¹⁶ Yit'esha ca nantôfa'clesh pa Dios, taj ti chiyivan pava yisnatesh ti yôôlhjôn'in. Papi lhech côntanjas pa vatfaycut'in, pa sasemjop ca nasnatesh pava isis.