Sofonías 3 - Nivaclé Bible

Pa sasch'e shi' ti chivancafa'matanesh pa Jerusalên

¹ ¡Shiya'lhavach na Jerusalên, yitsat'esh pa vatav'ojiyash, vat'sasinat shi' ti tcômclôy'in!

² Ninpe'ya pa t'ôjôj pa Lhcaanvacle pa ninteesh shta ca chinasclanemch'e; pa nincafiyanjop pa lhech; pa tanca nôqueyjop pa lh'Dios.

³ Japi lhanvaclesesh lha'yasha java jump'uvalhjetas ti tôcjôtinvatsham'in; japi tcaasclanchayemch'e lha'yasha java yo'nisitas yiey ja am'e pa'ne ti ninmônlhanit'e pava vatanus ti nich'a nalhu.

⁴ Japi yitôôytaje'ma pava vaclan tanôclôjvatsham'in shi' ti faycutsjanjas; vooy japi lhcasinôclesh yisasiyan'e ja is'ôcji lhtôvash, pa tanôôlhjônesh ts'ivee na lhayôjijat pa Lhcaanvacle.

⁵ Taj ti pa Lhcaanvacle ti yie' na yitsaat; pa yisnatesh'e pa is pa nilhecha pa niysa'. Yinjôt ti nich'a nalhu ti niamac'oya ti vaniyitesh pa lhasclanjayashch'e. Pa vena lhjunashesh, pa ojey ni'nen ca nantôfaacsha pa vatvapenaj.

⁶ Yit'esh pa Lhcaanvacle: “P'alha ti javômjat napi vatachifas, ti jaflhita cotsjaat java uschisham java lhashclôfjes shi' ti p'alha ti jaamiyan'e pa'na java lhcaavjuc, pa ama papu ca nitsavalhch'e java lhcaavjuc. ¡Ja amiyantajshisha'ne java yitsates pa tanca ve'lhaa papu ca mônlhaa'e!

⁷ Jaychavalhey: ‘Ti nôque lhjunash na Jerusalên pa nanjovaayijulh jayu pa nench'e jayu ca jasclanemch'e; pa nôque lhjunash pa tan jayu ca yivômjat nan yie' ti tôlh'ejop yivaatsha ti jaclôyit.’ Taj ti napi lhech ti lhfanishesh'in ti yisnatesh pava nalhjunashvatc'oya lhav'ojinôc.

⁸ Pa lhe'naa, ca ach'anshelhyijop pa lhech nalhu ca jane'tajchisham pa c'asinôquieshelh. Yivaatsha, ya Lhcaanvacle, lhech yônashesh: P'alha ti jaychavalhey ca jayayelhvane napi vatachifas shi' napi vatvacles, pa jaspa jayjat'apee ts'ivee na yisuyi na yivôôc ti tujaam. ¡Lhacôm'a na cotsjaat ti javômjat jayu ti itôjeshjop na yivôôc!

⁹ “Meelh ca namtajeyjop côque, ja'isinatem jayu napi vatachifas nava lhashic, ca jaspa lhacôm'a ca nit'aalhyi ts'ivee, pa jaspa lhacôm'a ca ve'lhaaesham ca natcuumyam'in.

¹⁰ Japi yiey ja pachamey ja tovôc Etiopía, yichifas ti chiycatsônjat'in namesh jayu pa lhcufayjayash ti nichaajyi pava tsitisesh.

¹¹ Pava lhech nalhus, napi yichifas, pa tanca lhavapeneshelh'in jayu ca ve'lhaa pava afanishelh'avach ca anjuyeshelhyijulh, lhayaash ti jayjatelh'atshi jayu papi vanashjatelh'ac'oya shi' papi vanunatsha'ne, pa tanca t'ôyi'sheey jayu ca napecleyjop ca atanôclitshelh pa vatnunatsjayash yiey lha is'e' yiv'utiyuc.

¹² Yivaatsha c'amônlhanitelhshi jayu papi vanits'aclayan shi' papi lhavsuysha'ne, papin tsicafiyanesh jayu na yey.

¹³ Vooy papu ca mônlhatajasha'ne papi lhtachifas Israel lhavos tanca nasnatesh jayu pa ninvo'yeshch'e, pa tanca niteetsha jayu pa vatcuts'aji,*xm* pa tanca nôvqu'e' jayu lhashi pa vatjôts'ôclônjayash. Pa isjop jayu ca nattsaccunch'een shi' ca nit'ichaych'e pa tanca nanjovay'in papu.”*xn*

Pa vat'aclach'esh ti chinshamesh pa Jerusalên

¹⁴ ¡Ishjan, na yitsaat Sión! ¡Asitseneshelh pa vatshamitjayash napi lhtachifas Israel lhavos! ¡Ansham'in, Jerusalên, anshamitjat lhacôm'a pa acachi'!

¹⁵ Pa Lhcaanvacle yayjat'atshi pa lhivalhcheyash ti t'ajuyesh'ajulh shi' ti yayjatelh'ajop papi naac'utsfaseelh. Pa Lhcaanvacle, Lhanvacle napi Israel lhavos, yielh'atshi avaatsheelh;*xñ* pa tan jayu ca anjova'yeshjulh pa niysa' papu.

¹⁶ Pa lhech nalhu jayeetsha jayu na Jerusalên: “¡Ya aj ca anjovay'in, Sión, pa tanca nivô'meshjop nava atjuy ca ameem pa vat'unaj!”

¹⁷ Pa Lhcaanvacle a'Dios yi'ajop'in; ¡pa lhech yaash pa t'unaj, pa nalhjen jayu!*xo* Pa Lhcaanvacle nishamesh'a jayu. Pa lhencheyash ti yijutesh'ay jayu pa nich'a amônlhajayash; pa tishjanesh jayu pa lhshamitjayash

¹⁸ jan lhjunash ja nalhu ti chivatc'usinat'in. Yit'esh pa Lhcaanvacle: “Pa c'anjôcleshey jayu pa niysa' ti najovatsjan'apee pa vatvapenajesh ti yi'atshi.

¹⁹ Pava lhech nalhus jaycumesh'e jayu ti jayjuyeshjulh lhacôm'a papi nacômclôquiin. Pa qu'efenesh jayu pa tashinshtaj sayacshi pa javooysha'ne jayu lhpan vacuclôn'in;*xp* pa jancayôjatey jayu pa vatôclôjqueyash shi' pa is lhne'yaj lhacôm'a na cotsjaat, ti chiyapunesh java yisnatesh.

²⁰ Pava lhech nalhus c'anchajeelh jayu pa c'anayjatelhvane jayu; janich'ayanesh jayu pa ajunashelh, pa jajutelh'am jayu pa ane'yajelh shi' pa vatôclôjqueyash ti lhôveelhshi lhacôm'a napi lhtachifas'e na cotsjaat.*xq* Yivaatsha, ya Lhcaanvacle, lhech jayeesh.”