Sofonías 2 - Nivaclé Bible

¹ Ave'lheeelhsham avaatsheelh, napi nivacle amem pa lhavapenaj,

² ti jôjjeclay nichinavô'melh'in ja lhanfanash pa yiteej,*xe* ti ve'lha pa nalhu ti shan; ti jôjjeclay ninamelh'atsham ti yichesh pa lhavôôc pa Lhcaanvacle; ti jôjjeclay ninamelh'atsham pa lhnalhu'esh pa lhavôôc pa Lhcaanvacle.

³ Avo'elhey pa Lhcaanvacle avaatsheelh, napin vanits'aclayan yiey nôque cotsjaat, napin niqu'ishameshem nava tayôjijanesh. Acuumjelhem'in pa yivo'yeshch'e shi' pa vatants'aclanjayash, pa ameeshtaj lhôn ca anfomeelhjop jayu pa ca afiyelhch'ec'oya pa lhnalhu'esh pa lhavôôc pa Lhcaanvacle.*xf*

Pa vatclôyitsjayash ti caatjatem jayu papi vatachifas

⁴ Na yitsaat Gaza am'e jayu pa'na, vooy na Ascalón, pa chintay'een; pa nitifesh pa nalhu pa chinayjat'een papin yi'taj'een na Asdod, shi' papi yie' na Ecrón pa chinantsojey jan lhjunash ja fetas.

⁵ ¡Shiya'elh'avach avaatsheelh napi lhtachifas'e na Creta, napin yich'e' lhavôôj ja uj tovôc! Pa Dios palha yetônelh'ajop pa anivalhcheyashelh avaatsheelh: “¡Na Canaán, lhavtsateyishesh napi filisteos,*xg* pa c'avômjat jayu ca ama papu ca tsitenaja atshi!

⁶ Na vatavtsateyish yiey na lhavôjqu'e na tovôc pa nicôyôjey jayu pa yitjatachat, nan nayjat'evane jayu papi tashinshtas lhavos pava lhclôy yiey pava lhc'oovtes.”

⁷ Papi ca mônlhatajasha'ne japi lhchifas ja Judá, pa t'acu'ma jayu nôque vatavtsateyish ca namtajeshey pa t'efenjayash pa Lhcaanvacle lh'Dios pa chinancayôjatemey ts'ivee papi lhech. Lhech'e pa vanujumatsenesh jayu pava lhclôy tashinshtas, vooy pava tulhis pa t'ichay'een jayu yiey java lhajpôyjey yiey ja Ascalón.

^8-9 Côque t'ônashesh pa Lhcaanvacle yaash pa t'unaj, lh'Dios napi Israel lhavos: “Jape'yach'e java t'ôc'ôtsjavos japi moabitas*xh* shi' java lhavancajuvanôc japi amonitas.*xi* Lhayaash ti nôc'ôtsjayu'a napi yichifas ti yashjatesh java lhavjôych'e na cotsjaat. Pa lhe'naa, ti javôôttsôtjateshjop na yimônlhajayash ja Moab ca lhjunashach'ejulh jayu ja Sodoma vooy japi yiey ja Amón pa lhjunashach'ejulh jayu ja Gomorra,*xj* pa nancayôj'e yiey java vatcac'ovtes pava c'utjanis, pa nôv'e' pa acôtaj, pa tanca nivô'mesh ca amee pa'na. Papu ca mônlhatajasha'ne napi yichifas pa natjôcjanesh jayu ts'ivee pa mônlhaashi ts'ivee jô lhech cotsjaat.”

¹⁰ Côque chiyivalhesha jayu ja Moab shi' ja Amón ti tôlh'ejop ti nôc'ôtsjayu'a napi lhchifas pa Lhcaanvacle ti tôlh'ejop ti yashjatlhatam yiey ja lhavôjqu'e na lhcootsjat napi lhchifas pa Lhcaanvacle yaash pa t'unaj.

¹¹ Pa Lhcaanvacle pa suyemjulh jayu ts'ivee. Pa tif'ec'oya jayu lhacôm'a java lh'diosec yiey na lhavtsateyish, vooy pa lhech pa yôclôj jayu lhacôm'a papu ca nôôvtaj'e, lha'ma jayu shta japi yi'shi' java yichjop'in ja tovôc.

¹² ¡Avaatsheelh shta, napi lhtôlhelh'e ja Etiopía *xk* pa chinaclônshelhsha'ne jayu pa lhclesataj pa Lhcaanvacle!

¹³ Pa yôclôjey jayu pa lhech pa lhpôcôt yiey na fchenajjulh ca nitifch'een japi yiey ja Asiria,*xl* pa niamiyan'e jayu papu ja yitsaat Nínive, pa nancayôjatey ca clôjôjee pa am'e pa'na.

¹⁴ Pava yeclôy yiesh pava lhajpôyjey pa chinclanch'esha'ne jayu, vooy pava lhech pa yachajshiin jayu pava lhclôy tashinshtas shi' shta pava nalhjunashvatc'oya yaquisetes yalhanashch'een. Pa c'o'mi shi' lhpa am'a pa yijo'apee jayu pava lhôtôj'e pava chiytsemajch'e, vooy pav'elh ôjôclôs yacutsha'ne pa t'eyshey'een jayu pava vatovalhjavtes shi' pava lhavôj'e pava lhashic.

¹⁵ Lhech pa lhech yitsaat ti yamqu'een pa lhnunatsjayash ti vatcafiyanesh, ti yit'eshaan papi tsitenas'e ti nilhjunasheeshjulh yiey na cotsjaat. ¡Pa ya'shesh pa amee pa'na pa nancayô'jey ca lhôvjoqueyeesh pava yaquisetes lhaviyjônjas! Meelh ca naashtajop'in papu, pa nitajuclayesh'in shi' ca ninôclitesh ti yapun.