Salmos 1 - Nivaclé Bible

LIBRO I Pa vatshamitjayash jô

¹ Nisham'in pa nivacle ti ninôquesha pava yit'esh papi ojiyis, ninuyey shta pa lhnôyish papi sasch'e lhavos, ninjôneshch'e pa lhfanishesh papi yiclôqui pa Dios.

² Tsi'sha pa lhencheyasha cava lhayôjijates pa Lhcaanvacle, pa yaychavalhch'e nava nalhus shi' nava tulhis.

³ Pa lhech nivacle lhjunashjulh lhpa ve'lha aacjiyuc ti chiycôvjiyan'e lhavôôj pa tovôc.*xa* Pa nilhateshaashi pa nalhu ti yameyjop ti taay. Pa nive'lhaaesh ca nivafsham pava lhsashay. ¡Lhacôm'a pava yisnatesh, tô'lhesha jayu pa is!

⁴ Pa nilhech lhjunasha papi ojiyis, lhavaatsha lhjunashjulh pava yiteej ti yifôôyjat'in pa lhaviim.*xb*

⁵ Lhe'naa papi ojiyis ti amjop ca vatniisclanchayashch'e; Papi sasch'e lhavos nive'lhaaelhsham papi isissha'ne.

⁶ Pa Lhcaanvacle yiclôvalh pa lhnôyish papi isissha'ne, vooy pa lhnôyish papi ojiyis t'ajuyey pa vatclôyitsjayash.*xc*