Nava chiychayeshch'e lhpa RUT 1 - Nivaclé Bible

Pa t'ajôôjam pa Elimelec yiey pa Moab

^1-2 Pava lhech nalhus ti lhanvaclesesh papi Israel lhavos papi tcaasclanchaych'e, lhech t'aplhuqu'e ti caaj pa yipcu' pan tuc'a'e pa cotsjaat. Pa lhechesh pa caaj pa ve'lha nivacle tô'lha pa Belên yi'shi' pa cotsjaat Judá, lhey Elimelec. Pa lhech yich ti yie'in muc pa lhcootsjat pa Moab. Pa lhech tanaôycheelh shta lhpa lhch'acfa Noemí shi' papi napu' lhcles, pa Mahlón shi' pa Quelión. Papi lhech efrateos,*xa* nôque yich'e' Belên lhavos, pa yamey'in ts'ivee yiey pa Moab, pa lhech yie'in.

³ Pa lhech t'aplhuqu'e' ti vaf pa Elimelec, lhch'acfa lhpa Noemí, lhpa lhech pa tsisha'elh papi napu' lhcles mônlhajop.

⁴ Pa nijooylhach'e papi lhech ti lhjayasesh papi napu' ôcjeclôy moabitas; ve'lha lhpa lhey papu lhech Orfa vooy lhap'elh lhey Rut. Taj ti vooy ti yôfiis pava napu'nôjesh nincôpes

⁵ pa vafsha'ne shta papi Mahlón shi' pa Quelión. Vooy lhpa Noemí ampapu ca cacleclaa, ampapu lhclesa pa ampa lhch'acfaa shta.

Lhpa Noemí shi' lhpa Rut yichey'in pa Belên

⁶ Ve'lha pa nalhu tpeeycheyesh lhpa Noemí ti yiey pa Moab, ti tcavts'aclayesh pa Lhcaanvacle papi yitsôt'ajesh ti lhech yôj'e pa yipcu'.

⁷ Pa lhechesh pa yaychavalhey ca napecley pa Judá, pa tanaôycheelh papi lhash'aavot, pa tay'een ts'ivee pan yie';

⁸ taj ti yiey pa nôyish pa yit'esha: —Meelh'in ca mapeclelhey java lhajpôyjey japi amimiclelh. Vooy pa Lhcaanvacle yajateesh ca niisinatelh'am, nan ajunashelhyish avaatsheelh ti lhtsiisclaneshelhshi shi' capi yicles.

⁹ Pa chivashanelh'am ca ajayayelhsha'ne shta pa c'u'seelh'am'in pa ca vi'tajelh'e. Pa nijooylhach'e lhpa Noemí ti yicjuesh ti yifinsha'ne. Taj ti papi lhech pa yipvatsham'in

¹⁰ pa yit'esha ts'ivee: —¡Am! ¡Yivaatsheelh javoelh'atch'e jayu yiey pa acootsjat!

¹¹ Vooy lhpa Noemí pa yifactsenesha: —Meelh'in, yicles, ¿ta t'e lhayaash ti lhenelh ca atatvoelhyich'e? Yivaatsha tanca t'ôyisheey ca nicaajyam jayu papi yicles ca jaspa ajayaseeshelh avaatsheelh.

¹² Meelh'in ca mapeclelhey java ajpôyjeyelh. Yivaatsha ya c'utsja' ca yachajeyjop ca yijayaay. Lha'mataj lhôn ca as'cheeshelhyijop nan lhjunash nôque tulh ca yijayaay ca nicaajyam lhôn papi yicles,

¹³ ¿pa lhavatjumtitajeshelhyi avaatsheelh ca namey lhôn ca nitônt'asch'e pa ajayastajeeshelh papi lhech? ¿pa tanca ajayaaytajelhc'oya ti lhavatjumteeshelhyi? Am, yicles, tanca lhech lhjunasha. Pa Lhcaanvacle nijutyiy ja uj vatclôyitsjayash, taj ti ya'shesh ti tavijatayam ca c'avantajeshelh avaatsheelh pa anclôyitsjayashelh.

¹⁴ Papu lhech pa ve'lheesh yipvatsham'in shta. Pa yôjesh'esha'ne lhpa Orfa ti yicjuesh ti yifin lhpa lhash'aa, taj ti vooy lhpa Rut pa mônlhajop lhpa lhech.

¹⁵ Pa lhechesh pa yit'esha lhpa Noemí: —A'va, lha ajayafache vapecley ja lhcootsjat shi' shta java lh'diosec. Alhun ca avoqu'e lhjô lhech.

¹⁶ Taj ti lhpa Rut pa yicuulh: —¡Ya aja ca a'lhesh'yi ca yay'ajop shi' ca shtacatsônvatc'oya! Javoach'e jayu pan lhatjuyshi, pa jôv'e' jayu yiey pan lhôv'e'. Papi achifas yichifasesh jayu, pa a'Dios pa yi'Diosesh jayu.

¹⁷ Javaf'e jayu pa ca avaftaj'e, pa jen ca lhech chinastish'ec'oya. ¡Vooy pa Lhcaanvacle nivalheshyi jayu lhacôm'a pava tavijatay ca shtacatsôntajvatc'oya, alheeshyam pa yivafi!

¹⁸ C'oya ti yi'van lhpa Noemí lhpa Rut ti yaychavalhey ca nivoqu'esha'ne, pa nit'ôyi'sheey pa ca niteetsha.

¹⁹ Pa nôque lhjunash papi lhech napu' ti yich'e' ts'ivee pa nôyish pa yamey ts'ivee pa Belên. Meelh ti yitshaam ts'ivee pa Belên, pa ujesh ti yovalhjulh vatam papi lhtachifas. Pa yit'esha ts'ivee papi ôcjeclôy: —¿Nilhecha lhacôô lhja Noemí?

²⁰ Taj ti lhpa lhech pa yicuulh: —Ya aj ca atsetôneshelh Noemí; atsetôneshelh Mara, lhayaash pa Dios ampa ca nitô'yeesh ti tsanshi' pa t'apôôy.

²¹ Ti nôque jatôlh'e pa caaj java javan, pa nôqueesh pa ampa ca nichaaj lhayaash ti lhech lhfanisheshyam pa Lhcaanvacle. ¿Ta t'e lhayaash ti lhtsetôneshelh Noemí, ti vooy pa Lhcaanvacle ampa ca nitô'yeesh ti nivalhyi ti tsitacshiyan'in?

²² Pa nôque lhjunash lhpa Noemí ti vapeclelhey lhpa Rut pa Moab, lhpa lhech lhash'a'eesh moabitache lhavaatsha. Yamelhey pa Belên ti nich'a chinclanshi pava cebada.