Proverbios 1 - Nivaclé Bible

Pava tôlhshaam pava vatcajôyshivos

¹ Nava lhcajôyshivos pa Salomón,*xa* lhaôs pa David, lhanvacleesh papi Israel lhavos,

² nôque yi'shi' ti t'ajuya: chinôyôjvatam pa vatcajôysha*xb* shi' pa vanqu'eyjatsjanesh, vanqu'efenesh ca chintôyc'oya pava ya'clishay nayeeyshi,

³ shtatôôlhsha pa vatneyjatsjanjayash, pa vatcajôysha, pa vatniisclanjayashch'e, pa yivo'yeshch'e shi' pa vataasclanjayasha'ne;

⁴ ca chinajpôyitesh papi nich'acsha'ne papi a'lheesh pa ca nitô'yish, ca nitôyc'oya shi' ca najpô'yesh.

⁵ Papi yitô'yish shi' ti tcajôyshay pa tach'an'in, pa nôyôjesh'e ti yaash pa lhcajôysha shi' pa yitô'yishlhavne,

⁶ pa jaspa nitôych'e pava yit'esh'in papi tcajôyshay, pava lhclishay, pava yovalheyjop shi' pava chivoyesh'ôcji.

⁷ Pa vatcajôysha chitôlhesh'e ti chivijatanjulh pa Lhcaanvacle;*xc* papi ampa ca naychavalh yapun pa vatcajôysha shi' pa vatvanqu'eyjatsjanjayash.

Pava chiycajôyshiyanesh papi nich'acsha'ne

⁸ Na yaôs, ach'anch'e nava nacajôyshiyanesh na atata, pa ya aj ca avôôm nava neyjatsjanesh lhja amimi,

⁹ lhayaash ti lhjunashjulh'am jayu avaatsha pa is vatac'ôcle shi' pa vatiniish ti lhtinshichi.*xd*

¹⁰ Ca nentaj papi sasch'e lhavos ti nateejshiin, ¡pa ya aj ca atatvashanem, na yaôs!*xe*

¹¹ Ameesh lhôn ca niteesh'a: “Ata'lhun ca atatvoelhyich'e; ca shtaclanelhc'oya pa ve'lha ca jaspa shtaclôn papi piiy ca nijumteey ca lhech ninaashtaj'e.

¹² Shtatimelh vatich'e papi mônlhasha'ne nivacle yivo'yeshch'e jan lhjunash ti tifch'e tasham pa vatvafjayash pa nivalhech.

¹³ Caajjoom jayu lhacôm'a pava nalhjunashvatc'oya vatvanjas, ¡Shtaponteshelh java catsijpôyjey lhacôm'a java sht'acutelh!

¹⁴ Ata'lhun ca anatshelhyi ca casve'lheelhsham shta nava caajelhyam.”

¹⁵ ¡Taj ti ya aj ca avoqu'e papi lhech, na yaôs! Ayeshjop pava niysisa lhnôyshay,

¹⁶ lhayaash ti yifaclitsha'ne ti yisnatesh pa niysa'; ¡yifaclitsha'ne ti nôtit papu!*xf*

¹⁷ Lha'ma ti cha'lheesh ti chiyisnatesh lhpa vatc'ôôyte ca nivantaj pava ajôclôs,

¹⁸ papuque nivacle yisnateshlhavcop lhpa lhech vatc'ôôyte pa yinesh pa lhamônlhajayash pava suyc'oya.

¹⁹ Yiey pan yôj'e' papi vancajuctsen: vooy pa yitsôt'ajesh lhavancajuctsenjayash pa yivômjat.

T'aalhavcop pa vatcajôysha

²⁰ Pava lhcaavjuc shi' pava clayôych'e chiypeya'e pa t'ôjôj pa vatcajôysha;

²¹ chiypeyajop pava lhclishay pava lhashic, shi' pava yie' pavan yaash ti chiyôyey yi'shi' pa yitsaat:*xg*

²² “Nich'acsha'ne ninatô'yelh'avne, vancajuvanjas shi' napi ninatcajôyshaysha'ne, ¿Ta t'elhesh ca avôômjelh cava ninatôôyshelh'avne ti c'uselhshi'am ti lhavancajuvanelh pa lhapunelh shta ca vatcajôysha?

²³ Ach'anelhch'e nava c'acajôyshiyanshelh jayu, pa vooy yivaatsha janelh'atapee jayu na yi'espíritu; pa c'atôyjatelha jayu nava yaychavalhjanôc.

²⁴ Yivaatsha jayôntajelh'ay ca anachelhyi, taj ti avaatsheelh naat'eshelh ca anujelhyi.

²⁵ Pa vena ajunashelh, lhatcavo'yelhjulh nava janfactajelh'am; pa nienelh ca acumelhjulh nava c'acajôyshiyanshelh.

²⁶ ¡Pa tsicaaysiyuelh'ash'in jayu yivaatsha ca ninamtajelh'ay pava vaclanelh'am! ¡Pa c'ajuvaneshelh'in jayu ca avaftajeshelh pa ajovayielh,

²⁷ ca namtajelh'ay avaatsheelh pa vatjovayi shi' pava tavijatay, ti niavaatlheclôjelh shi' ti lhtanapunelh, ja lhjunash lhpa jojactsini ti yicatsônjat'in lhacôm'a!

²⁸ “Pa lhech nalhu pa tôntajyi jayu taj ti tanca yicuulh; pa vo'tajyi jayu taj ti tanca nasvan;

²⁹ lhayaash ti yapun pa vatcajôysha pa nintesh ca nôclôj ts'ivee pa Lhcaanvacle.

³⁰ Pa ni'nench'e ca natcuumjulh nava jacajôyshiyantajesh; pa yapun nava janfactajem.

³¹ ¡Pa yiclôyit jayu pava niysisach'esha'ne lhjunash! ¡Pa mônlheesh jayu ca iyi'ach'e pava niysisa lhjunash ts'ivee!

³² Papi ampa ca nitô'yishlhavne yiclôn jayu ti amem pa ca nitô'yishlhavne, vooy papi ninatcajôyshaysha'ne yivômjat jayu pava nintanaychavalh'e;

³³ taj ti vooy papi tach'anyi pa caajem jayu pa vatpiiyash pa ameem pa t'ajovayijulh pava suyjulh.”