Números 9 - Nivaclé Bible

Pa lhanfanash ti chiyivclanjat pa Pascua

¹ Ti nôjeshch'e pa ve'lha yincôôp ti tay'een papi Israel lhavos pa Egipto, yiey pa vatjutsa' jive'cla pa yincôôp, vooy pa Lhcaanvacle yiyôjiesha pa Moisês ti yiey pa am'e pa'na lheyesh Sinaí, pa yit'esha:

² “Japi Israel lhavos isjop ca navclanjat pa vatc'usiyashesh pa Pascua jan yie'shi ti chinôôclhanita,

³ nôque yich'e', ja nalhu catorce jô lhech jive'cla ca nuutajeey ca nijôneshch'e java chiyi'sesh'ejop lhacôm'a ti chivancafaycutesh ti t'ajuya ti chiyivclanjat.”

⁴ Pa lhechesh pa Moisês pa yiyôjiesha papi Israel lhavos ti yivclanjat pa t'ajuya pa Pascua,

⁵ vooy papi lhech pa yisnatesh yiey pa lhjunash pa nalhu ti catorce pa lhech jive'cla ti nuutey yiey pa am'e pa'na lheyesh Sinaí, yisnatesh lhacôm'a yiey pan t'ônashesha pa Lhcaanvacle ti yiyôjiesha pa Moisês.*xj*

⁶ Taj ti caaj papi t'ajôôjô nivacle ti vat'sasiyansha'ne tôlh'ejop ti t'ajaya pa vaf, pa lhe'naa ti sasjop ca navclanjat pa Pascua pa lhech nalhu.Papi lhech yijôchieshey pa Moisês shi' pa Aarón pa lhech nalhu,

⁷ pa yit'eshaan pa Moisês: —Yivaatsheelh jayajayelha ca vaf, pa lhe'naa ti yasaselh. ¿Tam'ey ti yisasinatelhjopyam ti ninvashanelhyam jayu ja yieshelhjop pa Lhcaanvacle pa vatcufayjat pan yie'shi ti chiynôôclhanita, ca yicheshelha nap'elh Israel lhavos?

⁸ Pa yit'esh ti yicuulh pa Moisês: —Ach'anelhjop ca chinanjutajyam yivaatsha pava vancafaycutesh pa Lhcaanvacle ti t'ajuyelh'a.

⁹ Pa Lhcaanvacle pa yiyôjiesha pa Moisês pa yit'esha: “Anfacleem japi Israel lhavos côque:

¹⁰ Lhacôm'a avaatsheelh shi' papi acleselh isjop jayu ca avclanjatelh pa Pascua ca asclaneshelhshiyam. Papin vat'sasiyanesh ti t'ajaya pa vaf, ja't'ajesha papi tojey pa t'ajuyshi,

¹¹ pa navclanjatshi jayu pa nalhu catorce pa napu'eyshi jive'cla, pa nuutey. Isjop ca nitujesh pa tashinshtaj pava t'aclôôc t'apôôysha'ne shi' lhpa yucuve ameyshi pa yiyalhiyan,

¹² pa ya aj na pa ca nimônlhanit'e pa nijooylhach'e nalhu pa ya aj na pa ca nipôcjetshi pa lhavnu'.*xk* Pa avclanjatelh pa Pascua ca ajônshelhch'e lhacôm'a nava c'afaycuteshelhajop.

¹³ Taj ti papu ca ninavclanjataja pa Pascua ti ninvat'sasiyantaj ti nitojatch'e pa ca natjuyshi pa isjop jayu ca chinjutfach'eec'oya papi lhchifas. Ti nincha'jey na Lhcaanvacle pa lhcufayjat jan yie'shi ti chinôôclhanita, pa chiyivalhesha jayu pa lhsasch'e.

¹⁴ “Papi vena tôlhshi' ti yielh'atshi isjop jayu ca navclanjat pa Pascua ca nasclaneshiyam ca nijôneshch'e lhacôm'a java javancafaycuteshjop. Nava lhech chitayôjijaneshjop t'ajuya papi vena tôlhshi' lhjunashjulh shta papi nivat'asshi na vatavtsateyish.”*xl*

Lhpa vôse' yi'apee pa Tsha'nuvo'esh pa Chivatpeya'esh

¹⁵ Pa nalhu ti chiyvaclhitesh pa is'ôcji lhtôvash, lheyesh shta Tsha'nuvo'esh pa Chivatpeya'esh, lhpa vôse' pa yip'o'apee. Pa tôlhesh'een ti nuutey'in ti chiyvaney'in ti tajulh'apee pa is'ôcji lhtôvash lhjunashjulh pa itôj yamjey'in ti nôcjuulh pa nalhu.*xm*

¹⁶ Nôque lhjunash ti vaclan yajatesh: pa nalhu lhpa vôse' pa yip'o'apeeen pa Tsha'nuvo'esh, pa vooy pa tulh pa chiyvaney'in pa lhjunashjulh pa itôj.

¹⁷ C'oya ti nitshaam lhpa vôse' lhpan tajulh'apee pa Tsha'nuvo'esh, pa lhechesh pa yich'in papi Israel lhavos, c'oya ti yamey pa tajulh'e, pa lhech mônlhee ts'ivee.

¹⁸ C'oya pa Lhcaanvacle ti yiyôjiesha papi Israel lhavos ti yich'in, ja't'ajesha ti lhech mônlhee pa t'ichavat, pa lhech mônlhee pava nalhus lhpa vôse' tajulh'apee pa is'ôcji lhtôvash.

¹⁹ Lhpa vôse' ti cajuqu'e ti tajulh'apee pa is'ôcji lhtôvash, vooy papi Israel lhavos pa lhech mônlhee pa ninôqu'in, tach'aneshjop pa cat'eelhtajeesh ca niyôjiesha pa Lhcaanvacle.

²⁰ Lhpa vôse' ti mônlha'apee pa is'ôcji lhtôvash pa ti t'ajôôj pava nalhus pa ti t'ônashesh pa Lhcaanvacle ti yichen'in, pa vooy peelh t'ônashesh ti lhech yimônlhanit'een.

²¹ Ja't'ajeshaan lhpa vôse' ti tsi'sha pa tulh ti mônlha'apeeen, pa vooy ti nich'a nalhu pa tay'apeen, pa lhechesh papi lhech pa isjop ti yich'in. Pa lhjunasheshjulh pa nalhu pa tulh ti nitshaam lhpa vôse' pa vooy papi lhech pa yich'in.

²² Pa vooy lhpa vôse' ti lhech mônlhee ti yi'apee pa is'ôcji lhtôvash ti napu' pava nalhus, ja't'ajesha ve'lha jive'cla, ja't'ajesha ve'lha yincôôp ti lhech t'ichay'e papi Israel lhavos, pa tanca ninôyin'in. Taj ti vooy ti netshaam lhpa vôse', pa lhechesh pa yich'in vitsha papi lhech.

²³ Pan t'ônasheshem pa Lhcaanvacle ti yichayan, pa vooy peelh t'ônasheshem ti yichen'in. Pa nôque lhjunash pa yajatesh ti niqu'ishameshem pa Lhcaanvacle yiey pan t'ônashesh pava yiyôjiesha ja Moisês.