Números 7 - Nivaclé Bible

Pava vatcufayjates t'ajuya ti chiyvenchatesh pa is'ôcji lhtôvash

¹ Pa nalhu ti yivaclhitesh pa Moisês ti yisnatesh pa is'ôcji lhtôvash, pa yivenchatesh pa lhape', pa yu'ja lhacôm'a pava chiycheneshjop pa is'ôcji lhtôvash shi' pava t'ajuya pa itôvat'esh.

² Pa nijooylhaesh papi lhanvaclesesh papi tc'acshamsha'ne, papin yefenesh ti yitsjuulh, pa yichey'in

³ t'ajuyish pa Lhcaanvacle pa ve'lhayama pava caletas chiyp'ooj'e pava vatcufayjates shi' pava doce vôcôc, pa ve'lha caletaj napu'jop papi lhcaanvacles, pa ve'lhajop ts'ivee pava vôcôc. Lhacôm'a cavôque ti yiesh'e t'ajuyish pa is'ôcji lhtôvash.

⁴ Pa lhechesh pa yit'esha pa Lhcaanvacle pa Moisês:

⁵ “Acuumjulh nava caletas shi' nava vôcôc, pa ajutem japi levitas pa jaspa natcumesh'een ts'ivee yiey na Tsha'nuvo'esh ti Chivatvan'e, yiey pan lhjunash pa llhcumjayashesh ca ve'lhaae ts'ivee ca nasnatesh.”

⁶ Vooy pa Moisês pa t'acuumjulh pava caletas shi' pava vôcôc pa yicatsônjatesh papi levitas.

⁷ Vooy papi lhcles pa Gersón pa yijutey pava napu' caletas shi' pava yichatjulh vôcôc, pava lhech yisuyeshijop pa lhcumjayash.

⁸ Vooy papi lhcles pa Merari pa yijutey pava yichatjulh caletas shi' pava pu'janayama vôcôc, ti suyeshijop pa lhcumjayash ti yiclôvalhesh pa Itamar, lhaôs pa vatcasinô Aarón.

⁹ Pa amjop papi lhcles pa Coat ca chinjutey pava caletas nilhecha pava vôcôc, lhayaash pava lhasnôyjesh ti yichaj'in ts'ivee ti yan'e'in lhfatatsiy.

¹⁰ Meelh ti chiyvenchatjop pa itôvat'esh, vooy papi lhanvaclesesh papi tc'acshamsha'ne pa yichaj'in pava lhcufayjates pa yan'e' t'aluyish pa itôvat'esh.

¹¹ Pa lhechesh pa yit'esha pa Lhcaanvacle pa Moisês: “Yinjôt jayu pa nalhu ja ve'lha lhanvacle pa tc'acshamsha'ne ti yiven'esh ca nanchaajtaj pa lhcufayjat t'ajuya ti chiyvenchatesh na itôvat'esh.”

¹² Pa vatjutsa' nalhu pa yicha'jey pa Naasón pa lhcufayjat, lhaôs pa Aminadab, tô'lha pa tc'asham pa Judá.

¹³ Pa lhcufayjat yanshi' pa ve'lha titech'esh pa clesanilh clim mil cuatrociento treinta pa lhcaclecli (gramos), shi' pa tacfeey pa clesanilh clim setecientos setenta pa lhcaclecli (yiey pan lhcaclecliniyash yiey pa is'ôcji lhtôvash), pava lhech napu' yiponteshch'e pa isshi' climshi chiyot'ateshi pa lhape', pa t'ajuya pava vatcufayjat'esh pava chiycôvjiyan;

¹⁴ jô'tajesh pa ve'lha yacutshiyesh clesanilh cojiyaj ciento diez pa lhcaclecli, pa tapooj pa acôjqu'e pa lhniish,

¹⁵ ve'lha pa vôcô, ve'lha pa tashinshtaj jayanaj, ve'lha pa tashinshtaj ve'lha lhnincôp ti tcufayeshjop ti chiylhônsham,

¹⁶ ve'lha pa fusuc t'ajuya ti chiycufa'yeshjop pa sasch'e,

¹⁷ vooy pa nijooylha pa vatc'ufayjat'eshjop ti chivaniisclanch'e, napu' pava vôcôc jayanjas, ve'lhanôjesh pava tashinshtas jayanjas, ve'lhanôjesh pava fusunjas shi' pava ve'lhanôjesh tashinshtas ve'lha lhnincôp. Pava lhech lhcufayjatesesh pa Naasón, lhaôs pa Aminadab.

¹⁸ Vooy pa napu'eyshi nalhu yicha'jey pa Natanael pa lhcufayjat, lhaôs pa Zuar, lhanvacleesh pa tc'asham pa Isacar,

^19-23 pa lhfanisheshjulh ti tcufay pa Naasón.

²⁴ Vooy pa pu'janaeyshi nalhu yicha'jey pa Eliab pa lhcufayjat, lhaôs pa Helón, lhanvacleesh pa tc'asham pa Zabulón,

^25-29 pa lhfanisheshjulh shta papin vatjutsa'esh ti tcufay.

³⁰ Vooy pa yichatjulh nalhu yicha'jey pa Elizur pa lhcufayjat, lhaôs pa Sedeur, lhanvacleesh pa tc'asham pa Rubên,

^31-35 pa lhfanisheshjulh shta papin vatjutsa'esh ti tcufay.

³⁶ Vooy pa ve'lhanôjesh nalhu yicha'jey pa Selumiel pa lhcufayjat, lhaôs pa Zurisadai, lhanvacleesh pa tc'asham pa Simeón,

^37-41 pa lhfanisheshjulh shta papin vatjutsa'esh ti tcufay.

⁴² Vooy pa ve'lhayama nalhu yicha'jey pa Eliasaf pa lhcufayjat, lhaôs pa Reuel, lhanvacleesh pa tc'asham pa Gad,

^43-47 pa lhfanisheshjulh shta papin vatjutsa'esh ti tcufay.

⁴⁸ Vooy pa napu'yama nalhu yicha'jey pa Elisama pa lhcufayjat, lhaôs pa Amiud, lhanvacleesh pa tc'asham pa Efra'in,

^49-53 pa lhfanisheshjulh shta papin vatjutsa'esh ti tcufay.

⁵⁴ Vooy pa pu'janayama nalhu yicha'jey pa Gamaliel pa lhcufayjat, lhaôs pa Pedasur, lhanvacleesh pa tc'asham pa Manasês,

^55-59 pa lhfanisheshjulh shta papin vatjutsa'esh ti tcufay.

⁶⁰ Vooy pa yichatjulhyama nalhu yicha'jey pa Abidán pa lhcufayjat, lhaôs pa Gedeoni, lhanvacleesh pa tc'asham pa Benjamín,

^61-65 pa lhfanisheshjulh shta papin vatjutsa'esh ti tcufay.

⁶⁶ Vooy pa napu'nôjesh nalhu yicha'jey pa Ahiezer pa lhcufayjat, lhaôs pa Amisadai, lhanvacleesh pa tc'asham pa Dan,

^67-71 pa lhfanisheshjulh shta papin vatjutsa'esh ti tcufay.

⁷² Vooy pa nalhu once yicha'jey pa Pagiel pa lhcufayjat, lhaôs pa Ocrán, lhanvacleesh pa tc'asham pa Aser,

^73-77 pa lhfanisheshjulh shta papin vatjutsa'esh ti tcufay.

⁷⁸ Vooy pa nalhu doce yicha'jey pa Ahira pa lhcufayjat, lhaôs pa Enán, lhanvacleesh pa tc'asham pa Neftalí,

^79-83 pa lhfanisheshjulh shta papin vatjutsa'esh ti tcufay.

⁸⁴ Nôque lhjunash ti yivenchatesh pa itôvat'esh, papi lhanvaclesesh pa tc'acshamsha'ne papi Israel lhavos ti tcufayesh pava doce titjeyesh pa clesanilh clim, pava doce tacfeyesesh pa clesanilh clim shi' pava doce yacutshiyisesh pa clesanilh cojiyaj.

⁸⁵ Ve'lhee ts'ivee pava titjeyesh clesanilh clim ti mil cuatrocientos treinta pa lhcaclecli, pa ve'lhee ts'ivee pava tacfeyisesh clesanilh clim ti setecientos setenta pa lhcaclecli. Pa yamvatsham pava titjey shi' lhacôm'a pava t'acfeyis ti veintiseis mil cuatrocientos pa lhcaclecli, yiey pan lhjunash pa lhcaclecli ti chit'acumesh'e yiey pa is'ôcji lhtôvash.

⁸⁶ Caaj shta pava doce yacutshiyisesh pa clesanilh cojiyaj tapoojqu'esha'ne pa acôjqu'e pa lhniish, ti ve'lhee ts'ivee ti ciento diez pa lhcaclecli, yiey pan lhjunash pa lhcaclecli ti chit'acumesh'e yiey pa is'ôcji lhtôvash. Vooy pa yamvatsham lhacôm'a pava yacutshiyisesh clesanilh cojiyaj ti mil trescientos veinti pa lhcaclecli.

⁸⁷ Vooy pava yaquisetes t'ajuya ti chiylhônsham pa yamvatsham doce pava vôcôc, pava doce tashinshtas jayanjas, pava doce tashinshtas ve'lha lhnincôp, pava chiyjuyjata ti chiycufa'yesh pava chiycôvjiyan, shi' shta pava doce fusunjas t'ajuya ti chiycufa'yeshjop pa sasch'e.

⁸⁸ Pava yaquisetes chiycufa'yeshjop ti chivaniisclanch'e pa yamvatsham veinticuatro pava vôcôc, pava sesenta tashinshtas jayanjas, pava sesenta fusunjas shi' pava sesenta tashinshtas ve'lha lhnincôp. Pavôque vatcufayjates t'ajuya ti chiyan'e pa itôvat'esh ti nôjeshch'e ti chiyvenchat.

⁸⁹ Meelh pa Moisês ti yich'ôcji pa Tsha'nuvo'esh ti Chivatvan'e ti tasinôyshem pa Lhcaanvacle, pa tach'ana pa Lhcaanvacle ti tasinôy'in yiey pa lhap'ot'esh lhpa vatcaqueclitôshi yeclônilh yich'e' pa chivatpeya'esh, ti yi'shi' lhcaavju pava napu' tafaaysha'ne.