Números 5 - Nivaclé Bible

Pa vatyôjijatjop ti chiyayjatshi papi vatsasiyanesh pa'na

¹ Pa Lhcaanvacle yiyôjiesha pa Moisês pa yit'esha:

² “Anfacleen napi Israel lhavos ca chinanfach'eec'oya na vat'ichavat lhacôm'a papi tashtôtaysha'ne, ja't'ajesha ca lhecha papi nitonjat pava lhcles, ja't'ajesha shta papi vatsasiyanesh ti t'ajaya pa vaf.

³ Ca chinayjatshiin na vat'ichavat ca lhechtaja pa nivacle ja't'ajesha lhpa ôcjeclô. Pa jaspa tanca nisasiyan'e jayu na vat'ichavat yiey nan jôv'eshi ts'ivee.”

⁴ Vooy papi Israel lhavos niqu'ishamesh pa niyôjiesha pa Lhcaanvacle pa Moisês pa yayjatshiin pa vat'ichavat papi lhech.

Pa vatyôjijatjop pava vancacôctiyan shi' pava vancateshiyan

⁵ Pa Lhcaanvacle yiyôjiesha pa Moisês pa yit'esha:

⁶ “Anfacleem napi Israel lhavos navôque: Ca nicaajtaj pa nivacle ja't'ajesha lhpa ôcjeclô ti ninvooyshemch'e na Lhcaanvacle tôlh'ejop ti caaj pa yiteshiyanesh pap'elh, pa yisnatesh pa sasch'e,

⁷ pa isjop jayu ca nitanôclitesh jô'tajesh ti isjop jayu ca nijutem papi yiteshiyanesh pava yiey pant'ajôjqu'e pavan yicôctiyanesh pa nashjatem pava ve'lhayamanôjesh ca nijutem.

⁸ Papi lhech ti chiteshiyanesh ti apis ti vaf ti ampa lhavelha ti chiyachajtajem, pa chinjuteem na Lhcaanvacle ti chiyjuta ja vatcasinô, jô'tajesh pa tashinshtaj pa natcaufa'yeshjop jayu ja vatcasinô pa jaspa chincumeshjulh ca chinvômjatch'e pa lhsasch'e papi lhech.*xe*

⁹ “Lhacôm'a pa yineylhatam shi' pa lhcufayjat napi Israel lhavos ti chiyvenchatesh na Lhcaanvacle ti yicha'jeyshi ja vatcasinô ti t'ajuya ja vatcasinô.

¹⁰ Lhacôm'a pava chiyvenchatesh na Lhcaanvacle ti chiychajeyshi ja vatcasinô t'ajuya ja vatcasinô.”

Pa vatyôjijatjop pa lhjunash pava vachavativos

¹¹ Pa Lhcaanvacle pa yiyôjiesha pa Moisês pa yit'esha:

¹² “Anfacleem napi Israel lhavos navôque: Nan lhjunash lhpa ôcjeclô ti nivooyshemch'e pa lhch'acfa

¹³ ti t'acutelhvane peelh nivacle ti nintôôysha pa lhch'acfa, ti lha'ma lhpa lhech ti yisnatesh ti vat'sasinatesh ti nichintôyesha ti vant'ôfich'esh pa lhfanishlhavach.

¹⁴ Nôque tôlhesh'e pa lhch'acfa ti nichavat'esh'in tôlh'ejop pa lhjunsh lhpa lhch'acfa. Taj ti lhech lhjunash shta ti tôlh'ejop pa nivacle nichavatajesh'in lhpa lhch'acfa ti yilheclôj atesha.

¹⁵ Nava napu' lhjunash pa nivacle yicha'jey jayu lhpa lhch'acfa pa vatcasinô, pa yichaajop jayu pa lhcufayjatjop lhpa napu' kilos pa climshi lhey cebada. Taj ti ya aj ca nôtsiyeyshi jayu pa lhape' shi' pa acôjqu'e pa lhniish pa lhech climshi, lhayaash ti lhcufayjat'eshjop pa vachavati, ve'lha pa natcufa'yeshjop pa ninôôc pa sasch'e.

¹⁶ “Pa vatcasinô pa nanc'uyjat lhatay lhpa ôcjeclô pa nôveshjop jayu na Lhcaanvacle.

¹⁷ Pa nanjooylha ca natcumesh'e pa yinôôt chiyvenchat yich'e' pa t'acfeey cotsjaat pa nacshenjatesh pa tiqu'in cotsjaat yi'ôcji ja is'ôcji lhtôvash.

¹⁸ Lhech lhjunashesh lhpa ôcjeclô ca nan'e' t'ajuyish na Lhcaanvacle, pa ninucujam pava lhayees pa yanshi' jayu lhpôcôtôy pa vatcufayjat'eshjop pa vachavati pa jaspa ninôclesh pa sasch'e; vooy lhavaatsha t'acumesh'e jayu pa yinôôt t'apôôyshi t'ajuya ti chiypôfiyuesh.

¹⁹ Pa lhechesh pa yiyitsjayanesh jayu ti yit'esha: ‘Ca niacutajeelhvane peelh nivacle, ca ninavooytajeeshemch'e na ach'acfa, ca naasnatajeeshelh pa'na peelh nivacle ca niavat'sasiyantajeesh, pa tanca pa ca lhjunasha'ash ca ayô'tajshi na yinôôt t'apôôyshi ti tô'lha pa vatpôfiyujayash.

²⁰ Taj ti nan lhjunash ca ninavooytajeeshemch'e pa ach'acfa, ti lhatcuteelhvane peelh nivacle shi' ti lhasnatesh pa ti lhavat'sasiyanesh,

²¹ vooy na Lhcaanvacle nanvaych'aclajey jayu pa vatpôfiyujayash yiey t'ajuyish napi achifas, pa t'uca'shi jayu pa acachi' pa tanca isa' jayu ca actsôôy.

²² Côque vatvatclôyitsjayash ti namjatey jayu ca ayô'tajshi nôque yinôôt t'ajuya pa vatpôfiyujayash.’ Vooy lhpa ôcjeclô ca nicuulhtaj jayu pa niteesh: ‘Lhech yijunash.’

²³ “Pa lhechesh ja vatcasinô pa yi'sesh'e jayu pa lhech vatpôfiyujayash pa yivômjateshey jayu pa yinôôt t'apôôyshi.

²⁴ Pa nanjooylha lhpa ôcjeclô ca niyô'ji jayu pa lhech yinôôt ca jaspa ninôyiteyshi pa t'apôôyshi yiey pa tasham,

²⁵ pa t'acu'mesh'e jayu pava lhpôcôtôy lhpa lhech pa vatcufayjat'eshjop pa vachavati yiesh'e t'ajuyish na Lhcaanvacle; pa nanjooylha pa yan'apee jayu pa vatcufayjat ja itôvat'esh,

²⁶ pa t'acuumjam jayu tatsha pa vatcufayjat'esh pa chiycôvjiyan pa napjunsham jayu yiey ja itôvat'esh ti vatcufayjatjop ti chiyaychavalhch'e. “Ca nivaclhitajesh ja vatcasinô ti yiyôjayanshi lhpa ôcjeclô pa yinôôt t'apôôyshi,

²⁷ nan lhjunash lhpa lhech ca ninvooytajeeshemch'e pa lhch'acfa, vooy pa lhech yinôôt tô'lha pa vatpôfiyujayash nôyiteyshi jayu pa t'apôôyshi ti yiey pa lhcachi' lhpa lhech pa yucanatshi jayu pa nisa' jayu ca nitôctsôy, vooy lhpa lhech ôcjeclô chinvaych'aclaja jayu pa vatpôfiyujayash ti yi'shi' papi lhchifas.

²⁸ Taj ti lhpa ôcjeclô ti chiylheclôôjtajesh atesha, pa tan jayu pa ca lhjunasheesh pa caajem jayu papi lhcles.

²⁹ “Nôque vatyôjijatjop pa lhjunashch'e lhpa ôcjeclô ti ninvooyshemch'e pa lhch'acfa shi' pa lhech ti nichavat'esh'in,

³⁰ ja't'ajesha ti yilheclôjtaj atesha ti nichavatesh'in pa nivacle pa ca nitôlh'ejop lhpa lhch'acfa. Pa lhech vatach'acfa isjop jayu ca ninachelhey lhpa lhch'acfa yiey na Lhcaanvacle, vooy ja vatcasinô pa nasnatshem jayu yiey na t'ônashesh na vatyôjijat.

³¹ Vooy pa vatach'acfa tan jayu ca natmeneshlhavach, taj ti ca lhetaja lhpa ôcjeclô ti tamenlhavach lhpa lhech ti chiyclôyitesh jayu pa lhnivalhcheyash.”