Números 4 - Nivaclé Bible

Pava lhcumjatesesh papi levitas

¹ Pa Lhcaanvacle yiyôjiesha pa Moisês shi' pa Aarón pa yit'esha:

² “Asnateshjop pa t'ajuya ti chiyitsjuulh, ca chinasclanvatich'e pa lhpôc'ôcshamsha'ne shi' jat'ajôôjamsha'ne japi levitas lhcles ja Coat

³ japi tôlh'e treinta shi' ti yamey cincuenta java lhnicôpes pa t'aplhuqu'e', japin yijpô'yesh ti t'acum'een ja Tsha'nuvo'esh ti Chivatvan'e.

⁴ “Vooy ja lhcumjayash japi lhcles ja Coat ya'shesh ti chiy'isiyan, ti nôque lhjunashesh:

⁵ Meelh japi vatachifas ca nuytajey pa nôyish, vooy ja Aarón shi' japi lhcles pa nanclan'e jayu ja uj sivôclôc lhayeech ti yiey pa chiyuy'een ja yaash ti is'ôcji lhtôvash, pa yip'ooj'e jayu lhja vatcaqueclitôshi yeclônilh ja yich'e' chivatpeya'esh.

⁶ Pa nanvayjatchisham jayu java tnôjichey clasach'esha'ne, nanc'aatsham jayu pa sivôclôc lhayeech yucch'e piclô, pa nijucjuqu'e java yicloy t'ajuya ti chiychaaj.

⁷ Pa nanc'aatsham jayu shta pa sivôvlôc lhayeech yucch'e ca nich'anesh'apee ja vattsaccunajavat ti Chit'ajuyish'e, pa nich'anesh'apee shta java titjey, java yacutshiyis, java vat'iyôjatshiyis shi' java tacfeyes t'ajuya pa vatcufayjat'esh pa ôtjayetas t'i', lhech lhjunasheesh lhpa yucuve chiycufa'yesh'in yajatesh.

⁸ Pa nanvayjatchisham ca nich'anesh'apee lhacôm'a ja ve'lha sivôclôc lhayeech yuc, pa nip'ooj'e jayu ja tnojiche clasach'e, pa isjop jayu ca nijucjuqu'e java yeclôy ca nichaaj.

⁹ Pa nanjooylha ca natcum'e jayu ja ve'lha sivôclôc lhayeech yucch'e pa nip'ooj'e jayu lhja t'ajuya ti chitselhô'lha, java itôtas, java chiyjujquiyinesh, java t'ôôy titjey shi' lhacôm'a java tacfeyes chiycheneshjop'in pa lhape'.

¹⁰ Lhacôm'a cavôque pa niclôpjalhesham jayu java tnojichey clasa'ch'esha'ne pa yijucjuqu'e jayu java yeclôy ca nichaaj.

¹¹ “Pa nanc'aatsham jayu shta ja ve'lha sivôclôc lhayeech yucch'e ca nich'anesh'apee ja itôvat'esh pa clesanilh cojiyaj, pa niclôpjalhesham java tnojichey clasa'ch'esha'ne pa nijucjuqu'e java yeclôy ca nichaaj.

¹² Pa nanjooylha jayu ca nantôqu'e java t'ajuya ti chiychenesh ti chit'acum'ôcjiin ja is'ôcji lhtôvash pa nich'anesh'apee jayu ja ve'lha sivôclôc lhayeech, pa niclôpjalhesham jayu java tnojichey clasa'ch'esha'ne pa yicha'jesh jayu shta java yeclôy chijucjuqu'e.

¹³ Pa isjop ca nicleshch'e pa lhôtje shi' pa shnomaj yiey ja itôvat'esh, pa nanjooylha ca nip'ooj'e ja ve'lha sivôclôc lhayeech yacutch'e.

¹⁴ Pa nanvayjatchisham ca nan'apee lhacôm'a java chiycheneshjop ti chit'acu'mesh'e pa vatôclôjqueyash yiey ja itôvat'esh: java fayjoc t'ajuya, java ts'amtas, java joquitas, java us tacfeyis; pa nanjooylha lhacôm'a java chiycheneshjop ja itôvat'esh. Lhacôm'a cavôque pa nich'anesh'apee jayu java tnojichey clasa'ch'esha'ne shi' java yeclôy t'ajuya ti chiychaaj.

¹⁵ Meelh ja Aarón shi' japi lhcles yivaclhitesh ti yiclôpjalheshamsha'ne lhacôm'a java lhasnôyjes, ti palha vatjumte'a ca nuyey ja nôyish, pa iseemjop jayu ca ninachey japi lhcles ja Coat ca jaspa yichaajvatich'e lhacôm'a. Taj ti sasjop ca nit'ajayesha java lhpôcôtôy java lhasnôyjes, jaspa tanca nivafsha'ne. Lhacôm'a cavôque yiey ja Tsha'nuvo'esh ti Chivatvan'e java lhech isjop ti nichaaj japi lhcles ja Coat.

¹⁶ Vooy ja Eleazar, lhaôs ja vatcasinô Aarón, isjop jayu ca nicha'jesh ja lhape' t'ajuya java itôtas, ja acôjqu'e pa lhniish ja vatshachivo, java chiycôvjiyan vatcufayjatesesh javan yajatesh ti chinjutyam, shi' ja lhape' chiyvenchat. Shi' shta ti vanujumatsenesh jayu ja is'ôcji lhtôvash shi' lhacôm'a javan yi'ôcji, shi' java t'ajuya lhasnôyjes.”

¹⁷ Pa Lhcaanvacle yiyôjiesha pa Moisês shi' pa Aarón pa yit'esha:

¹⁸ “Ya aj ca avashanem japi lhpôc'ôcshamsha'ne ja Coat ca nôcc'oya japi levitas.

¹⁹ Ca jaspa tanca chinclôyitesh japi lhech pa lhavafi ca nit'ajaytaja java lhasnôyjes, pa isjop ca nôque lhfanisheesh: vooy ja Aarón shi' japi lhcles tanyôjijayjop jayu ca ve'lhaa ts'ivee ca niteetshe'ma pa ca lhfanishtajeesh shi' java ca nichaajtaj.

²⁰ Nôque lhjunash japi lhech tan jayu ca nôc'ôcji papu ca ve'lhaa ca nivan java lhasnôyjes, pa tanca lhecheesh ca nivaf.”

²¹ Pa Lhcaanvacle yiyôjiesha pa Moisês pa yit'esha:

²² “Asnatesh shta pa t'ajuya ti chiyitsjuulh, ca asclanvatich'e ja lhpôc'ôcjamsha'ne shi' pat'ajôôjamsha'ne japi lhcles ja Gersón

²³ japin tôlh'e' treinta shi' japin yôj'e' cincuenta java lhnincôpes, japin yijpô'yesh ti t'acum'een ja Tsha'nuvo'esh ti Chivatvan'e.

²⁴ “Vooy pa lhcumjayash'in japi lhcles ja Gersón nôque lhjunash jayu:

²⁵ Isjop jayu ti yichaaj java us sivôclôc lhayjey yiey ja is'ôcji lhtôvash ja Tsha'nuvo'esh ti Chivatvan'e, ja chiychenesh'apee tnojichey clasa'ch'esha'ne pa nich'anesh'apee, ja uj sivôclôc lhayeech yiey ja chiyuy'een ja Tsha'nuvo'esh ti Chivatvan'e,

²⁶ java us sivôclôc lhayjey yiey ja clayôych'e, pa sivôclôc lhayeech yiey ja chiyuy'een ja clayôych'e ti yichjop ja is'ôcji lhtôvash shi' ja itôvat'esh, java t'ajuya lhniyjôyesh shi' lhacôm'a java chiycheneshjop pa vatcumjayash'e.

²⁷ Vooy ja Aarón shi' japi lhcles lhavôseshjop jayu japi lhcles ja Gersón pava ca natcuumtaj'e ca nasnatajesh shi' ca nichaajtaj. Avaatsheelh lhtanch'anjayeshelh jayu java ca nasnatajesh japi lhech.

²⁸ Côque lhcumjayasheesh ja lhpôc'ôcshamsha'ne japi lhcles ja Gersón ti yiesh'e ja Tsha'nuvo'esh ti Chivatvan'e, ti yiclôvalhem ja Itamar, lhaôs ja vatcasinô Aaron.

²⁹ “Asnatesh shta ja t'ajuya ti chiyitsjuulh japi lhcles ja Merari, ca asclanvatich'e ja lhpôc'ôcshamsha'ne shi' japi t'ajôôjamsha'ne.

³⁰ I'sesh'e lhacôm'a japi tôlh'e treinta shi' japi yôj'e cincuenta java lhnincôpes, japi yijpô'yesh ti t'acum'een ja Tsha'nuvo'esh ti Chivatvan'e.

³¹ Pa lhcumjayash'e ti yiey ja Tsha'nuvo'esh ti Chivatvan'e pa yichaaj jayu java yeclôy t'iyas yiey ja is'ôcji lhtôvash, java chiyiyitesh'e, java vantsemaaj shi' java lhafoclesh,

³² java vantsemaaj yiey ja clayôych'e ti yamjop ja is'ôcji lhtôvash, java lhafoclesh, java vantsemajc'oya, shi' java lhniyjôy shi' lhacôm'a java t'ajuya ti chit'acum'een. Avaatsha isjop jayu ca ve'lhaa ts'ivee ca at'eshem ca nichaaj.

³³ Nôque lhcumjayashesh yiey ja Tsha'nuvo'esh ti Chivatvan'e, ti lhayôjiesha jayu japi lhpôc'ôcshamsha'ne lhcles ja Merari ti yiclôvalhem jayu ja Itamar, lhaôs ja vatcasinô Aarón.”

³⁴ Vooy pa Moisês, pa Aarón shi' papi lhanvaclesesh papi vatachifas pa yitsjuulh ti yisclanvatich'e pa lhpôc'ôcshamsha'ne shi' papi t'ajôôjamsha'ne papi lhcles pa Coat

³⁵ papin tôlh'e treinta shi' papi yôj'e' cincuenta pava lhnincôpes, papin yijpô'yesh ti t'acum'een pa Tsha'nuvo'esh ti Chivatvan'e,

³⁶ papi nivacle ti chiyi'sesh'e pa dos mil setecientos cicncunta ti yamvatsham.

³⁷ Nôque t'ajôj'e papi lhcles pa Coat ti t'acum'een pa Tsha'nuvo'esh ti Chivatvan'e, yiey pan lhjunash ti yitsjuulh pa Moisês shi' pa Aarón pan t'ônashem ti yiyôjiesha pa Lhcaanvacle pa Moisês.

³⁸ Papi lhcles pa Gersón, ti chiyisclanch'e pa lhpôc'ôcshamsha'ne shi' pat'ajôôjamsha'ne,

³⁹ papin tôlh'e' treinta shi' papi yôj'e' cincuenta pava lhnincôpes papi lhech yijpô'yesh ti t'acum'een pa Tsha'nuvo'esh ti Chivatvan'e,

⁴⁰ pa dos mil seiscientos treinta.

⁴¹ Côque t'ajôôj papi lhcles pa Gersón ti t'acum'een pa Tsha'nuvo'esh ti Chivatvan'e, yiey pan lhfanishesh ti yisnatesh pa Moisês shi' pa Aarón ti yiyôjiesha pa Lhcaanvacle.

⁴² Papi lhcles pa Merari, ti yisclanvatich'e pa lhpôc'ôcshamsha'ne shi' pat'ajôôjamsha'ne,

⁴³ papin tôlh'e' treinta shi' papi yôj'e' cincuenta pava lhnincôpespapin yijpô'yesh ti t'acum'een pa Tsha'nuvo'esh ti Chivatvan'e,

⁴⁴ papi lhech tres mil doscientos.

⁴⁵ Nôque t'ajôôj papi lhcles pa Merari ti t'acum'ôcjiin pa Tsha'nuvo'esh ti Chivatvan'e, yiey pan lhfanishesh ti yitsjuulh pa Moisês shi' pa Aarón pan t'ônsheshem pa Lhcaanvacle pa Moisês.

⁴⁶ Vooy pat'ajôôj ti yamvatsham papi levitas ti yitsjulheelh pa Moisês pa Aarósn shi' papi lhanvaclesesh papi Israel lhavos ti yisclanvatich'e pa lhpôc'ôcshamsha'ne pat'ajôôjamsha'ne,

⁴⁷ papin tôlh'e treinta shi' papi yamey cincuenta pava lhnincôpes papi lhech yijpô'yesh ti t'acum'een pa Tsha'nuvo'esh ti Chivatvan'e,

⁴⁸ pa ocho mil quinientos ochenta.

⁴⁹ Côque chiyitsjuulh chiyisnatesh yiey pan t'ônashesha pa Lhcaanvacle pa Moisês, pa ve'lhee ts'ivee ti chiyôjisha pava ti yisnatesh shi' pava ti yichaaj, pan t'ônashem pa Lhcaanvacle ti yiyôjiesha pa Moisês.