Números 20 - Nivaclé Bible

¹ Pa vatjutsa' jive'cla pa yincôôp ti yamey'in papi israelitas pa am'e pa'na lhey Zin, pa mônlheeen muc yiey pa Cades. Lhech vaf'e' lhpa María pa lhech chitish'ec'oya.

² Nan lhjunash papi nivacle ti amem pa yinôôt, pa tayvane ts'ivee lhacôm'a pa caaj pava yit'eshaan pa Moisês shi' pa Aarón,

³ pa yit'eshaan ts'ivee pa Moisês: —¡Tajulhtajey ca shtavafelhsha'ne vatjuulh cap'elh israelitas capin yiclônsha'ne pa Lhcaanvacle!

⁴ ¿Ta t'e lhayaash ti nôque nacha'jelhshi napi lhtachifas pa Lhcaanvacle yiey nôque am'e pa'na? ¿Lhteetshelh t'e ca vafeelhsha'ne yivaatsheelh shi' nava yiclôyelh?

⁵ ¿Ta t'e lhayaash ti lhtsayjatelh'een ja Egipto, pa lhaschaje'lhey nôque uj ti tavijatay? Yiey nôque sasjop pa ca chinuqu'e; am'e pava higocuy, nilhecha pava ôtjayetacuy pa nilhecha shta pava granadacuy; ¡nilhecha ca nicaaj pa yinôôt ca chinyôji'!

⁶ Vooy pa Moisês shi' pa Aarón tayjop papi lhchifas, pa yichey ti yich'ôcji pa Tsha'nuvo'esh ti Chivatvan'e. Pa lhech'e ti tanjuyshichamch'e pa yamjata cotsjaat pava lhtacoc. Pa lhechesh pa lhôclôjqueyash pa Lhcaanvacle pa tanôclitem,

⁷ pa vooy pa Lhcaanvacle pa yit'esha pa Moisês:

⁸ —Acum'e na avcôjat, ca nefen'ash na achecla' Aarón, pa ayelhvane lhacôm'a napi achifas. Meelh ca vi'tajelh'e t'ajuyish lhacôm'a pa ayôjaa lha utej ca nitôôlhsham pa yinôôt, pa lhavan jayu lha utej ti nachfach'ee pa yinôôt jaspa niyôji napi lhech shi' shta nava lhclôy.

⁹ Pa Moisês pa t'acum'e pa lhavcôjat ti yie' t'ajuyish pa Lhcaanvacle, yiey pan t'ônashesha ti yiyôjiesha;

¹⁰ Pa nijôôylha pa Moisês shi' pa Aarón ti tayelhvane papi lhchifas yiey pa lhavôj'e lhpa utej, pa yit'esha pa Moisês: —Ach'anelhyiy, napi ojiyis: ¿Tam'ey ti isjop t'e ca jatô'lhesham pa yinôôt anôque utej, ca jaspa ayô'elhshi?

¹¹ Pa yit'esh côque, pa vooy pa Moisês pa yôclôjquisham pa t'ituuc pa napu'esh ti yic'ônsha lhpa utej pa lhavcôjat, pa nachfach'ee pa uj yinôôt. Pa nôque lhjunash papi nivacle shi' pava lhclôy pa yiyôelhshisha'ne pa yinôôt.

¹² Taj ti pa Lhcaanvacle pa yit'esha pa Moisês shi' pa Aarón: —Tôlhelh'a avaatsheelh ti lh'aminatelh ca ascafiyanelh pa naatsôclôjelhc'oya japi Israel lhavos pa tanca amelhsham jayu napuque achifas ja cotsjaat jan jajutajelh'ay.

¹³ Nôque yinôôt yalhatôlh'e'in lhey Meriba, pan yie' papi Israel lhavos ti tônesh'in pa Lhcaanvacle pa lhech nôclitem pa lh'isiyasha'ne.

Papi Edom lhavos yishiyanem ca nitsavalheyshi papi Israel lhavos

¹⁴ Tôlh'e' pa Cades, pa Moisês ti yichen papi t'ajôôjô lhcachenjas yiey pa lhcaanvacle yi'shi' pa cotsjaat Edom, pa yit'esha ts'ivee: “Napi avelhavot Israel lhavos tsichenelh'ay ti yit'esh'ay: ‘Avaatsha natô'ya jô java tavijatayelhyam java vaclanelhyam'in.

¹⁵ Capi yicchevot'elh yichey'in ja Egipto pa cajuqu'e ti lhech mônlheeen, taj ti japi Egipto lhavos niysa' ca lhfanishelhyish, yijunashelhch'ejulh capi yicchevot'elh;

¹⁶ pa lhechesh pa jaya'lhelhey pa Lhcaanvacle ca nits'efenelh, pa lhech yipe'ya ja yôjôjelh pa nichenelhyiy ja ve'lha lh'ángel pa tsayjatelh'e ja Egipto. Yiey nan jôvelh'e nôqueesh, yiey na yitsaat yi'shi' na Cades, yiey nan yôj'esha'ne na acootsjat.

¹⁷ Jayaalhshelh'a ca avashanelhyam ca jatsavalhelhsham na acootsjat. Niyit'eshelh ca yitsavalhelhsham pava acac'ovtes, pava lhavancuelhshi, pa nilhecha pava avôtjayetachat. Tanca yiyô'elhshi pa yinôôt yiey pava aqu'itsjeselh. C'uyelhch'e jayu jô pa nôyish pa tanca vena yuyelh'ec'oya pa jecjetelhey pacham jayu na acootsjat.’ ”

¹⁸ Taj ti pa lhcaanvacleesh pa Edom pa yicuulh ti yit'esh: —¡Niyit'esh ca atsavalhelhsham na yicootsjat, pa jayjuy'ajulh jayu pa jachen'ajulh napi yicavos c'afoquelhay!

¹⁹ Japi Israel lhavos pa yashanitjatajem: —Jatsavalhelhch'e jayu na nôyish, vooy yivaatsheelh ja't'ajesha nava yiclôyelh ca niyô'tajshi pa yinôôt yiey pava aqu'itsjes, pa c'ashayanelh jayu. Pa jave'lhanelh pa nôyish pa c'uyelhch'e pa jôquelhey pacham na acootsjat.

²⁰ Taj ti pa lhcaanvacleesh pa Edom pa yicuulh: —¡Niyit'eshelh'am ca atsavalhelhsham! Pa yichjuulh papi Israel lhavos papi lhcavos c'afoquelhay t'unvatshm'in vatclônjanjas shta,

²¹ pa ninvashanem ca nitsavalhsham pa lhcootsjat. Pa lhechesh papi Israel lhavos pa vooysha'ne paelh lhnôyish.*xk*

Pa lhavafi pa Aarón

²² Pa lhacôm'a papi lhchifas pa Israel pa tôlhshaam pa Cades pa yitsavalhey lhpa utiyuc lhey Hor.

²³ Lhech'e, ti yiey pa yôj'esha'ne vatjulh pa cotsjaat Edom, pa vooy pa Lhcaanvacle pa yit'esha pa Moisês shi' pa Aarón:

²⁴ “Vaf jayu na Aarón, pa tan jayu ca nôcjaam na cotsjaat nan jajutey napi Israel lhavos, lhayaash ti meelh ti lhôveelhjop ja yinôôt yalhatôlh'e'in lhey Meriba ti naanc'ashamshelh avaatsheelh java c'ayôjieshelh'a.

²⁵ Avaatsha, Moisês, achaaj na Aarón shi' na lhaôs Eleazar ca meelh'apee na lhôtôj'e lha utiyuc lhey Hor;

²⁶ lhech'e pa anclanshic'oya jayu na Aarón lha t'uyjatshiyjop ti vatcasinô'esh, pa uyjatch'e na Eleazar. Lhech vaf'e' jayu na Aarón.”

²⁷ Pa yisnatesh pa Moisês pan t'ônashem pa Lhcaanvacle. Pa yivanesh lhacôm'a papi Israel lhavos papu lhech ti yich'apee lhpa utiyuc Hor,

²⁸ pa lhech'e ti niclanshic'oya pa Moisês lhpa t'uyjatshiyjop pa Aarón ti vatcasinô'esh ca yuyjatch'e pa Eleazar.*xl* Pa mônlhe'e yiey lhpa utiyuc ti vaf'e' pa Aarón;*xm* pa vooy pa Moisês shi' pa Eleazar pa tôlh'apee ts'ivee lhpa utiyuc ti tapecl'in.

²⁹ Pa yitô'ya ts'ivee papi Israel lhavos pa Aarón ti vaf, pa yôyanch'e ts'ivee pa yicheshch'e pava treinta nalhus.