Números 18 - Nivaclé Bible

Pava chiycumjatesh'in chivujuychatesha papi vatcasinôc shi' papi levitas

¹ Pa Lhcaanvacle yit'esha pa Aarón: “Avaatsha shi' japi acles, nôque jap'elh ave'lheelhsham ja tc'a'sham ja Leví, ti chinatsôôtjateshelhjop ca chisastajeesha'ne ca chinatjuytajeshjulh na is'ôcji lhtôvash; taj ti ve'lheey avaatsha shi' napi acles chinatsôôtjateshelh pava chisasesha'ne ca asnatajeshelh ti chinacumjateshelh'in ti avatcasinôcshelh.

² Taj ti isjop ca asnatshelhem jap'elh ave'lheelhsham ja tc'a'sham ja Leví, ti yefen'ash shi' napi acles na acumjayash yiey na Tsha'nuvo'esh ti Chivatpeya'esh.

³ Japi lhech yiesh'ajop jayu na acumjayash shi' na lhcumjayash'e na Tsha'nuvo'esh, taj ti sasjop jayu ca natc'uya java chiycheneshjop na is'ôcji lhtôvash pa tanca lhecha ja itôvat'esh, pa vena lhjunasha pa nivafsha'ne jayu shi' shta avaatsheelh.

⁴ Pa isjop jayu ca atônôycheelhey na vatcumjayash'e na Tsha'nuvo'esh ti Chivatvan'e yiey shta lhacôm'a java chiycumesh'in ti chiyetônjop. Taj ti nive'lhaa jayu papu venalha ca natc'uyeshelh'a avaatsheelh;

⁵ avaatsheelh lhtanyôjijayshelh na vatcumjayash'e na is'ôcji lhtôvash shi' na itôvat'esh. Nôque lhjunash pa tanca t'ôyi'sheey jayu ca yasuyaa japi Israel lhavos.

⁶ Yivaatsha vena janshic'oya jayu japi avelhavot levitas jap'elh Israel lhavos ti jajutelh'am avaatsheelh, secl'esh ca natcum'een nava vatcumjavshay'e ja Tsha'nuvo'esh ti Chivatvan'e

⁷ taj ti ve'lheey avaatsha shi' japi acles isjop jayu ca acuumjelh'in nava chiycumesh'in ti vatcasinô'esh ca nôvesh'e ja itôvat'esh ja't'ajesha ca nôvesh'e t'ôyiish na uj sivôclôc lhayeech. Nôque chiycumesh'in t'ajuyelh'a avaatsheelh, lhayaash yivaatsha c'atsôôtjateshelh ca acuumjelh'in ti avatcasinôcshelh. Ca nicaajtaj papu ti nicumjayutaj'e ti vatcasinô'esh, ti nilhecha, pa tanutsjayesh jayu pa lhavafi.”

Pava chiymônlhanitesh papi vatcasinôclesh shi' papi levitas

⁸ Pa Lhcaanvacle pa yit'esha pa Aarón: “Yivaatsha c'alhechiyanesh ca anujumatsenesh pava vatcufayjates ca chinasnatajeshyam. Lhacôm'a pava vatcufayjates lhasnôyjes ti yisnateshyam japi Israel lhavos, pa jajut'ay jayu avaatsha shi' japi acles ti chiyetôn'ajop; côque vat'ônashjop yajatesh jayu.

⁹ Pava vatcufayjates'jop ti chinapjunsham, ti t'ajuy'a jayu lhacôm'a pava vatcufayjatesesh ti chiycôvjiyan shi' pava chiycufa'yeshjop pa sasch'e ja't'ajesha pa chitameneshlhavach ti nijutyiyijop japi Israel lhavos; lhacôm'a cavôque vatcufayjates lhasnôyjes t'ajuy'a jayu shi' napi acles.

¹⁰ Lhacôm'a japi yitsjôy ti yielh'atshi isjop jayu ca nituj pava lhech vatcufayjates, taj ti yiesh'e jayu pa is'e' ca nitujtaj, ti chiy'isiyanjop.

¹¹ “Jajut'ay jayu shta avaatsha shi' japi acles yitsjôy shi' japi ôcjeclôy ti mônlheesh ti yi'ajop pava tsivujuychatesh lhcufayjates japi Israel lhavos ti nichaajyi. Nôque vatyôjijat ninvôômji. Pa ca naôvtaj'e japi tô'lha ja ajôôjam, ca nivat'isiyan, pa nituj jayu.

¹² Pa jajut'ay jayu shta pava vatjutsa' lhay ti nichaajyi'in yinjôt pa nincôôp japi Israel lhavos: pa yaash ti isshi' lhape', pa yaash ti isshi' ôtjayetas t'i' shi' pa trigo.

¹³ Lhjunashjulh jayu shta pava vatjutsa' lhay ti niclanshi japi lhech ti nijutyam ti t'ajuy'a jayu. Pa ca naôvtaj'e japi tô'lha ja ajôôjam, ca nivat'isiyan, pa nituj jayu.

¹⁴ Lhacôm'a pa vatcufayjat ti tsivenchatesh japi Israel lhavos,*xh* ti t'ajuy'a jayu.

¹⁵ “Lhacôm'a japi vatjutsa' lhclesh japi Israel lhavos, jat'ajesha java vatjutsa' lhcles java lhclôy yaquisetes ti nijutyam ts'ivee, ti t'ajuy'a jayu. Taj ti nan lhjunash papi vatjutsa' lhcles papi nivacle shi' pava vatjutsa' lhcles pava lhclôy yaquisetes ca sastaja, pa jayaalhsha jayu pa ve'lha ca nancayôjatey.

¹⁶ Pan chincayôjatey isjop jayu ca nishayaneshch'e pa ve'lha lhjive'cla ca nit'ôntajshi pa lhavaatjayash, pa lhecha jayu pava ve'lhanôjesh tinshanjay climsha'ne, pavan chiycumesh'een ja is'ôcji lhtôvash, once gramos pa lhcaclecli.

¹⁷ Taj ti ya aj ca avashanem jayu ca nancayôjatey pava vatjutsa' lhcles pava vôcôc, pava tashinshtas shi' pava tashinshtaychey. Pava lhech chiyisclansha'neyam, pa tajulhey ca aclônsha'ne; vooy pava lhavoyey pa ôtsiy'apee jayu ja itôvat'esh, vooy pa lhôtje pa anapjunsham jayu ti c'acônch'e pa lhniish.

¹⁸ Avaatsha amônlhaesh jayu pa t'asjaan lhech lhjunashesh shta pa t'oot pa yaquiset pa lhech vatcufayjat chiyvujuchat, shi' lhpa lht'oycha lhfayishey.

¹⁹ Lhacôm'a pava yineylhatam japi Israel lhavos ti yivenchatyam, pa jajut'ay jayu shi' japi acles yitsjôy shi' japi ôcjeclôy ti jôjjeclay mônlha'ajop. Nôque vatyôjijat ninvôômji. Nôque chivatpeya'esh tanca chinanvaych'aclaj, ôyjôlhôyech'esh, ti jasnatesh'am shi' papi acles.”

²⁰ Pa Lhcaanvacle yit'esha pa Aarón: “Avaatsha am'am jayu pa cotsjaat pa ca natsôt'ajesh yiey japi Israel lhavos, jan lhjunsh jap'elh Israel lhavos. Yivaatsha tsitsôt'aj'ash jayu shi' ti nanôyôjeshi jayu japi Israel lhavos.

²¹ Vooy japi levitas jajutey jayu ca nitsôt'ajesh pa napu'nôjesh*xi* t'iya'esh pava nijutyam japi Israel lhavos lhcavcalhjes, ti lhasha'esh pa lhcumjayash'e yiey ja Tsha'nuvo'esh ti Chivatvan'e.

²² Vooy jap'elh Israel lhavos sasjop jayu ca natc'uya ja Tsha'nuvo'esh ti Chivatvan'e, lhayaash ti yisnatajeshem pa sasch'e ca namjatey pa lhavafi.

²³ Vooy japi levitas vi'sesh ti t'acum'een jayu ja vatcumjayash'e ja Tsha'nuvo'esh ti Chivatvan'e, pa chiytsôôtjateshjop pava chisasesha'ne ti chiyisnatesh. Nôque vatyôjijat ninvôômji, tôlhesh'e jayu papi vatanavôt pa namja papi lhcles. Japi levitas amem jayu pa yitsôt'ajesh cotsjaat yiey japi Israel lhavos.

²⁴ Japi lhech jajutem ti yitsôt'ajesh napu'nôjesh t'iya'esh ti nijutyam japi Israel lhavos java yicavcalhesh. Pa lhe'naa ti jayeetsha ti amem jayu pa yitsôt'ajesh cotsjaat yiey japi Israel lhavos.”

²⁵ Pa Lhcaanvacle yiyôjiesha pa Moisês pa yit'esha:

²⁶ “Anfacleem japi levitas ca nijutajem japi Israel lhavos pa lhech napu'nôjesh t'iyaesh pava yicavcalhesh ti jajutem ti yitsôt'ajesh, pa isjop jayu ca nasclansha'neyam pa ve'lha t'iya'esh pa napu'nôjesh ca nanjutyam.

²⁷ Côque yineylhatam jayu jan lhjunashesh pa yineylhatam japi Israel lhavos ti tcufayesh pa trigo shi' pa ôtjayetas t'i'.

²⁸ Nôque lhjunasha pa lhech t'iya'esh pa napu'nôjesh tô'lha ti tcufayesh japi Israel lhavos, vooy japi levitas pa yivenchat jayu ti yine'mey na Lhcaanvacle ca chinjutey jayu ja vatcasinô Aarón.

²⁹ Lhacôm'a pa ca chincufaaytajesh pa isjop jayu ca chincatsônjat pa ve'lha ti yiney tanjuyi yivaatsha; vooy peelh pa chinvenchatyam pa lhech chinasclaneshiyam.

³⁰ “At'esha shta: ‘Ve'lhaaesh ca chincatsônjat pa yaash ti is ti tanjuy'yi, vooy pava mônlhee isjop ca chinjôney ti yitsôt'ajesh lhavaatsha pa trigo shi' pa ôtjayetas t'i',

³¹ pa atujelh avaatsheelh shi' japi ajôôjam yiey pan lhôvelh'e. Nôque chiyshayaneshjop pa lhcumjayash'e yiey ja Tsha'nuvo'esh ti Chivatvan'e.

³² Ve'lhaaesh ca acatsônjatelh pa yaash ti is ti tanjuy'yi, pa isjop jayu ca atujelh pava mônlha pa tanca chintôlhesha pa sasch'e; Nôque lhjunash pa tanca chinclôqui'esh jayu pava lhcufayjates lhasnôyjes japi Israel lhavos, pa tan jayu ca nitanutsjayesh pa lhavafi.’ ”