Números 17 - Nivaclé Bible

Pa lhavcôjat pa Aarón ti tôlhshi'

¹ Pa Lhcaanvacle yiyôjiesha pa Moisês pa yit'esha:

² “Ayôjiesha napi Israel lhavos ca ve'lhaa'e ts'ivee japi lhanvaclesesh ja tc'a'sham ca nanchaaj pa lhavcôjat, ja't'ajesha pava doce lhavcôjates. Avaatsha i'sesh'e jayu pa lhey ca ave'lhan'e ts'ivee pava lhavcôjates,

³ vooy pa lhavcôjat tô'lha ja tc'a'sham ja Leví pa i'sesh'e jayu ja lhey ja Aarón, pa isjop ca nicaaj pa lhavcôjat ca ve'lhaa ts'ivee pa lhanvacleesh ja tc'a'sham.

⁴ Pa an'e' yiey ja Tsha'nuvo'esh ti Chivatvan'e, yiey ja t'ajuyish'e ja vatcaqueclitôshi yeclônilh yich'e' ja chivatpeya'esh, yiey jan shtavatvanelh'een.

⁵ Yivaatsha jatôlhjatshi jayu pa lhavcôjat jan javooyshiyitam, pa nôque lhjunasha napi Israel lhavos pa tan ca lhetlha nôqueshi ca nasinôquieshelh pa niysa' yiey yijuyish.”

⁶ Vooy pa Moisês lhech yit'esha papi Israel lhavos, pa ve'lhee ts'ivee papi lhanvaclesesh pa tc'acshamsha'ne ti tcufayesh pa lhavcôjat, pa nayjatvane pava doce lhavcôjates. Yi'shi' shta pa lhavcôjat pa Aarón.

⁷ Vooy pa Moisês pa yan'e' t'ajuyish pava lhavcôjates pa Lhcaanvacle yiey pa Tsha'nuvo'esh ti Chivatpeya'esh,

⁸ c'oya ti nalhu ti yichey pa Tsha'nuvo'esh pa yi'van pa lhavcôjat pa Aarón, tô'lha pa tc'a'sham pa Leví, ti tôlhshi':*xg* ti nachfach'ee pa tôlheej pa caaj pava lhôvas, shi' ti caaj pava lhay yôquenshi lheyesh almendras.

⁹ Pa lhechesh pa Moisês pa yayjat'e t'ajuyish pa Lhcaanvacle lhacôm'a pava lhavcôjates pa nôclitem papi Israel lhavos. Ti nôjeshch'e ti yi'van ts'ivee pa ve'lha ts'ivee ti yichaaj pa lhavcôjat.

¹⁰ Pa lhechesh pa yit'esha pa Lhcaanvacle pa Moisês: “Achajey na lhavcôjat na Aarón ca an'e' t'ajyish lha vatcaqueclitôshi yeclônilh yich'e' na chivatpeya'esh, pa lhech asclan'esha'ne jayu ca chincajôyshiyana napuque lhtachifas ojiyis. Asnateshjop jayu ca jaspa nivômesh ca nitsasinôquiesh pa niysa' yiey yijuyish ca ya aj ca nivafsha'ne jayu.”

¹¹ Pa Moisês yisnatesh lhacôm'a pa t'ônasheshem pa Lhcaanvacle ti yiyôjiesha,

¹² taj ti papi Israel lhavos pa yit'esha ts'ivee pa Moisês: “¡Lhts'iistanjatelh'in! ¡Yalhacôm'aelh ti javafelhsha'ne jayu!

¹³ Lhacôm'a papu ca natc'uytaja na is'ôcji lhtôvash yitsôt'ajesh pa Lhcaanvacle, pa vafsha'ne jayu. ¿Tam'ey ti javafelhsha'ne jayu lhacôm'a?”