Números 16 - Nivaclé Bible

Pa tcôfayash pa Corê shi' pa lhanclôyitsjayash

¹ Ve'lha pa levita, lhô'sesh pa Coat, lheyesh Corê,*xd* lhaôs pa Izhar, shi' shta pap'elh pu'jana nivacle tô'lha pa tc'a'sham pa Rubên, lheyisesh pa Datán, pa Abiram, lhcles pa Eliab, shi' pa On, lhaôs pa Pelet,

² pa nicôvfayu'a pa Moisês. Papi lhech tanu'elhvane pap'elh doscientos cincuenta Israel lhavos, papin lhanvaclesesh papi lhchifas, papin lhalhetsham pat'ajôôj'e papin chinôôclhanitajop ti tanch'anjay.

³ Lhacôm'a papi lhech ti tc'a'eshvane ti vatjuyjatjulh pa Moisês shi' pa Aarón, pa yit'eshaan ts'ivee: —¡Lhjunashlhaa nôqueesh! Lhacôm'a napi vatachifas ti vatvenchatem pa Dios, vooy pa Lhcaanvacle yieelhyijop lhacôm'a. ¿Ta t'e lhayaash avaatsheelh ti lhnashjateshelhc'oya ti lhtaanvacleyanshelh napi lhchifas pa Lhcaanvacle?

⁴ C'oya ti yipe'ya côque pa Moisês pa t'avuyshicham yamjata cotsjaat pa lhtaco,

⁵ pa yit'esha pa Corê shi' papin tavoqu'e: —Lhum'ashi pa nich'a nalhu pa Lhcaanvacle yitô'ya jayu pa yie' papi yitsôt'ajesh shi' papin yie' ti yivenchatlhatam*xe* pa isjop ca nanchajey pava lhcufayjates. Pa isjop jayu ca nive'lhan ca nanchajey pa vatcufayjat pan yie' papi t'acumeyshi.

⁶ Asnatshelh navôque: anchajeelh pava chiytseclô'lhey yitsôt'ajesh na Corê shi' napi t'iyôyjafas,

⁷ pa ane'lheyshi pava yichesh fayjoc, pa u'elheyshi pa acôjqu'e pa lhniish pa anelhem'e lhum'ashi yiey t'ajuyish pa Lhcaanvacle. Pa nivacle pan yie' ti t'acu'meyshi pa Lhcaanvacle, vooy pa lhech yivenchatlhatam. ¡Pa lhjunashlhaa, napi levitas!

⁸ Pa nijooylha pa yit'esha pa Moisês pa Corê: —Ach'anelhyi, levitas:

⁹ ¿Lheclôjeshelh t'e ca lhatajeesh pa lh'Dios napi Israel lhavos ti t'acumelh'ayshi avaatsheelh ti lhôveelhshi napi vatachifas Israel lhavos ti yielh'ajop pa lhech ti lhatcumelh'ôcjiin na is'ôcji lhtôvash yitsôt'ajesh pa Lhcaanvacle shi' ti lhatcumelhem'in napi vatachifas?

¹⁰ Pa Lhcaanvacle apis ti nen shi' nap'elh tô'lha na atc'a'sham, napi levitas, ti shalheema pa lhech, ¿pa nôqueesh lhnô'yelhc'oya shta ti avatcasinôcshelh?

¹¹ Tanca lhecha na Aarón ca asinôquieshelh pa niysa'; lhech pa Lhcaanvacle ti lhatjuyjulh avaatsha shi' napi ayôyjafas ti lhancôfayu'elha.

¹² Pa nijooylhach'e pa Moisês ti vancachenjaney pa Datán shi' pa Abiram, lhcles pa Eliab, taj ti papi lhech yit'esh ti yachajeshjulh: —Niyit'eshelh ca yicheelh.

¹³ ¿Lheclôjtajesh t'e ca lhataja ti lhtsayjatelh'e ja cotsjaat jan yie' pa vatts'oos shi' pa acôyech nive'lheesh ca ama jan lhjunash pa yinôôt ca jaspa asvômjatelh yiey na am'e pa'na, shi' shta ti lhen ti lhnashjateshelhyam pa anvacleyash?

¹⁴ Vooy avaatsha tanca aschaje'lhey pa ca ve'lhaa pa cotsjaat pan yie' pa vatts'oos shi' pa acôyech ti ninvô'mesh jan lhjunash pa yinôôt, pa ni'anjuteelhyam pava vatcac'ovtes pa nilhcha pava ôtjayetacuy. ¿Lhenelhyam jayu lhacôm'a ca astojonelh jan lhjunash papi taclujuy? Am, niyit'eshelh ca jôquelh'ay.

¹⁵ Pa lhechesh pa Moisês pa ujesh ti suy, pa yit'esha pa Lhcaanvacle: —¡Ya aj ca acu'meshjulh nava lhcufayjates! Yivaatsha niyichajc'oya napi lhech nilhecha pa ve'lha cuvôyutaj, mônlheesh nilhecha ca yisnatshem pa ojey ca ve'lhaa napi lhech.

¹⁶ Pa nijooylhach'e pa Moisês ti yit'esha pa Corê: —Anatshey lhum'ashi avaatsha shi' napi ayôyjafas yiey t'ajuyish pa Lhcaanvacle. Vooy na Aarón lhech yie' jayu shta.

¹⁷ Pa ave'lhaaelh'e ts'ivee ca anchajeelh pava chiytseclô'lhey pa ane'lheyshi pa acôjqu'e pa lhniish. Avaatsha shi' na Aarón acha'jelh jayu vitsha pava chiytseclô'lhey pa nanshi' jayu pa nôvesh'jop jap'elh doscientos cincuenta, yiey t'ajuyish pa Lhcaanvacle.

¹⁸ Pa lhechesh pa ve'lhee ts'ivee ti yichaaj pava chiytseclô'lhey, pa yineyshi pava fayjoc yichesh shi' pa acôjqu'e pa lhniish pa yieshjop pa Moisês shi' pa Aarón yiey t'ajuyish pa Tsha'nuvo'esh ti Chivatvan'e.

¹⁹ Vooy pa Corê p'alha ti tayeshvane ti t'ajuyjulh ts'ivee lhacôm'a papi vatachifas t'ajuyish'e pa Tsha'nuvo'esh ti Chivatvan'e. Vooy pa lhasnôycheyash pa Lhcaanvacle pa tanôclitem yiey t'ajuyish papi vatachifas,

²⁰ vooy pa Lhcaanvacle pa yit'esha pa Moisês shi' pa Aarón:

²¹ —¡Atanuelhc'oya napuque vatachifas, ti jatif'e jayu tatsha!

²² Taj ti papi lhech pa t'avuyshichamch'e ti yamjata cotsjaat pava lhtacôc, pa yit'esh ts'ivee: —Pa Dios, avaatsha lhjutem pa lhamônlhajayash papi nivacle, ¿asuya jayu lhacôm'a napi vatachifas ti tôlh'ejop pa ve'lha nivacle ti caaj pa lhsasch'e?

²³ Vooy pa Lhcaanvacle yit'esha ti yicuulh pa Moisês:

²⁴ —Anfacleem lhacôm'a napi Israel lhavos ca nitanuc'oya na tsha'nuvo nan yie' na Corê, na Datán shi' na Abiram.

²⁵ Vooy pa Moisês pa vatsavat pa lhechlha voqu'eshi papi nitaôvclaseesh Israel lhavos, ti yichey pan yie' pa Datán shi' pa Abiram.

²⁶ Pa lhechesh pa yit'esha papi vatachifas: —Atanuelhc'oya nava lhatsha'nuvos napuque nivacle ojiyis, pa ya aj ca ajayelha nava yitsôt'ajesh, pa jaspa avaatsheelh ya aj ca avafshelh pa lhsasch'e napi lhech.

²⁷ Vooy papi vatachifas pa tanu'c'oya pan yie' pa Corê, pa Datán shi' pa Abiram. Pa Datán shi' pa Abiranm yi'shi' pa yuy'een pa lhatsha'nuvos, nôquee papi lhjayas shi' papi lhcles.

²⁸ Vooy pa Moisês pa lhetipa yit'esha: —Navôque jac'alhtanesh jayu ca lhechtaja pa Lhcaanvacle ti tsichen ti jasnatesh lhacôm'a cavôque, ti nintôlhyi ca yisnatesh yivaatsha.

²⁹ Ca lhechtaja napuque nivacle ti vafsha'ne jan lhjunash pap'elh nivacle ti vaf, pa nilhecha pa Lhcaanvacle ca nascheney;

³⁰ taj ti ca lhechtaja pa Lhcaanvacle ca nasnatajeshjop pa yaash t'unaj, vooy na cotsjaat pa nifalh ca nicôctesch'e napi lhech shi' lhacôm'a nava caajem, pa mônlhaasha'ne ca ninach'e tasham pa apatojqu'e na cotsjaat, pa lhechesh pa natôôyshelha jayu avaatsheelh napi lhech nivacle ti yapun ts'ivee pa Lhcaanvacle.

³¹ Vooy ti tifeshch'e pa Moisês ti tasinôy'in, pa yifalhshamc'oya na cotsjaat papi lhech,

³² pa yicôctesch'e lhacôm'a papi nivacle papi tanu'elhvane pa Corê, pa chiyu'ja pat'ajôôjamsha'en shi' lhacôm'a pava caajem.

³³ Pa mônlhasha'ne ti nach'e tasham pa apatojqu'e na cotsjaat nôquee pava lhcôquicletôy, pa nijooylhach'e ti vapecvatjulh na cotsjaat. Nôque lhjunash ti chiyayjatshi ti yi'tajshi papi Israel lhavos.

³⁴ C'oya ti chiypeya' ti tônvatsham'in pa lhacôm'a papi Israel lhavos ti yi'van ti yamjop pa vacumajvatich'ec'oya ti yit'eshvatsham'in: “¡Pa ya aj ca shinfalhc'oya vitsha na cotsjaat!”

³⁵ Jô'tajesh pa Lhcaanvacle ti nicheney pa itôj ti yivômjatsha'ne papi doscientos cincuenta nivacle ti tcufaytajesh pava chiytseclô'lha.

³⁶ *xf* Vooy pa Lhcaanvacle yiyôjiesha pa Moisês pa yit'esha:

³⁷ “Ayôjiesha ja Eleazar, lhaôs ja Aarón ca nayjat'e nava t'ajuya ti chiytseclô'lha ti yi'shi' nava ninamja ca nivutun, ca nifosey pa tojey nava fayjoc yichesh jôjjeclay mônlhashi.

³⁸ Nava t'ajuya ti yitseclôlhey capi nivacle apis ti vafsha'ne tôlh'ejop pa sasch'e mônlheesh ti chiyvenchat, lhayaash ti chiycheneshjop ti chiytseclô'lhey ti yie' yijuyish. Pa asnateshjop na lhech clesanilh nint'unch'e pa ap'ooj'e na itôvat'esh, jaspa natjuya ca chinôôclhanite'ma napi Israel lhavos.”

³⁹ Pa vatcasinô Eleazar pa nit'ôqu'e pava chiytseclô'lha pa clesanilh yucch'e ti nichaaj papi nivacle vafsha'ne ti yivutunsha'ne, pa yiyôjiesha ti yisnatesh ti chiyp'ooj'e pa itôvat'esh.

⁴⁰ Côque chiycajôyshiyanesh papi Israel lhavos ti ampapu ca venalhaa ti nilhcleseesh pa Aarón ca isaemjop ca natc'uya pa itôvat'esh ca nitisesh pa acôjqu'e pa lhniish pa Lhcaanvacle, ca lhjunasheeshch'ejulh pa vaclanem pa Corê shi' papi t'iyôyjafas. Pa lhacôm'a ti yijôneshch'e pa lhnônashesh pa Eliazar pa t'ônasheshem pa Lhcaanvacle ti yiyôjiesha pa Moisês.

⁴¹ Vooy ti nalhu pa lhacôm'a papi lhtachifas Israel lhavos pa lhechesh yasinôqui ti t'ajuyjulh pa Moisês shi' pa Aarón. Pa yit'esha ts'ivee: —¡Avaatsheelh lhclônelhsha'ne capi lhchifas pa Lhcaanvacle!

⁴² Pa lhacôm'a ti t'ôyesha ts'ivee ti yamjop pa Moisês shi' pa Aarón; taj ti papi lhech pa t'ajuya ts'ivee pa Tsha'nuvo'esh ti Chivatvan'e. Pa lhech t'aplhuqu'e lhpa vôse' ti yip'o'apee pa tanôclitesh pa lhasnôycheyash pa Lhcaanvacle.

⁴³ Pa lhechesh pa Moisês shi' pa Aarón pa yichey t'ajuyish pa Tsha'nuvo'esh ti Chivatvan'e,

⁴⁴ vooy pa Lhcaanvacle yit'esha pa Moisês:

⁴⁵ —¡Atanuelhc'oya lhacôm'a napuque nivacle, ti jaclônsha'ne jayu tatsha! Vooy pa Moisês shi' pa Aarón pa t'avuyshichamch'e pa yamjata cotsjaat pava lhtacoc,

⁴⁶ pa Moisês pa yit'esha pa Aarón: —Anchaaj na t'ajuya ti lhtseclôlhey ca anshi' nava fayjoc ti yichesh yiey na itôvat'esh pa u'eyshi na acôjqu'e pa lhniish; pa meey clap pan yie' japi lhtachifas pa a'lhajop pa Dios ca nivômjatemch'e japi lhech, lhayaash pa lhavôôc pa Lhcaanvacle ti yichesh ti palha caaj pava vatayashachey.

⁴⁷ Pa Aarón yisnatesh pava yit'esha pa Moisês pa vacumajey pan yie' papi lhtachifas tayvane. Pa vatayashachey, ti nichen pa Dios, apis ti namjam japi vatachifas. Pa lhechesh pa Aarón pa yineyshi pa acôjqu'e pa lhniish ti t'a'lheyjop pa Dios ca nivômjatemch'e papi lhtachifas.

⁴⁸ Pa nijooylhach'e ti vatsavatshi pa lhcaavju'elhvane papi apis ti vafsha'ne shi' papi jôjjeclay mônlhasha'ne, pa lhech yôjesh'e pava lhayashachey,

⁴⁹ lha'ma ti apis ti vafsha'ne papi catorce mil setecientos nivacle, pa nichinatsjuulh papi apis ti vafsha'ne ti nich'a, pan t'aplhuqu'e' ti nicôfayu pa Corê.

⁵⁰ Meelh ti vô'mesh pava lhayashachey vooy pa Aarón pa vapecley pa chiyuy'een pa Tsha'nuvo'esh ti Chivatvan'e ti tayelhvane pa Moisês.