Números 15 - Nivaclé Bible

Pava vatyôjijatesjop pava vatcufayjatesesh

¹ Pa Lhcaanvacle yiyôjiesha pa Moisês pa yit'esha:

² “Anfacleem napi Israel lhavos navôque: Meelh ca môtajelhsham ja cotsjaat jan jajutelh'ay jayu ca jaspa veelh'e,

³ pa anjuteelhyam pa vôcô jayanaj ja't'ajesha lhpa tashinshtaj ca anapjunelhsham ca asclaneshelhshiyam ti chiylhônsham ti acôjqu'e pa lhniish, ca lhechtaja ja chiyôfisjach'e ti chinfac ja't'ajesha pa chitôlhjatlhavne vatcufayjat, ja't'ajesha pa lhanfanash ti caaj pa vatc'usiyash'in,

⁴ papu ca natcufaaytajesh pa isjop jayu ca ninapshinesh'e pa napu' kilos pa climshi' isshi' chiyot'ateshi pa ve'lha litro lhape'.

⁵ Jô'tajesh pava chiycufa'yesh ti chiyit'esha pa isjop jayu ca chinapshinesh'e pa ve'lha litro ôtjayetas t'i' ca ve'lhaa'e pa tashinshtaj.

⁶ Ca lhechtaja ti chiycufa'yesh pa ve'lha tashinshtaj jayanaj, pa chinapshinesh'e jayu pa yichatjulh kilos climshi isshi' chiyot'ateshi pa yash'apee clee pa ve'lha litro pa lhape'

⁷ pa nash'apee clee pa ve'lha litro pa ôtjayetas t'i', ti vatcufayjat'esh ti c'acônch'e pa lhniish.

⁸ Ca lhechtaja ti chiycufa'yesh pa ve'lha vôcô lhaôs, ti chiycufa'yeshjop ti chiylhônsham, ja't'ajesha chiycufa'yeshjop ti chivaniisclanch'e, ja't'ajesha ja chiyôfisjatch'e ti chinfac,

⁹ pa chinapshinesh'e jayu pava ve'lhayama kilos climshi isshi' chiyot'ateshi pava npu' litros pa lhape',

¹⁰ pa ve'lheesh napu' litros pa ôtjayetas t'i', ti vatcufayjat'esh ti chinapjunsham ti c'acônch'e pa lhniish.

¹¹ Navôque isjop jayu ca asnatesh ca ve'lhan'e ts'ivee pa vôcô jayanaj, pa tashinshtaj jayanaj, pa tashinshtaj nich'a uj, ja't'ajesha pa tashinshtayche lhaôs ti lhatcufa'yesh.

¹² Pa ave'lhanjop ts'ivee pava yaquisetes ti lhatcufa'yesh pa asnateshjop jayu pava chiyjuyjata, yiey pan'tajôôj pava yaquisetes.

¹³ Lhacôm'a napi Israel lhavosesh tajulhey ca nôfisjatch'e navôque vat'ônashjop ca nasnatajeshyam pa lhcufayjat ca ninapjunsham ti acôjqu'e pa lhniish.

¹⁴ “Ca nicaajtaj pa ve'lha vena tôlhshi' ca lhechtaja papi nashelh'ajop ja't'ajesha ti nintayelh'ajop avaatsheelh, yen ti nichaajyi pa lhcufayjat ti yilhônsham ti acôjqu'e pa lhniish, pa isjop jayu ca nôfisjatch'e nava lhech ti vat'ônasheshelh'a avaatsheelh.

¹⁵ Nan vat'ônasheshelh'a avaatsheelh shi' papi vena tôlhshi' na lhech vatyôjijat ninvôômji, ti tôlhesh'e jayu papi vatanavot pa namja papi lhcles.

¹⁶ Na lhech vatyôjijat shi' na lhech vat'ônasheshelh'a caajelh'am jayuavaatsheelh shi' papi vena tôlhshi'.”*xa*

¹⁷ Pa Lhcaanvacle yiyôjiesha pa Moisês pa yit'esha:

¹⁸ “Anfacleem napi Israel lhavos navôque: Meelh ca amtajelhsham ja cotsjaat jan c'acha'jelhey jayu,

¹⁹ pa atôôlhshelh'e ca atujelh pa trigo ti tô'lha jô lhech'e, pa isjop jayu ca acatsônjatelh pa t'iya'esh ca anjuteelhyam.

²⁰ Yiey jan lhjunash ti lhanjuteelhyam pa vatjutsa' t'iya'esh pa trigo chiyôcfaash, lhech afanisheeshelh jayu shta pa vatjutsa' ti lhot'atelhshi ti lhasnatshelhyam lhpa yucuve ti lhanjuteelhyi.

²¹ Pa lhech vatcufayjat isjop jayu ca yajateesh ca asnatshelhyam.

²² “Meelh avaatsheelh ca captajeelhey'am ca ni'asnatsjayutajeeshelh pa ca naôvtaj'e nava jayôjiesha ja Moisês

²³ ti tôlh'e' ja vatjutsa' nalhu shi' pa t'ajuyshi pa jaspa avaatsheelh shi' papi acleselh ca nôfisjatch'e, pa isjop jayu ca asnatshelh navôque:

²⁴ “Ca captajeemey lhacôm'a japi vatachifas, pa lhacôm'a japi vatachifas ca nanjutyam jayu pa ve'lha vôcô lhaôs ti chiylhônsham ti acôjqu'e pa lhniish, ti chiyjuyjata pa vatcufayjat'esh pava chiycôvjiyan shi' pa ôtjayetas t'i', nan lhjunash na Dios ti tayôjijanesh; jô'tajesh ti nanjutyam jayu pa ve'lha fusuc ti vatcufayjat'eshjop pa sasch'e.

²⁵ Pa nanjooylhajat pa vatcasinô pa navclanjatjop pa t'ajuya ca chinatcumeemjulh ca chinvômjatch'e pava lhsasch'e lhacôm'a japi Israel lhavos, vooy yivaatsha javômjatemch'e jayu, lhayaash ti lhech pa capemey japi vatachifas vooy japi lhech yiesh'yijop jayu pa lhcufayjat shi' pa lhcufayjatjop pa sasch'e.

²⁶ Vooy yivaatsha javômjatemch'e jayu lhacôm'a japi lhtachifas Israel lhavos shi' papi vena tôlhshi' ti yielh'atshi, ti capemey japi vatachifas.

²⁷ “Ca nicaajtaj pa ve'lha ti ve'lheeshfach'ee ti capemey, papi lhech isjop jayu ca natcufa'yeshjop pa lhsasch'e pa ve'lha tashinshtayche lhaôs ve'lha lhnincôp.

²⁸ Vooy pa vatcasinô pa navclanjatjop jayu pa t'ajuya yiey yijuyish ca jaspa chincumeshjulh ca chinvômjatch'e pa lhsasch'e pa lhech ti capemey, vooy yivaatsha pa javômjatemch'e jayu.*xb*

²⁹ Nava lhech vat'ônashesh t'ajuya japi Israel lhavos shi' papi vena tôlhshi' ti yielh'atshi ti caaj pa capemey.

³⁰ “Taj ti ca nicaajtaj papi tôlhjatlhavne ti yisnatesh pa sasch'e, ca lhechtaja pa Israel lhavo' ja't'ajesha pa vena tôlhshi', ca vena t'ônashtajayi. Pa lhe'naa papi lhech ti chiyayjatshi jayu japi lhchifas,

³¹ lhayaash ti yapunch'e nava yasinôc ti ninôfisjatch'e nava yiyôjijates; pa chiyayjatshi jayu lhacôm'a pa chiyachaja jayu pa lhav'ojiyash.”

Pa vatnivalhcheyashesh ti tanclôôy pa nalhu ti chit'ichayshi

³² Meelh papi Israel lhavos ti yie' pa am'e pa'na, pa yi'van pa ve'lha nivacle ti nit'ôqu'e pava lhcajuy pa nalhu ti chit'ichayshi

³³ Vooy papin yivanesh pa yicha'jeyshi pa Moisês shi' pa Aarón, shi' ti yan'e t'ajuyish lhacôm'a papi vatachifas,

³⁴ papi lhech pa yiclôvalh ts'ivee, lhayaash ti jôjjeclay nintô'ya pa ca t'ônashajop ca lhfanisheesh ts'ivee.

³⁵ Pa lhechesh pa yit'esha pa Lhcaanvacle pa Moisês: “Nôque nivacle isjop ca nitanutsjayesh pa lhavafi, vooy lhacôm'a japi Israel lhavos nôôtjatesh'in pava utes yiey na fach'ee na vat'ichavat.”

³⁶ Pa lhechesh papi Israel lhavos pa yayjatshi pa vat'ichavat pa yôôtjatesh'in ts'ivee pava utes yamjey ti yivômjat, pan t'ônasheshem pa Lhcaanvacle ti yiyôjiesha pa Moisês.

Pava lhtsôclôyesh pa lhavôjqu'e lhpa vat'uyjatshiy

³⁷ Pa Lhcaanvcle yiyôjiesha pa Moisês pa yit'esha:

³⁸ “Anfacleem napi Israel lhavos navôque: Avaatsheelh shi' papi acleselh isjop jayu ca aneshelh pava lhtsôclôyesh pa lhavôjqu'e pava uyjatshiyiselh.*xc* Pava lhtsôclôyesh isjop ca lhecha pa chiyashtilhesh pa yacutinilh.

³⁹ Meelh avaatsheelh ca avantajelh pava lhtsôclôyesh pa aychavalhshelhch'e jayu lhacôm'a nava vatyôjijates ti jajutelh'ay pa ôfisjatelhch'e jayu, pa tan jayu ca avôômjelha pava natsôt'ajeshelh lhaychavalhelhey shi' pava lhenelh, lhayaash pava lhech avaatsheelh ti navômjateshelh ti navooyshelhch'e.

⁴⁰ Nôque lhjunash pa aychavalhshelhch'e jayu lhacôm'a nava yiyôjijates shi' ti t'ôfisjatelhch'e jayu, pa lhavatvenchatelhyam jayu, ti ya lhech a'Diosyishelh.

⁴¹ Yivaatsha ya Lhcaanvacle, a'Diosyishelh, ti nayjatelh'e ja Egipto ca jaspa a'Diosshelh. Yivaatsha ya Lhcaanvacle a'Diosyishelh.”