Números 14 - Nivaclé Bible

¹ Pa lhechesh papi Israel lhavos pa tôlhesh'e ti tônvatsham'in, pa tifesh pa tulh ti yipvatsham'in.

² Lhacôm'a papu lhech ti niysisa pava t'ônashaan pa Moisês shi' pa Aarón. Pa yit'eshaan ts'ivee: “¡Istataja ca shtavaf'esha'ne ja Egipto ja't'ajesha nôque am'e pa'na!

³ ¿Ta t'e lhayaash ti shinchajey pa Lhcaanvacle nôque cotsjaat? ¿Jaspa shinvômjatsha'ne jayu t'e pa vatvatclônjayash, vooy napi catsijayas shi' napi catsicles yash'apee jayu papi nicasc'utsfasa? ¡Ya'shesh ti tajulhtajey ca shnapeclelhey'in ja Egipto!”

⁴ Pa lhech tôlhesh'e ti yit'eshelhvatsham'in pap'elh: “¡Shtanshi' pa ve'lha ca casvaclea ca shnapeclelhey'in ja Egipto!”

⁵ Vooy pa Moisês shi' pa Aarón pa tanjuy'eshicham pa yamja cotsjaat ti yiesh'e t'ajuyish lhacôm'a papi lhchifas,

⁶ pa vooy pa Josuê shi' pa Caleb, papin yituvalhey pa cotsjaat, pa yic'asteshlhtapee ts'ivee pava t'uyjatshiyis pa nôclitesh ti aôytejem

⁷ pa yit'esha lhacôm'a papi Israel lhavos: —¡Ja cotsjaat jan jôquelhey ti jatuvalhelhey lhavaatsha ya'shesh ti is'e'!

⁸ Ca lhetaja pa Lhcaanvacle ti nijutjooy pa shinefenesh jayu ca shnôcjam jô lhech cotsjaat pa nanjutjooy jayu. Jô lhech cotsjaat jan yie' pa vatts'oos shi' pa acôyech nive'lheesh ca ama nan lhjunash pa yinôôt.

⁹ Taj ti ya aj ca ni'ujaneelh ca ajuyelhjulh pa Lhcaanvacle,*xt* pa ya aj ca anjova'yelhem japi nivacle yiey jô lhech'e cotsjaat, lhayaash japi lhech lhjunashjulh jayu lhpa yucuve ti shtatujelh casvaatsha; lhayaash japi lhech ampapu ca nefenesh, lhan'e casvaatsha caajjajop pa Lhcaanvacle. ¡Ya aj ca anjova'yelh'in!

¹⁰ Pa lhech tôlhesh'e papi nivacle ti yen ca nôôtjatesh'in pava utes. Pa lhechesh pa lhôclôjqueyash pa Lhcaanvacle pa tanôclitesh'e pa Tsha'nuvo'esh ti Chivatvan'e. Pa yi'van lhacôm'a papi Israel lhavos,

¹¹ vooy pa Lhcaanvacle pa yit'esha pa Moisês: —¿Ta ca nôjesh'e ti tsapun napuque lhtachifas? ¿Ta ca nôjesh'e ti tsicacu ti janôclitajem java nimatasa papu ca nitô'yish napi lhech?

¹² Pa jancheney jayu pa vatayasha vancalhifch'een, pa tanca namey ca nôv'e' nôque cotsjaat. Taj ti vooy avaatsha jasnatesh'am jayu papi achifas ya'shesh ti acloj'e, pa na'shesh ca nit'unvatsham'in papi lhech.

¹³ Taj ti pa Moisês pa yicuulh pa Lhcaanvacle: —Avaatsha, lhtôôlhsha pa unaj, ti lhayjatesh'e ja Egipto napi lhtachifas. Lhayaash japi Egipto lhavos ca nitôôytajesh'a ti lhech afanishesh,

¹⁴ pa nifaclem jayu papi yiey pa cotsjaat Canaán. Papi lhech tpeeycheyesh shta ti yit'esh'a a'Lhcaanvacle ti lhôvji' japi lhech lhtachifas, ti lhavatvanjiyinesh ti lhôvji'jop lhja vôse' napi lhech. Vooy ti nalhu'ey pa lhnôyinc'oya napi lhech ti lhôvji' lhja vôse' tc'ach'e jô, vooy ti tulh'in ti lhôvji' ja itôj tc'ach'e jô.

¹⁵ Ca aclôntajsha'ne napuque lhtachifas ca atiftaj'e tatsha, vooy pap'elh lhtachifas yitô'yish'a jayu ca nayatajesh'ay pa niteesh'a jayu ts'ivee:

¹⁶ ‘Pa Lhcaanvacle sasemjop napuque lhtachifas ca namjatsham jôque cotsjaat jan yetôntajjop ca nijutey, pa lhe'naa ti yiclônsha'ne yiey na am'e pa'na.’

¹⁷ Pa lhe'naa, Lhcaanvacle, ca atanôclitshem nôqueesh pa uj unaj yiey jan ônashesh ti lhanfacleem. Lhteesh avaatsha

¹⁸ ti tanca tatshaa ca asuyaa, ti uj pa encheyash ca avômjatemch'e pa niysa' shi' pa lhav'ojiyash, lha'ma lhteesh ca ni'aclôyita'apee pa tamenesh lhavach, ti lhclôyitesh'apee pa niysa' napi lhnavot, napi lhcles, napi lhantôclishjes, napi napu'eyshi lhantôclishjes shi' napi nijooylha lhantôclishjes.*xu*

¹⁹ Caaj'am avaatsha pa uj encheyash, pa avômjatemch'e napuque lhtachifas pa niysa' lhfanishlhavach, p'alha ti caaj'am pa anichaclanjayashjop napi lhech ti yiey ja Egipto pa yamjey nôque yie'.*xv*

Pa Lhcaanvacle yiclôyit papi Israel lhavos

²⁰ Pa Lhcaanvacle pa yicuulh: —Tajulhey, ca javômjatemch'e ts'ivee yiey nan lhjunash ti lht'a'lheshyi.

²¹ Taj ti, lhech lhjunash, yijô' nan lhjunash ti yamônlha pa vooy na yinôclôjqueyash tif'apee na cotsjaat,

²² nive'lha napin yi'van na yinôclôjqueyash shi' java nimatasa papu ca nitô'yish ti jasnatshem ti yiey ja Egipto yiey shta na am'e pa'na, napin nic'alhtaneshyiin pa ti t'ajô'jesh'in yiey na am'e pa'na pa ninteesh ca nanc'ashamesh nava yiyôjijates,

²³ nive'lhaa napi lhech ca nivaney jayu na cotsjaat ti janfacleem japi lhacchevot ts'ivee. Nive'lhaa napin tsapun ca nivaney jayu.*xw*

²⁴ Ve'lha na yicavo Caleb nan caajem na espíritu ti yiven'esh pa niqu'ishameshyam pa yivo'yeshch'e. Pa lhe'naa na lhech ti javashanem ca nôcjaam ja cotsjaat jan nituvalhey, pa vooy papi tôlhshaam pa lhech nôvelh'e jayu.*xx*

²⁵ (Napi amalecitas shi' napi cananeos yie' ts'ivee na tavashay.) Vooy avaatsheelh ca atpectajelh lhum'ashi pa nashelhey na am'e pa'na yitsavalheyshi ja Tovôc Yucshi.

²⁶ Pa Lhcaanvacle nifaclem pa Moisês shi' pa Aarón, pa yit'eshaan:

²⁷ —¿Ta ca c'ôjesh'e nava t'ônashyiin ts'ivee napuque ojiyis Israel lhavos? Apis ti jape'ya ts'ivee ti niysisa nava t'ônashyiin.

²⁸ Meey ca atsasinôquiem napi lhech: ‘Yivaatsha, ya Lhcaanvacle, jetônjop na yimônlhajayash ti jasnatesh jayu pava vaclan nan ajunashelh ti lhaspeya'shelh ti jayeesh.

²⁹ Lhacôm'a napi yaash ti veinte pava nincôpes ti chiyi'sesh'e ja t'ajuya ti chiyitsjuulh papu ca niysistajaa pava t'ônashyam pa chinclônsha'ne jayu, pa vooy pava lhavuuvtes pa chinayjatshiin jayu na am'e pa'na.*xy*

³⁰ Chiyivujuychatesha na Caleb shi' na Josuê, pa tanca ave'lhaaelh avaatsheelh ca amelhsham jayu na cotsjaat nan jaypayema ti janfacleem ca nôv'e' ts'ivee.

³¹ Vooy na yônashesha napi acleselh, napin lhteetshelha ca na'shesh'apee pa t'unaj napi niac'utsfasaelh, napi lhech jacha'jey jayu na cotsjaat nan lhapunelh avaatsheelh napi lhech pa nôv'e' lhavaatsha.

³² Vooy nava avuuvteselh avaatsheelh pa mônlhaashi jayu na am'e pa'na,

³³ vooy napi acleselh pa mônlhaashi jayu pa niclôvalh pava tashinshtas pa nôqueshch'e pava cuarenta yincôpes.*xz* Côque lhfanisheshem jayu napi lhech pa nishayaneshelhch'e'am ti ninavooyshelhch'e, pa alhacôm'aelh ca amjelhey ca avafelhsha'ne yiey na am'e pa'na.

³⁴ Avaatsheelh lhôveshelhshi java cuarenta nalhus ti lhtuvalhelhey na cotsjaat; pa cuarenta jayu shta pava yincôpes ti lhshayaneshelh pa anclôyitsjayashelh: ve'lha yincôôp tajulhsham pa ve'lha nalhu. Nôque lhjunash pa nitô'ya jayu papin tanjuyijulh.’

³⁵ Yivaatsha, ya Lhcaanvacle, nôque yônashesh: Nôque lhjunash na yifanisheshem jayu napuque lhtachifas ti ve'lha t'ôs'eyijop ti tanjuyijulh. Yiey nôque am'e pa'na pa lhech c'ôjat'e jayu; pa nivafsha'ne jayu ts'ivee.

Vafsha'ne papi napu'nôjesh tuvalhjanjas ojiyis

^36-37 C'ôya papi nivacle papin yichen pa Moisês ti yituvalhey pa cotsjaat ti tapectaj'in ts'ivee pa niysisa pava lhfacjes, yisnatshem papi lhchifas ti yatjayanvatsham'in, pa vooy pa Lhcaanvacle pa yiclônsha'ne.

³⁸ Pant'ajôôj papi lhech pa ve'lha pa Josuê shi' pa Caleb pa mônlhasha'ne.

Papi Israel lhavos chiyash'apee yiey pa Horma

³⁹ C'ôya pa Moisês ti nifaclem papi Israel lhavos pava yit'esh'in pa Lhcaanvacle, pa lhacôm'a papi lhech ti ninc'usinatvatsham'in.

⁴⁰ Vooy ti nalhu pa nitshamch'e ts'ivee ti claafnalhu pa yich'apee ts'ivee pa cotsjaat yi'apee pava uticuy pa yit'esh ts'ivee: —¡Nôque shnôvelh'e! Shnôquey clap ca shtamelhey pa nifacjoom pa Lhcaanvacle, yijô' ti shtasnatesh pa sasch'e.

⁴¹ Taj ti pa Moisês pa yit'esha: —¿Ta t'e lhayaash ti naanc'ashamshelh nava tayôjijanesh pa Lhcaanvacle? ¡Côque lhaychavalhelhey navômjatelhshi jayu!

⁴² Ya aj ca meelh'in, lhayaash pa Lhcaanvacle ti tanca nôvelh'ajop. Vooy papi naac'utsfaseelh ya'shelh'atapee jayu.

⁴³ Yiey ja lhetshi vatjumteelh'ac'oya japi amalecitas shi' japi cananeos ca avatclônelhsha'ne avaatsheelh pa naclônelhsha'ne jayu. Tôlh'ejop avaatsheelh ti lhtayelhjop pa Lhcaanvacle pa tanca nôvelh'ajop pa lhech.

⁴⁴ Taj ti papi lhech ninach'anesh ti yich'apee pa tojquisham cotsjaat yi'apee pava uticuy; taj ti nilhecha lhpa vatcaqueclitôshi yeclônilh yich'e' pa chivatpeya'esh yitsôt'ajesh pa Lhcaanvacle, nilhecha pa Moisês ca nanvojayuqu'e pa mônlhee pa vat'ichavat.

⁴⁵ Pa lhechesh pa nachey'in papi amalecitas shi' papi cananeos papin yie' pa lhech cotsjaat, pa yisaas papi Iisrael lhavos yamjey pa Horma, pa yash'apee ts'ivee lhacôm'a.