Números 13 - Nivaclé Bible

¹ Pa Lhcaanvacle nifaclem pa Moisês pa yit'esha:

² “Acheney japi t'ajôôjô nivacle ca nituvalhey ja cotsjaat Canaán jan jajutey jayu napi Israel lhavos. Ca achen japi ve'lha ts'ivee japi tôlhshaam japi t'ajôôjamsha'ne nivacle papi caajem pa t'unaj.”

³ Yiey jan t'ônashesh pa Lhcaanvacle ti tayôjijanesh, pa vooy pa Moisês pa yichen'in tôlh'e' pa ampa ca nôv'e' yi'shi' pa Parán. Lhacôm'a papi lhech nivacle t'unvatsham'in tôlhshaam papi Israel lhavos.

⁴ Papi lhech nôque lhjunash: pa Samúa, lhaôs pa Sacur, tô'lha pa t'ajôôjam pa Rubên;

⁵ Pa Safat, lhaôs pa Horí, tô'lha pa t'ajôôjam pa Simeón;

⁶ Pa Caleb, lhaôs pa Jefone, tô'lha pa t'ajôôjam pa Judá;

⁷ Pa Igal, lhaôs pa Josê, tô'lha pa t'ajôôjam pa Isacar;

⁸ Pa Oseas, lhaôs pa Nun, tô'lha pa t'ajôôjam pa Efraín;

⁹ Pa Palti, lhaôs pa Rafú, tô'lha pa t'ajôôjam pa Benjamín;

¹⁰ Pa Gadiel, lhaôs pa Sodi, tô'lha pa t'ajôôjam pa Zabulón;

¹¹ Pa Gadi, lhaôs pa Susi, tô'lha pa t'ajôôjam pa Josê (nôque yich'e' pa t'ajôôjam pa Manasês);

¹² Pa Amiel, lhaôs pa Gemali, tô'lha pa t'ajôôjam pa Dán;

¹³ Pa Setur, lhaôs pa Micael, tô'lha pa t'ajôôjam pa Aser;

¹⁴ Pa Nahbi, lhaôs pa Vapsi, tô'lha pa t'ajôôjam pa Neftalí;

¹⁵ Pa Geuel, lhaôs pa Maqui, tô'lha pa t'ajôôjam pa Gad.

¹⁶ Navôque lheyis papi nivacle yichen pa Moisês ti yituvalhey pa cotsjaat. Pa Oseas, lhaôs pa Nun, yivômjatesh pa lhey pa lhqueyesh Josuê.

¹⁷ Pa Moisês yichen'in ti yituvalhey pa cotsjaat Canaán pa yit'esha: —Meelh'in ca anashelhsham pa tavashay lhey Nêguev, pa atsavalhelhsham pa cotsjaat yi'shi' pava uticuy.

¹⁸ Pa ovalhelhsham pa lhjunash pa cotsjaat shi' papi nivacle yi'shi' pa lhech'e ca nit'untajvatsham'in ja't'ajesha ca nincontasa, shi' shta ca napu'taja ja't'ajesha ca acloja.

¹⁹ Ca avantajelh pava lhavtsates ti yisnatesh'e pava lhatsha'nuvos ja't'ajesha ca nijôtjatch'e, shi' pa cotsjaat pan yie' ts'ivee ca istaja'e ja't'ajesha ca niysa',

²⁰ ti vacalh'e pa yie' ja't'ajesha ninvacalh'e. Shi' ca nicaajtaj pava aacjuy ja't'ajesha ca ama. Pa ya aj ca anjova'yelhem; pa anchajeelh pav'elh lhay yi'shi' pa lhech cotsjaat. Côque vaclan pa lhech t'aplhuqu'e ti niclan'e ts'ivee pava vatjutsa' lhay pava ôtjayetas.

²¹ Papi nivacle pa yich'in ti yituvalhey pa cotsjaat tôlh'e' pa ampa ca nôv'e' lhey Zin, yiey na fiyatjulh, pa yamey pa Rehob, yiey na fchenajjulh, nash'e pa chiyu'ejop'in ja Hamat.

²² Pa yitshaam pa tavashay lhey Nêguev pa yamey pa Hebrón. Lhech yie' pa Ahiman, pa Sesai shi' pa Talmai, papi lhech tô'lha pa Anac. Pa yitsaat Hebrón vatjutsa'c'oya ti chiyisnatesh pava napu'yama yincôpes pa Zoán yiey pa Egipto.

²³ Pa yamey ts'ivee pa tovôc lhaôs lhey Escol. Lhech'e ti yit'ovôsesh ts'ivee pa ve'lha lht'oycha'esh pava ôtjayetas, pa napu'jop ts'ivee ti yicha'jesh ti yanshi' pa ve'lha yeclô'. Pa niclanshi ts'ivee pava lhay granadas shi' pava higos.

²⁴ Pôque tovôc lhaôs lhqueyesh Escol, tôlh'ejop ti lhech tôlhesh'e pava yit'ovôseshey papi Israel lhavos pa lht'oycha'esh lhpa ôtjayetayuc.

²⁵ Vooy ti nôjeshch'e ti yituvalhey ts'ivee pa cotsjaat ti yicheshch'e pava cuarenta nalhus, pa vapecley'in ts'ivee

²⁶ ja Cades, yiey pa am'e' pa'na yi'shi' pa Parán. Lhech yie' pa Moisês, pa Aarón shi' lhacôm'a papi Israel lhavos. Pa chayemch'e ts'ivee pava yiclôvalhch'e pa nôclitem shta pava lhay tô'lhey pa lhech'e cotsjaat.

²⁷ Pa yit'eshaan ts'ivee pa Moisês: —Ti jôquelhey ja cotsjaat jan lhaschene'lhey. Yijô' ja lhech cotsjaat ti yie' pa vatts'oos shi' ca acôyjey nive'lheesh ca ama lhjunashjulh pa yinôôt, shi' navôque lhay lhech tôlh'e'.

²⁸ Taj ti japi nivacle lhech yie' t'unvatsham'in, shi' java lhavtsates uj ti usey pa yijôt'as shta. Pa lhech javanelh'e shta japi tôlhshaam pa pitej lhey Anac.

²⁹ Yiey ja cotsjaat yi'shi' ja tavashay lhey Nêguev lhech yie' japi amalecitas, vooy ja cotsjaat yi'shi' java uticuy lhech yie' japi hititas, japi jebuseos shi' japi amorreos, ja lhavôj'e ja uj tovôc tajulhshi ja tovôc Jordán lhech yie' japi cananeos.

³⁰ Pa lhechesh pa Caleb pa yishanat papi lhchifas papin yie' t'ajuyish pa Moisês, pa yit'esha: —¡Shnôquelhey clap ca shtanjôcleshelhey ja cotsjaat! ¡Casvaatsha isjopjoom ca shtanjôcleshelhey!

³¹ Taj ti papin tanôôycheelh pa lhech pa yicuulh ts'ivee: —¡Am, sasjop ca sht'eclet'a japi lhech nivacle! Japi lhech ya'sheshjac'oya ti t'unvatsham'in.

³² Pa vena t'ônasheshem papi Israel lhavos pa cotsjaat pan yituvalhey ti uj ti yapuneyc'oya. Pa yit'esh ts'ivee: —Ja cotsjaat jan jatuvalhelhey tif'e' capi nivacle capin yi'shi', vooy lhacôm'a japi nivacle japi javanelh pitesch'e.

³³ Javanelh shta jap'elh yaash ti pitesch'e*xs* tôlhshaam pa Anac. Ca shtavatsavattajch'etsham japi lhech pa shtanchava'yelhey jan lhjunash java fanjay. Pa nôque lhjunash pa novalhjooyshicham shta japi lhech.