Números 12 - Nivaclé Bible

Lhpa María shi' pa Aarón yiyôytana pa Moisês

¹ Lhpa María shi' pa Aarón lhech tôlhesh'e ti yiv'ojiyan pa Moisês, lhayaash pa lhech ti lhjaya'esh lhpa ve'lha ôcjeclô Etiopía lhavoque.

² Jô'tajesh ti yit'eshaan ts'ivee: “Pa Lhcaanvacle ninve'lhan ca nasinôqui na Moisês; yivaatsheelh shta ti tsasinôquielh.” Vooy pa Lhcaanvacle pa yipe'ya.

³ Vooy pa Moisês, pa lhech nivacle ya'sheshc'oya ti vatants'aclan yiey na cotsjaat.

⁴ Pa lhe'naa pa Lhcaanvacle ti yit'esha pa Moisês, pa Aarón shi' lhpa María: “Meelhey avaatsheelh apu'jana'elh ja Tsha'nuvo'esh ti Chivatvan'e.” Papi lhech pu'jana pa lhech t'ajuyshiin.

⁵ Pa lhechesh pa Lhcaanvacle pa nacheyshicham lhpa vôse' ts'ayôôysham ti tajulhesh'apee yiey pa chiyuy'een pa Tsha'nuvo'esh; pa lhech t'aplhuqu'e ti tôney pa Aarón shi' lhpa María, pa meelh papi lhech ti yi'jop

⁶ pa Lhcaanvacle pa yit'esha: “Ach'anelhch'e navôque jayeetshelh'a jayu: Meelh ca nicaajtaj pa yielh'atshi yitô'ya pava vaclan ti tôlhyi', yivaatsha janôyôjem jayu pava yi'shi' lhtô'vat shi' ca jayasinôyshem pava vatatsômatas;

⁷ taj ti na yicavo Moisês tan ca lhech lhfanisha lhavach. Na lhech ya'sheshc'oya ti yivo'yeshch'e lhacôm'a jap'elh yicavos,*xq*

⁸ vooy na lhech ti jayasinô'yem ti yashalheelhvane ti javatpeya'shelh java jayeetshelh. Vooy na lhech tsivanesh na yijunash, ¿naô pa lhayaash ti nafi'yelha ti lhasinôquieshelh pa niysa'?”

⁹ Vooy pa Lhcaanvacle ujesh ti suya papi lhech, pa yichc'oya.

¹⁰ Vooy lhpa vôse' ti tanuc'oya pa Tsha'nuvo'esh, pa tashtôtay lhpa María pa climeshch'e lhacôm'a pa t'ôj. Meelh pa Aarón ti yovalhsha'ne shta lhpa María pa yi'van ti tashtôtay,

¹¹ pa yit'esha pa Moisês: “Yiyaam, na yinvacle, pa ya aj ca nasclôyitesh nôque sasch'e ti ninascajôyshiyan ti jasnatshelh.

¹² Ya aj ca avashana lha lhech ca lhjunashajulh pa vataôs ti vafshi ti jôjjeclay ninanvat'aj, ti namach'e na t'ôj ti yivômjatshi.”

¹³ Pa lhechesh pa Moisês pa vatants'aclansha pa Lhcaanvacle: “Yiyaam, Dios, jatants'aclan'a ca avatsjanchat lha lhech.”

¹⁴ Vooy pa Lhcaanvacle pa yicuulh: “Ca nit'ach'itaj'e lhtaco pa lhtata, pa chivapenjatesh'in jayu ca nôquesch'e pava napu'yama nalhus. Pa lhecheesh pa chiyanfach'eec'oya na vat'ichavat pa nôqueshch'e pava napu'yama nalhus,*xr* pa nanjooylhach'e ca chinachajsham.”

¹⁵ Pa lhech lhjunash lhpa María ti chiyanfach'eec'oya pa vat'ichavat ti yicheshch'e pava napu'yama nalhus. Pa lhan'e papi lhchifas pa nilhech ninash'e.

¹⁶ Vooy lhpa María ti tayelhvane papi lhech, pa yuyey pa nôyish tôlh'e' pa Hazerot, pa t'ichay'e ts'ivee yiey pa am'e pa'na lheyesh Parán.