Números 11 - Nivaclé Bible

Pa Lhcaanvacle nifaclem ti caaj jayu pa lhavuun papi Israel lhavos

¹ Ve'lha pa nalhu papi Israel lhavos caajem pa t'iyatjayash ti t'ajuyjulh pa Lhcaanvacle tôlh'ejop pava tavijatayem ts'ivee ti vaclanem. Ti yipe'ya pa Lhcaanvacle pa suya jum pa yicheney pa lhavitôj ti yichesh pa lhavôjqu'e pa t'ichavat.

² Pa lhechesh pa tônvatsham'in papi lhchifas pa t'aalhsha pa Moisês ca nefenesh, pa vooy pa Moisês pa vatants'aclanemey pa Lhcaanvacle papi lhech.Pa lhechesh pa yimac pa itôj.

³ Pa lhe'naa pa lhanquey pa lhech'e Tabera, lhayaash ti lhech yie' pa lhavitôj pa Lhcaanvacle ti t'ajuyjulh papi lhech.

⁴ Caaj papi yi'shi' papi Iisrael lhavos papi nivacle vanacshen pa na lheyisvatc'oya, tsi'sha ti yaychavalhey pa ca nituj. Pa vooy papi Israel lhavos pa nicu'ja papi lhech pa yamjatey ti yipvatsham'in pa yit'eshvatsham'in: “¡Ts'icu'tajey yamsha pa t'asjaan ca tuj!

⁵ ¡Tsaychavalhjatch'e cava sajech ti jatujelh ti jayits'ôteyshelh atesha yiey ja Egipto! Pa jatujelh shta cava vatlhujquetas shi' cava saniyotas, nôquee shta cava taclôôc shi' cava shitjôclitas, nôquee shta cava shitjôcles.

⁶ Taj ti vooy nôqueesh nôque shnôv'e shinvômjatsha'ne jayu na cats'iyipcu, pa ampa caelhchaa ca chinvan, pa tsi'sha nava maná.”

⁷ (Pava maná lhjunashjulh pava lhay lhpa tsancutaach tiqu'in'esh ti tôjiyassha'ne,

⁸ pa t'acônashjulh pa climshi ti chiycaclôôlh. Pa yichey papi Israel lhavos pa nit'ôqu'e, pa nijooylha pa yipjôji ja't'ajesha ti yicfaashi pa tatayesh ts'ivee ja't'ajesha ti yucuveyansha'ne.

⁹ Pa vooy ti tulh'in pa nitonsha'ne pa yiyaas yiey pa t'ichavat pa natshicham shta pava maná.)*xo*

¹⁰ Pa Moisês yipe'ya papi Israel lhavos pa t'ajôôjamsha'ne ti yipvatsham'in yiey pava lhashic pava lhatsha'nuvos. Pa Lhcaanvacle uj ti suya. Shi' shta pa Moisês ninc'usinat'in,

¹¹ pa yit'esha pa Lhcaanvacle: —¿Ta t'e lhayaash ti vena ônashyi, ya lhech ti acavoyish? ¿She t'e pa lhatjuyeshyijulh ti lhech afanishyish ti lhascumjat'e napuque lhtachifas?

¹² ¿Lhaychavalheyam t'e ca yijunashajulh pa vatata ja't'ajesha lhpa vatamimi ti lht'a'lheshyi ca yicum'ôcji pan lhjunash papi taôvclas ti chiyfitsjansha'ne, ca jamjey pa cotsjaat ti lhanfacleem papi vatjutsa' lhacchevot ts'ivee?

¹³ ¿Ta t'e ca jatô'lhesh'e pa vatvuun ca jajutey ca nituj lhacôm'a napuque nivacle? Namyiy'in ts'ivee pa yipvatsham'in pa yit'eshyiin: ‘Anjuteelhyi pa vatvuun ca jatujelh.’

¹⁴ Yivaatsha nit'ôyisheey ca nasfayu'em ca yicum'e ca yave'lhaajop lhacôm'a napuque lhtachifas; caclecyam jum napuque.

¹⁵ Ca lhech afanishtajayish'in, pa tajulhey ca asjôclesh na yimônlhajayash, ca niyijô'tajaa ca acavts'aclayish. Nôque lhjunash pa jaspa tanca yi'van t'ôyish'e pava tavijatay.

¹⁶ Taj ti pa Lhcaanvacle pa yicuulh: —Anayjatvane'yam japi setenta nitaôvclasa Israel lhavos, japi natôôysha ti caajem pa t'unaj yi'shi' japi lhchifas, pa anchajey pa t'ajuyish'e ja Tsha'nuvo'esh ti Chivatvan'e, pa lhech ach'anelh'eyic'oya.

¹⁷ Yivaatsha janachelh'ay shicham jayu ca jayasinôyelh'ac'oya, pa jaycum'e jayu pa t'iya'esh na espíritu nan caaj'am, pa jajutey jayu japi lhech ca jaspa nefen'ash ca achaajtaj napuque lhtachifas. Pa nôque lhjunash pa tanca ave'lha'ajop jayu.

¹⁸ Pa nijooylha ca ayôjiesha napi achifas ca nivat'isiyansha'nejop t'ajuya lhum'ashi, pa atujelh jayu pa t'asjaan. Apis ti jape'ya ti yipvatsham'in ti yit'esh'in ts'ivee: ‘¡Ts'icutajelha yamsha pa vatvuun ca tujeelh! ¡Ya'shesh ti tajulheyjoom ti yiey ja Egipto!’ Tajulheyam ca jajutey pa lhavuun pa nituj ts'ivee,

¹⁹ tanca ve'lhaaaesh pa ve'lha nalhu, ja't'ajesha napu' pava nalhus, tanca lhecha pava ve'lhanôjesh, ja't'ajesha pava napu'nôjesh pa tanca lhecha pava veinte nalhus. Am.

²⁰ Pa atujelh jayu pa vatvuun pa môôjelhch'e lhacôm'a pa ve'lha jive'cla, pa amjelhey ca ancôtseetajeshelh shi' ca na'ancu'tajeelha, lhayaash ti lhatcavo'yelhyijulh, ya lhech ya Lhcaanvacle, ti jôvji' napi lhech, ti yipvatsham'in ts'ivee ti caaj pava yit'esh'in: ‘¿Ta t'e lhayaash ti shtay'e'en ja Egipto?’

²¹ Pa lhechesh pa Moisês pa yicuulh: —Napuque lhtachifas napin tavo'yich'e napi lhech seiscientos mil napi nivacle cotsjatiyjas, ¿pa lhteesh ca ajutey ca nituj pa lhavuun ca nôqueshch'e atesha pa ve'lha jive'cla?

²² ¿Ta yie' pava acloj tashinshtas shi' pava vôcôc ca isa'jop ca chinclônsha'ne ca nitajulh'apee nant'ajôôj napi lhech? Lha'ma lhôn ca ajutey lhacôm'a pava sajech yi'shi' pa uj tovôc, pa tanca nitajulhsham.

²³ Taj ti pa Lhcaanvacle pa yicuulh: —¿Lheclôjesh t'e avaatsha ti tiqu'in na yunaj? Nôqueesh lhavan jayu ca nôfiistajch'e ja't'ajesha ca niyit'a'esh.

Setenta papi nitaôvclasa tasinô'yesh pava tatômjalhesh

²⁴ Pa yichey pa Moisês ti nifaclem papi lhchifas pava yit'eshema pa Lhcaanvacle, pa tayelhvane papi setenta nitaôvclasa'esh Israel lhavos pa t'afaych'e lhavôôj pa Tsha'nuvo'esh.

²⁵ Pa lhechesh pa Lhcaanvacle pa nacheshicham lhpa vôse' pa tasinôyc'oya pa Moisês; pa nijooylha ti t'acum'e pa t'iya'esh pa espíritu ca nicaajem pa Moisês pa yijutem papi setenta nitaôvclasa'esh. C'oya ti chiyanshi'sha'ne pa espíritu papi lhech, pa lhech tôlhesh'e ti yasinôqui pava chayjulh; taj ti côque tanca nachajeshemch'e ts'ivee.

²⁶ Napu' papi nivacle, ve'lha pa lhey Eldad vooy paelh lhey Medad, papin chitôlhesham papi setenta, taj ti papi lhech tanca nôquey ja Tsha'nuvo'esh, pa mônlhaeen pa vat'ichavat. Taj ti shi' shta papi lhech chiyanshi' pa espíritu, pa lhech tôlhesh'e shta ti tasinô'yesh pava tatômjalhesh yiey pa vat'ichavat.

²⁷ Pa lhechesh pa ve'lha nôctech lhaôs vacumajey pa Moisês pa yit'esha: —¡Ja Eldad shi' ja Medad tasinô'yesh ts'ivee pava tatômjalhesh yiey ja vat'ichavat!

²⁸ Pa lhechesh pa Josuê, lhaôs pa Nun, pa lhech tôlhesh'e ti nich'ayech ti yefen pa Moisês, pa yit'esh: —¡Na yinvacle, Moisês, ashiyanem ca nasnatesh ts'ivee!

²⁹ Taj ti pa Moisês pa yicuulh: —¿Tam'ey ti lhanchavat'eshyijulh? ¡Coostaja pa Lhcaanvacle ca nijutey pa lh'espíritu lhacôm'a napi lhchifas, pa lhacôm'aa ca nachayjulh pava vaclan!

³⁰ Pa lhechesh pa Moisês shi' papi nitaôvclasa'esh Israel lhavos vapecley'in pa vat'ichavat.

Pa Lhcaanvacle nichen pava jooyjoyitas

³¹ Pa Lhcaanvacle yisnatesh pa lhaviim tôlhshaam pa uj tovôc pa nichaaj pava acloj jooyjoyitas, pava lhech nat'esha'ne'en pa vat'ichavat shi' shta pa lhavôjqu'e, pa tif'apee pa caju pa nashch'een pa yamjey pa ve'lha nalhu ti yachajshiin pa vat'ichavat, pa vanaclapju pa t'eshey ca ve'lhaashi yeclô' pa nam'ets'ee.

³² Lhacôm'a pa lhech nalhu shi' lhacôm'a pa tulh, shi' shta lhacôm'a ti nalhu ti nayjatva'ne papi nivacle pava jooyjoyitas. Papi shichaam pava nayjatva'ne pa napu'nôjesh pa yaclôpju'e pava nayjatva'ne pava jooyjoyitas. Pa yan'e lhavôôj ts'ivee pa vat'ichavat ti yiclôjôjinatsha'ne.*xp*

³³ Taj ti meelh ti nich'a tuj ts'ivee papi Israel lhavos pa t'asjaan pava jooyjoyitas, pa suya pa Lhcaanvacle papi lhech pa yiclôyit'apee, pa acloj papi vafsha'ne nivacle.

³⁴ Pa lhe'naa ti yeyiyanesh pa lhech'e Lhanvalhjey papi Lhavcônjas (Kibrot-hataava), lhayaash ti lhech chitish'ec'oya papi tsi'sha ti yaychavalhey pa ca nituj.

³⁵ Pa tôlh'e ts'ivee papi lhtachifas pava Lhanvalhjey papi Lhavcônjas ti yich'in pa yamey pa Hazerot, pa lhech mônlheeen.