Números 10 - Nivaclé Bible

Pava vat'ônjancheyesh pa clesanilh clim

¹ Pa Lhcaanvacle yiyôjiesha pa Moisês pa yit'esha:

² “Asnatesh pava napu' vat'ônjancheyesh pa clesanilh clim chiycheneshjop pa clesanlhiy t'ajuya, pava lhech lhjuyjata jayu pa ayjayashelhvane japi achifas shi' ti lhjuyjata jayu ti lhnôcjayuelh.

³ Meelh ca chinfuyu'tajch'e pava napu' vat'ônjanchey, pa lhacôm'a japi achifas ca tc'a'avane yiey ajuyish, yiey ja chiyuy'een ja Tsha'nuvo'esh ti Chivatvanelh'e na Dios.

⁴ Taj ti meelh ca chinfuyu'tajch'e lhpa ve'lha, pa tsi'shaa jayu japi lhanvaclesesh ja tc'acshamsha'ne ca nitayvane.

⁵ Meelh ca chinfuyu'tajch'e pava vat'ônjanchey pa nivojatch'etsham pa sitsej t'ôjôj, pa nuyey jayu pa nôyish japi tavayey na lhum'ôcjinuc pa t'ichavat,

⁶ vooy pa napu'eyshi ca chinfuyu'tajch'e pa nuyey jayu pa nôyish japi tavayey na fiyatjulh pa t'ichavat. Ca chinfuyu'tajch'e pava vat'ônjancheypa nivojatch'etsham pa sitsej t'ôjôj ti yinôôclhanitsha ti yich'in jayu.

⁷ Vooy ca suctajach'e ca chinfuyu'tajch'e pava vat'ônjanchey pa yinôôclhanite'ma jayu ca nitayvane japi vatachifas.

⁸ Vooy papi tanyôjijayjop ti yifuyuqu'e pava vat'ônjanchey lhecha japi vatcasinôc lhcles ja Aarón. Nôque t'ajuyelh'a ti vatyôjijat'esh ninvôômji.

⁹ “Meelh papi naac'utsfaseelh ca nitaancletajsham na natsôt'ajeshelh cotsjaat vooy avaatsheelh pa meelhjulh ca avatclônelhsha'ne, pa afuyuelhch'ejop pava vat'ônjanchey pa asitseneshelh pa ôjôjelh. Pa ya lhech yivaatsha, ya Lhcaanvacle a'Dioselhyish, pa c'aychavalhshelh'a jayu pa c'alhjeneshelh jayu japi naac'utsfasa.

¹⁰ Afuyuelhch'ejop shta pava vat'ônjanchey pava nalhus ti c'us'in, jan lhjunash java nalhusesh ti chivatc'usinat'in ja't'ajesha pa nich'a jive'cla, ca acufaytajeshelh pava t'ajuya ti chiylhônsham shi' pava chiycufa'yeshjop ti chivaniisclanch'e. Pa ya lhech ti jaychavalhshelh'a jayu. Ya lhech yivaatsha ya Lhcaanvacle a'Diosyishelh.”

Papi Israel lhavos tayshiin pa am'e pa'na lheyesh Sinaí

¹¹ Pa nalhu veinte pa jive'cla napu'eyshi pa napu'eyshi yincôôp, pa nitshaam lhpa vôse' ti tajulh'apee pa lhtôvash yiey pa chivatpeya'esh.

¹² Papi Israel lhavos pa yichvatich'e ti tayshiin pa am'e pa'na lheyesh Sinaí. Vooy lhpa vôse' pa mônlhaapee yiey pa am'e pa'na lheyesh Parán.

¹³ Yiey pan t'ônashesh pa Lhcaanvacle ti yiyôjieshajop pa Moisês,*xn*

¹⁴ pa vatjutsa' ti yich'in papi c'afoquelhayesh ti yichaaj pa yinôôclhanitsha sivôclôc lhayeech yitsôt'ajesh pa Judá, ti lhanvacleeshjop pa Naasón, lhaôs pa Aminadab.

¹⁵ Pa vanôyinch'e papi c'afoquelhayesh pa tc'a'sham pa Isacar pa lhech Natanael, lhaôs pa Zuar.

¹⁶ Pa vanôyinch'e papi c'afoquelhayesh pa tc'a'sham pa Zabulón pa lhech Eliab, lhaôs pa Elón.

¹⁷ Pa lhechesh pa chinuqueesha'ne pa is'ôcji lhtôvash, pa vooy papi lhcles pa Gersón shi' pa Merari, papin tanyôjijayesh ti yichaaj, pa yuyshey pa nôyish.

¹⁸ Pa yieshnee papi c'afoquelhayesh ti yich'in ti yichaaj pa yinôôclhanitsha sivôclôc lhayeech yitsôt'ajesh pa Rubên, ti lhanvacleeshjop pa Elisur, lhaôs pa Sedeur.

¹⁹ Pa vanôyinch'e papi c'afoquelhayesh pa tc'a'sham pa Simeón pa lhech Selumiel, lhaôs pa Zurisadai.

²⁰ Pa vanôyinch'e papi c'afoquelhayesh pa tc'a'sham pa Gad pa lhech Eliasaf, lhaôs pa Reuel.

²¹ Pa yieshnee ti yich'in papi lhcles pa Coat, pa yichaaj ts'ivee pava chiycheneshjop lhasnôyjes. Meelh papi lhech ti yam'in, pa yi'van ti apis ti chiyvaclhitch'e pa is'ôcji lhtôvash.

²² Pa nijooylhach'e ti yich'in papi c'afoquelhayesh ti yichaaj pa chinôôclhanitsha sivôclôc lhayeech yitsôt'ajesh pa Efraín, ti lhanvacleeshjop pa Elisama, lhaôs pa Amiud.

²³ Pa vanôyinch'e papi c'afoquelhayesh pa tc'a'sham pa Manasês pa lhech Gamaliel, lhaôs pa Pedasur.

²⁴ Pa vanôyinch'e papi c'afoquelhayesh pa tc'a'sham pa Benjamín pa lhech Abidán, lhaôs pa Gedeoni.

²⁵ Pa yôjesh'esha'ne ti yijoqu'esha'ne pap'elh c'afoquelhayesh, papi yichaaj pa chinôôclhanitsha sivôclôc lhayeech yitsôt'ajesh pa Dan, ti lhanvacleeshjop pa Ahiezer, lhaôs pa Amisadai.

²⁶ Pa vanôyinch'e papi c'afoquelhayesh pa tc'a'sham pa Aser pa lhech Pagiel, lhaôs pa Ocrán.

²⁷ Pa vanôyinch'e papi c'afoquelhayesh pa tc'a'sham pa Neftalí pa lhech Ahira, lhaôs pa Enán.

²⁸ Nôque lhanfanashem ti yijôneshch'e papi c'afoquelhayesh Israel lhavos ti yuyey ts'ivee pa nôyish.

Pa Moisês t'a'lha pa lhcaatjoc ca nitônôycheelh

²⁹ Ve'lha pa nalhu vooy pa Moisês yit'esha pa lhcaatjoc Hobab, lhaôs pa Reuel Madian lhavo': —Yivaatsheelh jôque'lhey pa cotsjaat pan nifaclelhyam pa Lhcaanvacle ca nanjuteelhyi. Atatvoelhyich'e ca shtanyôyeelhvane, lhayaash pa Lhcaanvacle ti nifac ti is pa lhfanishesh napi Israel lhavos.

³⁰ Taj ti pa Hobab yit'esh ti yicuulh: —Am, tajulhey ca japecley ja yicootsjat, jan yie' japi yivelhavot.

³¹ —Am ya aj ca mô' —yimatsenesh'in pa Moisês—. Avaatsha natô'ya jô pan yie' ti chit'ichay'e yiey ja am'e pa'na, pa isjop ca ats'efeneshelh ca ats'ôyanelhey.

³² Ca atatvotajelhyich'e, pa shtanicatsônjatesh lhacôm'a pava isis ca najutajjooy pa Lhcaanvacle.

³³ Pa lhechesh pa tayjop ts'ivee lhpa utiyuc yitsôt'ajesh pa Lhcaanvacle pa pu'jana pava nalhus ti t'ôtaayshi. Pa vatcaqueclitôshi yeclônilh yich'e' pa chivatpeya'esh yitsôt'ajesh pa Lhcaanvacle pa chivanôyineshc'oya ts'ivee, pa vooysha'ne pa yie' pa t'ichay'e jayu.

³⁴ Yicheshch'e pa nalhu ti yich'e' pa nôyish pa yalhatajesh ti nama lhpa vôse' yitsôt'ajesh pa Lhcaanvacle pa tajulh'apee ts'ivee.

³⁵ Meelh ti yichesh ts'ivee pa vatcaqueclitôshi yeclônilh pa yit'esha pa Moisês: “¡Aneetsham Lhcaanvacle! ¡Pa acatsônjat'in papi ni'ac'utsfasa! ¡Ca jaspa navanesh ca niclôtaj'ac'oya papi nacônitshi!*xñ*

³⁶ Taj ti meelh ti chivatsavat'esh pa vatcaqueclitôshi yeclônilh pa yit'esha pa Moisês: “¡Atpecleelhyiy nôqueesh, Lhcaanvacle, napi ninapu'a c'afoquelhay Israel lhavos!”