Nahúm 1 - Nivaclé Bible

Pa t'atshayaash pa lhavôôc pa Dios

¹ Na vatqu'isjayanach'esh ti chayjulh ja Nahúm tôlh'e' ja Elcos ti chiyvanjiyinesh. Nôque ya'clish chiyôji'shey ja yitsaat Nínive.*xa*

² Pa Lhcaanvacle Dios chavatjanaj shi' ti t'atshaay:*xb* t'atshayjulh japi vatjuyjatjulh, shi' ti suya japi nilhc'utsfasa.

³ Pa Lhcaanvacle vacha'clan taj ti t'un'in lhavaatsha, pa tan jayu ca nivo'mesh ca niclôyit papi tamenlhavach. Pa Lhcaanvacle t'ôta'yesh pa lhavimitaj, vooy nava vôsey lhcamôqu'esh pava lhafoc.

⁴ Pa yishanat pa tovôc, pa yimjat'e. Pa yimjatch'e lhacôm'a pava tovjôy. Pava jotoy yi'shi' ja Basán shi' jan yie' lhja utiyuc Carmelo pa tapecvane ts'ivee jayu, pa natpecvane shta pava lhôvôs yiey ja Líbano.

⁵ T'ajuyish'e ti nayuuyjat pava uticuy; vooy pava uticuy lhcles pa yic'asshisha'ne yie' t'ajuyish.*xc* Lhacôm'a na cotsjaat ti yivishjat'e ti yi'van; lhacôm'a na cotsjaat shi' papi yie'.

⁶ ¿She papi iseemjop jayu ca nivatsavat'eshjulh pa lhavôôc? ¿She papi iseemjop jayu ca niniyiteshjulh pa t'asuyi? Pa lhavôôc yifach'anjat jan lhjunash pa itôj, pa yiesh'e t'ajuyish pa lhech ti yic'assham java utes.

⁷ Pa Lhcaanvacle issha'ne; pa lhech chit'afiyajop pa t'aplhuc'oya pa vatanaputsjayash: pa vanujumatsenesh papi yicafiyan.

⁸ Taj ti, jan lhjunash papu ti yiyalhp'o pa lhacôm'a ti capch'e, pa tif'e' papu ti vatjuyjatajulh; pa yajulhjat'apee jayu pa tulhitaj papi nilhc'utsfasa.

⁹ ¿She pava lhichevasheshc'oya ti lhatjuyjulh pa Lhcaanvacle? ¡Lhavaatsha pa natifelhch'een jayu lhacôm'a! ¡Ampapu ca isa'emjop ca napu'eesh ca nivatjuyjatjulh!

¹⁰ Jan lhjunash java c'utjanis ti yuyvatsham'in, jan lhjunash java clôjôj yiteej, ti yivutunsham lhacôm'a.

¹¹ Avaatsha, Nínive, tôlh'atsham papin yuyjatvatsham'in pa lhav'ojiyash ti t'ajuyjulh pa Lhcaanvacle: pa ojey ti qu'eeyjanajesh.

¹² Pa lhe'naa ti yit'esha pa Lhcaanvacle papi lhchifas: “Lhama'taj japi Asiria lhavos ti t'untajvatsham'in shi' ti aclojjam, pa ninôjqu'een pa shana jayu ts'ivee. Yivaatsha c'aclôyit, taj ti tan ca c'aclôyit jayu t'ôyish'e.

¹³ Japôcjetsha'ne jayu ja avovo ti lhan'atapee pa jecjetshisha'ne jayu pava acalenas.”

¹⁴ Pa Lhcaanvacle yiyôjiesh'a avaatsha, ti lhanvacle'ash na Nínive: “Ampapu jayu ca nitôlh'atsham ca nanôyôjesh na ey; na lhishjanjavat na a'diosesh pa javômjatsha'ne jayu java chiydiosiyan shi' java vatajpeclesesh ti chiyisnatesh, pa lhech'e jayu ti c'atishc'oya lhayaash ti alhnapunach'esh.”

Chichayjulh pa lhnôjayashicham pa Nínive

¹⁵ ¡A'van! ¡Palha namey nava uticuy na qu'eeyjanaj ti nichaaj nava vat'eeyjatesesh na vatpiiyash!*xe* Aychavalhjayasheesh nava ac'usiyash'in, napi yiey na Judá; pa ôfisjatch'e nava afacjes. Tan ca t'ôyi'sheey ca ninachelh'atsham papi ojiyis; ti jatifch'een lhacôm'a.