San Marcos 1 - Nivaclé Bible

Pa Juan vanqu'eyjatsjan'e pa cotsjaat ti ampapu ca nôv'e'

¹ Nôque lhjunash ti tôlhesh'e na is ya'clish ja Jesucristo Dios Lhaôs.

² Ca lhjunash ca yi'sesh'e pa nivacle Isaías, chiytôyjata pava ti vaclan: “A'va, janôyinjat'ac'oya na yicavo ca nasnatesh'am jayu pa a'nôyish.

³ Pa t'ôjôj papu tavayey pa cotsjaat ti ampapu ca nôv'e' ti yit'esh: ‘Asclanelhch'ec'oya pa nôyish ca natjuya pa Lhcaanvacle; atsôôtjatelhem shta pa nôyish lhaôs.’ ”

⁴ Pa nam ja Juan pa vanqu'eyjatsjan'e yiey ja cotsjaat ti ampapu ca nôv'e', pa vanqu'eyjatsjanesh pa vatnayjayash pa chitatvaych'aclaja pa is vatjunash, jaspa chiyvômjach'e pava lhsasch'e.

⁵ Pa nôjeyvatich'e lhacôm'a ti yichey japi tôlhey ja Judea, shi' japi Jerusalén lhavos, pa chinajayansha'ne japi nifacch'e pava lhsasch'e yiey ja tovôc Jordán.

⁶ T'uyjatshiyesh ja Juan pa camello lhsashanilh, lhnucfat'esh shta pa tinôj; tuj pava fanjay shi' pa acôyech.*xc*

⁷ Pa vanqu'eyjatsjan pa yit'esh: —“Ve'lha ja nijooylhayich'e jayu, ya'sheshyic'oya ti t'un'in, jô'tajesh ti nivanajulhjatsham ca nuqueem'e pava lhavtes pava t'acfiyis.

⁸ Vooy yivaatsha c'anajayanshelh pa yinôôt; lhan'e lhavaatsha pa nanajayanshelh jayu pa Espíritu Santo.”

Pa lhnayjayash pa Jesús

⁹ Paelh nalhu ti tôlh'e' ja Jesús ja Nazret, ve'lheelhch'e ja Galilea, pa yichey ja Juan ti yinajayan'e ja tovôc Jordán.

¹⁰ Meelh ti vacalhesh pa tayshi ja yinôôt, pa yi'van ja Jesús ti tatc'aatsham ja vôôs, pa nacheyshicham ti vanajulhjat'apee pa Espíritu pa vatjônch'e ja ofo.

¹¹ Pa chiypeya' pa vat'ôjôj tavaysham ja vôôs ti yit'esh: —“A'lhech avaatsha C'aôs qu'en jum; uj ti ts'isham'ash.”

Tanc'alhtanchay pa Jesús

¹² Nôjeshch'e atesha cavôque pa yicheney pa Espíritu pa cotsjaat ti ampapu ca nôv'e'.

¹³ Pa cuarenta pava nalhus ti lhech yie' ja Jesús. Pa yic'alhtantaja pa tsich'e' pa lhey Satanás, ti yiey pa cotsjaat ti yie' pava yaquisetes. Vooy papi ángeles t'acu'mem'in.

Pa Jesús tôlhesh'e pa lhcumjayash

¹⁴ Meelh ti vanôôcfa ja Juan pa namey ja Jesús ja Galilea jô'lhech vanqu'eyjatsjanesh'e ca is ya'clish tôlhey ja Dios lhanvacleyash.

¹⁵ Pa yit'esh ja Jesús: —“Yameyjop na nalhu ti namjooy na Dios lhanvacleyash. Atatvaych'aclajelha na is vatjunash, ya aj ca acacujanshelh na is ya'clish tô'lha na vatnilhjenjayash.”

Pa Jesús tôney papi yichatjulh sajech lhavos

¹⁶ Ve'lha pa nalhu ti nashch'e lhavôôj ja Jesús ja lhjôvcha lhanô' lhey Galilea. Pa lhech yivan'e ja Simón shi' ja lhch'inish Andrés, pa yivooyshey ti yu'jam lhja lhaschaat ja tovôc, lhayaash ti sajech lhavosesh lhavaatsha.

¹⁷ Pa yit'esha ja Jesús: —Atatvoelhyich'e, c'asnatshelhjop jayu ca avoelhey papi nivacle, nan lhjunash ti lhavoelhey pava sajech.

¹⁸ Pa nôôy tatsha java lhaschatiy, pa voqu'e'vatich'e.

¹⁹ Pa tac'uy cle'e ja Jesús pa yama ja Jacobo, ja Zebedeo lhaôs, shi' ja lhch'inish Juan, yi'shi' ts'ivee lhja lhôvjatshi pa yashtilh ts'ivee lhja lhaschatitaj.

²⁰ Pa lhechesh pa tôneyshiin ja Jesús; pa lhechesh pa tayeyshi ts'ivee ja lhtata Zebedeo, vooy lhavaatsha mônlhajop japi lhcavos yi'shi' lhja lhôvjatshi, lhan'e japi lhech voqu'e'vatich'e ja Jesús.

Pa nivacle yi'shi' pa tsich'e'

²¹ Yamey ts'ivee ja yitsaat Capernaum; meelh ti yama ca nalhu ti chit'ichay pa vanqu'eyjatsjan'ôcji ja vatvanqu'eyjatsjanjavat.

²² Nitôyiesha japi yipe'yeesh; lhayaash ti uj ti vanqu'eyjatsjan nanlhjunash papu ti caajem pa t'unajjop, a'lheesh jap'elh vanqu'eyjatsjanesh pava lhfanishlhavach.*xf*

²³ Taj ti lhech yie' ja ve'lha nivacle yi'shi' pa tsich'e', pa lhech yit'esh ti tônesh'in:

²⁴ —¿Shepa lhnachelhyiy, Jesús Nazaret lhavo'? ¿Lhnachelhyiy t'ejum ca astifelhch'een? Tsitôfac'ash; a'lhech aissha'ne avaatsha, lhtô'lha pa Dios.

²⁵ Nijovatsjan ja Jesús pa tsich'e' pa yit'esha: —¡Ya aj ca ats'iseey, ayshi nôque nivacle lhôvji'!

²⁶ Pa tatvaych'aclajshi ja nivacle pa tsich'e' pa tafshiy ti yichfach'ee.

²⁷ Tamp'oyeshem jum japi yivanesh pa yasinôqui ts'ivee ti yit'esh: —¿She t'e cavôque? Nich'anlheesh ti shtavanchayesh ti chivanqu'eyjatsjanesh. ¡Nôque nivacle caajem pa t'unajjop ti yiyôjaa, pa yamja pava tsich'es ti nequ'ishamem!

²⁸ Pa nivinshaa ti yaya'esh japi yie' ja cotsjaat Galilea ca lhfanishlhavach ja Jesús.

Pa Jesús yivatsjanchat lhpa Simón Pedro lhcact'e

²⁹ Pa tay'ôcji ts'ivee ja vatvanqu'eyjatsjanjavat pa yamey ts'ivee ja lhajpôyich ja Simón shi' ja Andrés, tanaôycheelh ja Jacobo shi' ja Juan.

³⁰ Lhan'e lhja Simón lhcact'e yijônsha'ne pa lhclôjut; pa tatsha ti chinfacleem ja Jesús.

³¹ Pa yichey pa t'acum'e ja lhpôcôt pa yinenjatchisham; pa vatsjan tatsha pa t'acu'mem'e pa lhôc.

Pa Jesús yivatsjanchat papi aclôj aôytes'in

³² Pa jaalhpa tulh'in, lhapa yuy na jumcuclaay, ti tachajey'in japi aôytesvatsham'in shi' japi yi'shi' pava tsich'es;

³³ nôjey ts'ivee japi lhech lhavtsat'e yitsôyin'e lhavôôj ja lhcashi.

³⁴ Pa acloj japi yivatsjanchatsha'ne japi aôytesvatsham'in, aclôj pava tsich'es yisasemfach'ee japi yi'tajshisha'ne; pava lhech tsich'es ninvashanem ja Jesús ca nitasinôych'e, lhayaash ti nitôfaclesh ts'ivee.

Pa Jesús vanqu'eyjatsjan'e pa Galilea

³⁵ Pa netshaam ja Jesús ti nich'a nalhu, ti jôjjeclay tulh'in, pa yichey pa nintanash'e cotsjaat ti ampapu ca nôv'e' pa lhech yiesh'e ti t'aalh.

³⁶ Lhan'e ja Simón shi' jap'elh t'eyjatsjanjas nayitajeyshi ts'ivee ti vo'tajeysha'ne.

³⁷ Meelh ti yi'van ts'ivee pa yit'esha: —Lhacôm'a napu ti vo'taja'aysha'ne.

³⁸ Pa yicuulh lhavaatsha pa yit'esha: —Shnôquelhsham nava shalhaa yitsates jaspa lhech javanqu'eyjatsjan'e jayu vitsha; lhayaash ti lhechin janachey.

³⁹ Pa tifeshch'e lhacôm'a java vatvanqu'eyjatsjanjavtes yiey ja Galilea ti lhech vanqu'eyjatsjan'e, jô'tajesh ti yisaasfach'ee ts'ivee pava tsich'es.

Pa Jesús yivatsjanchat pa tashtôtay

⁴⁰ Jaelh nalhu nama ja Jesús ja nivacle tashtôtay jô lhech lhayishlheey t'ajuyish ja Jesús ti t'acjatsuyshichamjop ti yit'esh ti t'a'lha: —Ca at'esh lhôn avaatsha ca asvatsjanchat.

⁴¹ Pa tcavts'aclayesh jum ja Jesús, pa t'ajaya jôqueey ti yit'esh: —Jayeesh'am. ¡Ca avatsjan!

⁴² Meelh ti lhech yit'esh ja Jesús, pa vatsjanesh tatsha, pa yi'tajesh lhashtôtaj pa is ti'ma jôqueey.

⁴³ Ja Jesús yichen tatsha jô lhech nivacle, taj ti yit'esha ti yiyôjaa ti ti yimatsenesh'in:

⁴⁴ —Ovalh jum, lhech quitaa ca anfaqu'in; jôlhaa tane ti meey japi vatcasinôc ca avatvanjeyinesh, pa asnatesh'atam pa ca acufayjatajop ti lhavatsjan shita, jaspa yitôyesh'a jayu napi achifas ti lhavatsjan, lhech t'ônashch'e cava tayôjijanesh ca Moisés.

⁴⁵ Jô lhech nivacle jôjjeclay ca tojtajach'e ti nifaqu'in tatsha pa lhjunashesh pa lhavatsjancheyash. Taneeyjayesh jum jô lhech nôôlhjanesh ti tamenesh ja Jesús pa clet'ey ca nôcjaam ja yitsaat ca nitô'nôclitshem; pa vooy pava nichinôv'e' jô lhech yie' ja Jesús, taj ti lhet lha lhjunash ampa ca nintôlhashijop japi nachey'in.