Levítico 7 - Nivaclé Bible

Chivancafaycutesh pava vatcufayjatesjop pa chitamenesh lhavach

¹ “Nava vatcufayjatesjop pa chitamenesh lhavach nava lhech lhasnôyjes. Navôque chivancafaycutesh t'ajuya nava lhech:

² Pa yaquiset vatcufayjat'eshjop pa chitamenesh lhavach isjop jayu ca chinsej'ôcji lhcôyish yiey ja chiyclôn'esha'neen pava yaquisetes ti chiycufa'yesh pa chinapjunsham, vooy pava lhavoyey isjop jayu ca chinsichat'apee shi' pa lhavôjqu'e ja itôvat.

³ Isjop jayu ca chincufa'yesh lhacôm'a pa lhôtje pa yaquiset: pan yiesh pa lhacôôs shi' pa yiesh pava lhavaclay,

⁴ Pava napu' lhshanantiyôc, pa lhôtje pan yiesh shi' pan yiesh pa yitsavalhch'e t'aclô', lhech lhjunasha pan yiesh pa t'acôjlhôc, pava lhech chinclanesh'e vatjuulh pava lhshanantiyôc.

⁵ Pa nanjooylheesh ja vatcasinô ca ninapjunsham cavôque yiey ja itôvat'esh, jan lhjunash ti vatcufayjat'esh chinapjunsham ti chiyôclôjesh na Lhcaanvacle. Pa lhech vatcufayjat'eshjop pa chitamenesh lhavach,

⁶ pa lhacôm'a japi vatcasinôc isjop jayu ca nituj, lha'ma ca naôvtajesh'e ja lhasnôyech'e, lhayaash na lhech ti lhasnôyech.

⁷ “Pa vatcufayjatjop pa chitamenesh lhavach lhjunashjulh pa vatcufayjatjop pa sasch'e, nava chivancafaycutesh lhjunashvatjulh nava lhech napu': pa chicufa'yesh t'ajuya ja vatcasinô ti lhcumjayashesh pa lhanfanash ti chiyvômjatch'e.

⁸ Lhjunashjulh ja vatcasinô ti tcufayeshjop pa yaquiset pan yie' ti chiylhônsham, pa mônlhaaesh jayu lhpa t'ôjeche pa yaquiset.

⁹ Shi' lhacôm'a pava vatcufayjatesesh pava chiycôvjiyan chineshch'e lhpa yucuveshi shi' lhacôm'a pava chiyanch'e pa chitataych'e shi' pa vatcôclôlhjanjavat t'ajuya ja vatcasinô ca nanchaaj pa vatcufayjat.

¹⁰ Lhech lhanfanasha lhacôm'a pava vatcufayjatesesh pava chiycôvjiyan, ti chiyot'ateshi pa lhape' shi' pava chiyclajojiyan, pa t'ajuya jayu lhacôm'a papi lhcles ja Aarón ca lhjunasheesh vatjulh.

Chivancafaycutesh pava vatcufayjatesjop ti chivaniisclanch'e

¹¹ “Navôque chivancafaycutesh t'ajuya pava chiycufa'yeshjop ti chivaniisclanch'e pa chinôveshjop na Lhcaanvacle:

¹² Ca lhechtaja pa vatcufayjatjop pa ti chivatc'usinatesh'in, pa chincufa'yesh shta pava chiyajotesh ameyshi pa yiyalhiyan chiyot'ateshi pa lhape', pava chiyclasayanch'e ameyshi pa yiyalhiyan chisichat'apee pa lhape', shi' pava chiyajotesh chineshch'e lhpa yucuveshiy pa isshi' climshi chiyot'ateshi pa lhape';

¹³ pa nu'ja shta pa vatcufayjatjop pa chivatc'usinatesh'in shi' ti chivaniisclaneshch'e pa chinanchaajnee jayu pava chiyajot'esh lhpa yucuve yieyshi pa yiyalhiyan.

¹⁴ Pa lhacôm'a pava chiycufa'yesh ca natcum'e jayu pa nanchajey na Lhcaanvacle jan lhjunash ti tcufayeshlhatam, pa t'ajuya ja vatcasinô ca nisichat'esh pava lhavoyey pa vatcufayjatjop ti chivaniisclanch'e.

¹⁵ “Pa t'asjaan pa yaquiset chicufa'yeshjop ti chivatc'usinat'in shi' ti vaniisclanch'e pa isjop ca nituj tatsha pa lhech nalhu ti tcufayesh; pa ya aj ca nasclan pa t'iya ca natjuya pa nijooylha nalhu.

¹⁶ Nan lhjunash ti chiycufa'yesh pa yaquiset ti chiyôfisjatch'e pa vat'ônashesh, ja't'ajesha pa vatcufayjat ti chitôlhjatlhavne, isjop jayu ca chintuj tatsha pa lhech nalhu ti chiycufa'yesh, taj ti pa ca mônlhatajee isjop ca chintuj pa nijooylha nalhu;

¹⁷ ca pu'janataja pava lhnalhus jôjjeclay mônlhee pa t'asjaan pa yaquiset chicufa'yesh pa chinapjunsham jayu lhacôm'a.

¹⁸ Ca nicaajtaj papi tuj ti pu'jana pava lhnalhus pa t'asjaan pa chiycufa'yeshjop ti chivaniisclanch'e, pa lhech chiycufa'yesh pa tanca chincuumjulh, pa tanca chinvôntôyich'e, pa lhech t'asjaan pa chinapun. Pan tuj pa lhech pa yiesh jayu pa lhech sasch'e.

¹⁹ “Pa t'asjaan ti chisasiyanesh pa'na pa sasjop ca chintuj, pa chinlhônsham. “Lhacôm'a papi vat'isinat pa isjop jayu ca nituj pa t'asjaan.

²⁰ “Vooy papi vatsasiyan ca nitujtaj pa t'asjaan pa vatcufayjatjop ti chivaniisclanch'e, pan yitsôt'ajesh na Lhcaanvacle, pa chinjutfach'eec'oya japi lhchifas.

²¹ “Papin t'ajaya pa yie' ti sas —nan lhjunash ti sas pa nivacle ja't'ajesha ti sas pa yaquiset, ja't'ajesha pav'elh matas ti nichiclafeesh—, pa nijooylha ti tuj pa t'asjaan ti chiycufa'yeshjop ti chivaniisclanch'e, pan yitsôt'ajesh na Lhcaanvacle, pa chinjutfach'eec'oya japi lhchifas.”

Chivancafaycutesh pa lhanfanash pa lhôtje shi' pava lhavoyey

²² Pa Lhcaanvacle yiyôjiesha pa Moisês pa yit'esha:

²³ “Pa anfacleem napi Israel lhavos navôque: Ya aj ca atujelh pa lhôtje pa jayanaj vôcô, pa tashinshtaj ja't'ajesha lhpa tashinshtayche.

²⁴ Pa lhôtje pava yaquisetes vafsha'ne ja't'ajesha pava tniyjôc isjop ca achenshelh pa'na ca acuumjelh'e, pa ya aj ca atujelh.

²⁵ “Papu ca naôvtaj'e ca nitujtaj pa lhôtje pava yaquisetes ti chiyieshjop na Lhcaanvacle ti chiycufa'yesh ti chinapjunsham, pa chinjutfach'eec'oya japi lhchifas.

²⁶ “Yiey pa ca vi'tajelh'e avaatsheelh sasjop jayu ca atujelh pava lhavoyey pava ajôclôs shi' pava yaquisetes.

²⁷ Papu ca nitujtaj pa ca lheytaja pava lhavoyey pa chinjutfach'eec'oya japi lhchifas.”*xf*

Pava chiyvenchatem papi vatcasinôclesh

²⁸ Pa Lhcaanvacle yiyôjiesha pa Moisês pa yit'esha:

²⁹ “Anfacleem napi Israel lhavos pan yiesh'e t'ajuyish na Lhcaanvacle pa lhcufayjatjop ti chivaniisclanch'e pa isjop jayu ca nanchajey t'ajuyish na Lhcaanvacle.

³⁰ Pa natcumesh'e pava yitsôt'ajesh lhpôcôtôy ca nanchaajtajey t'ajuyish na Lhcaanvacle pa lhcufayjat chinapjunsham, pa lhôtje yie' t'oot pa lhech t'oot t'ajuya ti yisnatshem na Lhcaanvacle ti nachesheyshi.

³¹ Ja vatcasinô pa ninapjunsham pa lhôtje yiey ja itôvat'esh, taj ti vooy pa t'oot t'ajuya jayu ja Aarón shi' japi lhcles.

³² Vooy lhpa lht'oycha lhfayishey pa yaquiset ti chiycufa'yeshjop ti chivaniisclanch'e pa chinjutey jayu ja vatcasinô ti lhcufayjat'esh lhatam.

³³ Lhpa lhech lht'oycha lhfayishey pa yaquiset chiyjuyjata jayu ja vatcasinô jan tcufayeshjop pa lhôtje shi' pava lhavoyey ti chivaniisclanch'e,

³⁴ lhayaash pava chiycufa'yeshjop ti chivaniisclanch'e ti jaycumeshjulh japi Israel lhavos pa lhech t'oot ti chiytsôôtjatesh ti vatcufayjat'esh, vooy lhpa lht'oycha jan lhjunash ti tcufayesh lhatam, pa jajutey jayu ja Aarón shi' papi lhcles ti t'ajuya jayu yajatesh pava lhech lhcufayjates japi Israel lhavos.”

³⁵ Pava vatcufayjates ti chinapjunsham ti chiyôclôjesh na Lhcaanvacle, pava lhech chiyvenchatesh ti chiyetônjop ja Aarón shi' papi lhcles, pa ninaatsjulhesh ts'ivee pa nalhu ti chivenchatem na Lhcaanvacle ti lhcasinoclesh lhavaatsha.

³⁶ Pa Lhcaanvacle yiyôjiesha ti yit'eshem japi Isarael lhavos ca nicatsônesh pa nalhu ti chiyvenchatem ti tanca nivô'mesh ti chitayôjijanesh pa nitôlhesh'e papi lhnavot pa namja papi lhcles.

³⁷ Navôque chiyvancafaycutesh t'ajuya pava chiylhônshamsha'ne, pava vatcufayjatesesh pava chiycôvjiyan, pava chiycufa'yeshjop pa sasch'e, shi' pa chitamenesh lhavach, pava vatcufayjatesesh ti chivenchat shi' pava vatcufayjatesjop ti chivaniisclanch'e.

³⁸ Pa Lhcaanvacle nifaclemch'e pa Moisês ti yiey lhpa utiyuc Sinaí, ti yiey pa am'e pa'na yiey lhpa Sinaí pa yiyôjiesha papi Israel lhavos ca nanchaj'in pava lhcufayjates.