Levítico 6 - Nivaclé Bible

Pava vatcufayjatesjop ti tôlh'ejop pava chivantantajesh

¹ *xd* Pa Lhcaanvacle yiyôjiesha pa Moisês pa yit'esha:

² “Ca nicaajtaj papu yisnatesh pa sasch'e shi' ti tamenesh lhavach pa ti vantantajesh yiey t'ajuyish na Lhcaanvacle ti tôlh'ejop ti yijôtsôclôn'in pa lhavelh ti caaj pa caclectajesha ja't'ajesha ti t'aalhsha, ja't'ajesha pa t'acutesh ja't'ajesha pa tjôcjanesh,

³ ja't'ajesha ti vantanesh ti nifom pa chiyvôôm, ja't'ajesha ti yinôôlhjônchat pa t'ônashesh (cavôque matas sasch'e'esh ti yisnatesh),

⁴ pa tamenesh lhavach jayu côque sasch'e. Pa lhe'naa ti tajulhey ca nachaj pan t'acutesh ja't'ajesha pan tjôcjanesh, ja't'ajesha pan caclectajesha ja't'ajesha pan nifom,

⁵ ja't'ajesha pa ca naôtaj'e pav'elh ti yinôôlhjônchat pa t'ônashesh. Pa tajulhey ca nachajem lhacôm'a pan yitsôt'ajesh, pa nashjat'apee pava ve'lhanôjesh t'iya'esh pa t'ajô'jqu'e, ca nanchaajtaj pa lhcufajatjop pa tamenesh lhavach.

⁶ Pa lhech lhcufayjat'em na Lhcaanvacle lhecha pa tashinshtaj jayanaj amem pa lhayasha, vooy pa t'ajôjqu'e pa atsjulhch'ejop jayu, pa lhech isjop ca natcum'e pa lhclô' pa nicha'jey ja vatcasinô ti vatcufayjat'eshjop pa chitamenesh lhavach.

⁷ Lhecheesh ja vatcasinô pa natcumeshemjulh na Lhcaanvacle ti chiyvômjatch'e pan yie' pava matas ti lhsasch'eesh pa lhech, vooy pa sasch'e pa chinvômjatch'e jayu.”*xe*

Chivancafaycutesh pava chiylhônshamsha'ne

⁸ Pa Lhcaanvacle yiyôjiesha pa Moisês pa yit'esha:

⁹ “Ajutem ja Aarón shi' japi lhcles nava chivancafaycutesh t'ajuya pava chiylhônshamsha'ne: Pa yaquiset vatcufayjat'esh isjop jayu ca yaajlhashi pava foyjoc yichesh yiey ja itôvat'esh pa nameshch'e pa tulh, pa jaspa nitif jayu pa itôj.

¹⁰ Ja vatcasinô pa nuych'ejop lhpa t'uyjatshi shi' lhpa vatvayjasche, pa nanjooylha ca ninayjatvane pa lhavclo' pa yaquiset ti chinapjunsham yiey ja itôvat'esh pa vena nanshi'jop ja itôvat'esh.

¹¹ Pa nanjooylha ca nancayôjatey lhap'elh ca nuych'e pa nicha'jey jayu pa lhavclo' yiey pa is'e' fach'ee ja vat'ichavat.

¹² “Pa itôj ti yichesh ja itôvat'esh pa ya aj na ca amcat. Ja vatcasinô isjop jayu ca nujam'in pav'elh yeclôy pant'ajô'jesh ti nich'a nalhu'in pa nasclansha'nec'oya pa itôj pa yaquiset ti chinapjunsham jayu, jô'tajesh shta ti chinapjunsham pa lhôtje pa vatcufayjat'esh ti chivaniisclanch'e yiey ja itôvat.

¹³ Pa lhech itôj yiey ja itôvat'esh isjop ca nôquesh yajatesh. Pa sasjop ca chinamcat.

Chivancafaycutesh pava vatcufayjatesesh pava chiycôvjiyan

¹⁴ “Navôque chivancafaycutesh chiyasinôquiesh pava vatcufayjatesesh pava chiycôvjiyan: Japi vatcasinôc isjop ca nôvesh'e t'ajuyish ja itôvat'esh, nan t'ajuyish'e na Lhcaanvacle.

¹⁵ Pa ve'lhaa japi lhech pa natcum'e pa climshi vatcufayjat'esh shi' pa lhape', pa nu'esham lhacôm'a pa acôjqu'e pa lhniish ti tcufayesh jayu, pa nilhônesh'e yiey ja itôvat'esh ti vatcufayjat'eshjop ti chiyaychavalheshch'e ti yacônch'a pa lhniish na Lhcaanvacle.

¹⁶ Vooy pava mônlhee vatcufayjat'esh pa tuj jayu ja Aarón shi' japi lhcles, ameyshi pa yiyalhiyan pan chiyan'e ti chiyvenchat, yiey ja clayôych'e ja Tsha'nuvo'esh ti Chivatvan'e.

¹⁷ Ya aj ca ajoteshi pava yiyalhiyan. Ti jajutey japi lhech ti chiyetônjop nava yicufayjates chinapjunsham, nava lhech lhasnôyjesesh, jan lhjunash java vatcufayjat'eshjop pa sasch'e shi' pa chitamenesh lhavach.

¹⁸ Pa yajateesh jayu lhacôm'a papi yitsjôy lhcles ja Aarón ca nituj pava t'ajuya vatcufayjates chiylhôneemsham na Lhcaanvacle. Lhacôm'a pa ca naôtaj'e navôque vatcufayjates pa chiy'isiyan jayu.”

Pa lhcufayajt papi vatcasinôc

¹⁹ Pa Lhcaanvacle yiyôjiesha pa Moisês pa yit'esha:

²⁰ “Navôque lhcufayjat'esh ja Aarón shi' japi lhcles isjop ca nôveshjop na Lhcaanvacle ti chiyvenchatesh ti vatcasinôclesh: napu' kilos pa climshi isshi' jan lhjunash ti vatcufayjat'esh java chiycôvjiyan, pa ninatshey pa t'iya'esh ti nich'a nalhu vooy peelh t'iya'esh ca nuutajeesh, pa ya aj ca niamiyanshi pa ve'lha nalhu.

²¹ Isjop ca nanshi' pa vatcaclôlhjanjavat pa lhcufayjat, pa nacshenjatesh pa lhape', pa nanjooylha ca nôveshnee ca nic'asatsha'ne ti vatcufayjat'esh ti yacônch'e pa lhniish na Lhcaanvacle.

²² Nôque lhjunasha ca nasnatajesh pa chiytsôôtjatesh ti vatcasinô lhaôs ja Aarón ti chiy'isinatesh; jan yie' ti t'ônasheshem yajatesh na Lhcaanvacle, pa isjop jayu ca ninapjunsham lhacôm'a.

²³ Lhacôm'a pava tcufayesh japi vatcasinôc pa chinapjunsham jayu lhacôm'a; pa ama papu ca nituj.”

Chiyvancafaycutesh pava vatcufayjatesjop pa sasch'e

²⁴ Pa Lhcaanvacle yiyôjiesha pa Moisês pa yit'esha:

²⁵ “Anfacleem ja Aarón shi' japi lhcles navôque chivancafaycutesh t'ajuya pava chiycufa'yeshjop pa sasch'e: Pa yaquiset ca chincufaaytajeshjop pa sasch'e isjop jayu ca chinsej'ôcji lhcôyish yiey t'ajuyish na Lhcaanvacle, yiey jan chiyclôn'esha'neen pava yaquisetes ti chinapjunsham, lhayaash jô lhech ti lhasnôyech'e.

²⁶ Ja vatcasinô jan tcufayesh pa vatcufayjat'eshjop pa sasch'e isjop jayu ca nituj, taj ti isjop jayu ti tuj yiey ja lhasnôyech'e, jan yie' ja clayôych'e ja Tsha'nuvo'esh ti Chivatvan'e.

²⁷ Lhacôm'a pava ca naôvtaj'e pa t'asjaan pa yaquiset pa chiy'isiyan jayu, vooy lhpa yuych'e ca namtajch'e pava lhavoyey pa isjop jayu ca nicleesh yiey ja lhasnôyech'e.

²⁸ Vooy pa tô'lhôs pan navayesh'e pa t'asjaan pa vatcufayjat isjop jayu ca chinoflhitesh; taj ti ca ninavaytajesh'e pa clesanilh yucch'e pa t'asjaan, pa chincleshch'e jayu pa chintifch'e lhacôm'a.

²⁹ “Nôque vatcufayjat uj ti lhasnôyech. Tsi'shaajop ca nituj japi vatcasinôc.

³⁰ Taj ti tan jayu ca nituj pa yaquiset vatcufayjat'eshjop pa sasch'e, vooy pava lhavoyey pa nicha'jey jayu ja Tsha'nuvo'esh ti Chivatvan'e, ca jaspa chiyvômjatch'e pava sasch'e yiey ja is'ôcji lhtôvash. Pa lhech vatcufayjat isjop jayu ca nilhônsham.