Levítico 5 - Nivaclé Bible

Pav'elh lhjunashch'e ti chicufa'yeshjop pa sasch'e

¹ “Ca nicaajtaj papi chitôney ca nanfactaj pa'na ti yi'van ja't'ajesha ti tpeeycheyesh, taj ca nivaantantajesh ca nanfac, pa yisnatesh pa sasch'e pa isjop ca chinachaja ca natmenlhavach.

² “Ca nicaajtaj papi t'ajaya pa sas, pan lhjunash pa yaquiset sas ti vaf, ca lhechtaja pa yalhanashch'een ja't'ajesha pa nitojaa, ja't'ajesha pa t'ôta'yesh pa t'oot sas, pa mônlheeshi jayu ti sas, pa natmenesh lhavach, lha'ma ti nintôôytajeshlhavne.

³ “Ca nicaajtaj papi t'ajaya pa lhsasi pa nivacle, pa ca naôtaj'e ca nisasiyantaj, taj ti nintôych'e pan t'aplhueshch'e, vooy ca nitôôytajch'e pa natmenesh lhavach.

⁴ “Ca nicaajtaj papi lhfanishesh'in ti nifac ti yetônjop pa'na ti yiisinatjop ja't'ajesha ti yiv'ojiyan —côque lhfanishesh ti yetônjop ti yisnatesh ti ninaychavalhjop'in—, taj ti nintôych'e pa t'ôplhueshch'e, vooy ca nitôôytajch'e pa natmenesh lhavach ca naôtaj'e cavôque a'na matas.

⁵ “Pan tamenesh lhavach pa ca naôtaj'e cavôque, pa isjop jayu ca nitatfaclesh pa sasch'e ti yisnatesh

⁶ shi' ca nôveshjop na Lhcaanvacle lhpa ve'lha lhclô' ti lhcufayjat'eshjop pa sasch'e ti yisnatesh; isjop ca lhecha lhpa tashishtaj ja't'ajesha lhpa tashinshtayche, pa lhech lhcufayjat vooy pa vatcasinô pa natcumeshjulh ca chinvômjatch'e pava lhsasch'e pa lhech.

⁷ “Ca amtajeem ca natcasha'ya pa tashinshtaj, pa isjop ca nanchaaj jayu pava napu' oftaas ja't'ajesha pava napu' ofo lhcles ti t'ajuya pa sasch'e ti yisnatesh: pa ve'lha pava lhech lhcufayjat'esjop pa sasch'e, vooy peelh pa nilhônsham.

⁸ Isjop jayu ca nichajey ja vatcasinô, vooy pa lhech pa nijutsjat jayu ca natcufa'yeshjop pa sasch'e, pa nivocjotey pa lhavo' pa ya aj ca nanclan'e pa lhshatech;

⁹ pa nanjooylha ca nantonjatsham pava lhavoyey pan tcufayeshjop pa sasch'e yiey ja lhavôjqu'e ja itôvat'esh, vooy pava mônlhee lhavoyey pa nôtsiych'etsham ja itôvat'esh, lhayaash ti lhcufayjat'eshjop pa sasch'e.

¹⁰ Vooy peelh ca ninapjunsham jayu, jan yônasheshem; nôque lhjunash ja vatcasinô pa natcumeshjulh ca chinvômjatch'e pa lhsasch'e ti yisnatesh pa lhech, vooy pa sasch'e chiyvômjatch'e jayu.

¹¹ “Ca amtajeem ca natcasha'ya pava napu' oftaas ja't'ajesha pava napu' ofo lhcles, pa isjop jayu ca nichaaj pava napu' kilos climshi isshi' ti lhcufayjat'eshjop pa lhsasch'e. Pa ya aj ca nu'eyshi pa lhape' pa nilhecha pa acôjqu'e pa lhniish, lhayaash ti vatcufayjat'eshjop pa sasch'e.

¹² Isjop jayu ca nichaajshey ja vatcasinô, vooy jô lhech pa t'acuumjam jayu ti chiyaychavalheshch'e pa ninapjunsham yiey ja itôvat'esh ca nu'ja java vatcufayjates ti chinapjunsham ti chiyôclôjesh na Lhcaanvacle. Pa lhech lhcufayjat'eshjop pa sasch'e,

¹³ ca jaspa jô lhech vatcasinô ca natcumeshjulh ca chinvômjatemch'e pa lhsasch'e pa ca naôtaj'e ti yisnatesh pa lhech, vooy pa sasch'e pa chiyvômjatch'e jayu. Yiey jan lhanfanash java vatcufayjatesesh pava chiycôvjiyan, vooy pava mônlhee t'ajuya jayu ja vatcasinô.”

Pava vatcufayjatesjop pa chitamenesh lhavach

¹⁴ Pa Lhcaanvacle pa yiyôjiesha pa Moisês ti yit'esha:

¹⁵ “Papu ca nasnatajesh pa sasch'e ti ninach'anesh pa natmenesh lhavach ti t'ataa pava isis chiyvenchatesh na Lhcaanvacle, pa isjop ca nanchaaj pa lhclô' tashinshtaj amem pa lhayasha, ti lhcufayjat'eshjop pan tamenesh lhavach, pa nanchajey na Lhcaanvacle. Vooy pa t'ajôjqu'e pa tashinshtaj isjop ca chinatsjulhch'ejop lhpa tinshanja clim yiey pan lhcaclecliniyash ti yiey pa is'ôcji lhtôvash ti vatcufayjat'eshjop pa chitamenesh lhavach.

¹⁶ Pa lhech isjop ca nishayanch'e ti t'ataa pava isis chiyvenchat pa nashjat'apee pa ve'lhanôjesh t'iya'esh ca nishayan vooy pan tc'a'sham pa nijutshey ja vatcasinô. Pa nanjooylha, pa tashinshtaj pan tcufayeshjop pa sasch'e, ja vatcasinô pa natcumeshjulh ca chinvômjatshi pa lhsasch'e papi lhech, vooy pa sasch'e pa chinvômjatch'e jayu.

¹⁷ “Ca nicaajtaj papi yisnatesh pa sasch'e ti t'ajuyeshjulh nava lhayôjijates na Lhcaanvacle, lha'ma ca nintôôytajach'e, pa natmenesh lhavach pa isjop jayu ca chinachaja pan tamenesh lhavach.

¹⁸ Pa lhe'naa ti isjop jayu ca nanchaaj pa lhclô' tashinshtaj amem pa lhayasha, vooy pa t'ajôjqu'e pa atsjulhch'ejop jayu, pa nicha'jey jayu ja vatcasinô ti vatcufayjateshjop pa chitamenesh lhavach ca jaspa chincumeshjulh ca chinvômjatch'e pa sasch'e ti yisnatesh papi lhech ti ninach'anesh, vooy pa sasch'e pa chinvômjatch'e jayu.

¹⁹ Pa lhech vatcufayjateshjop pa chitamenesh lhavach, lhayaash papi lhech ti tamen lhavach yiey t'ajuyish na Lhcaanvacle.