Levítico 4 - Nivaclé Bible

Pava vatcufayjatesjop pa sasch'e

¹ Pa Lhcaanvacle yiyôjiesha pa Moisês ti yit'esha:

² “Anfacleem napi Israel lhavos nava lhnônashjop ca nicaajtaj papi nintôych'e ti t'ajuyjulh nava lhayôjijates na Lhcaanvacle pa yisnatesh pava nichinvashantajem, pa nôque afanisheeshem jayu:

³ “Ca nasnatajesh pa sasch'e pa chiytsôôtjatesh ti vatcasinô'esh, ca natmentajesha napi lhchifas, pa isjop jayu ca nijutey na Lhcaanvacle pa ve'lha vôcô nich'a uj amem pa lhayasha ti lhcufayjateshjop pa lhsasch'e ti yisnatesh.

⁴ Pa nicha'jey t'ajuyish na Lhcaanvacle ti yiey na chiyuy'een na Tsha'nuvo'esh ti Chivatvan'e; lhech'e pa nichaajsha'ne pa lhshatech, pa nanjooylha ca nisej'ôcji lhcôyish ca nôveshjop na Lhcaanvacle.

⁵ Vooy lhavaatsha pa lhech pa natcum'e jayu pava napu' lhavoyey pa vôcô nich'a uj pa nicha'jey jayu na Tsha'nuvo'esh ti Chivatvan'e;

⁶ pa lhech'e ca nivayitesh lhpa lhpasche pava lhavoyey pa nisichata jayu pa napu'yama pa t'ajôjeesh yiey t'ajuyish na Lhcaanvacle, natjuyesha na sivôclôc lhayeech yiey na is'ôcji lhtôvash.

⁷ Pa yip'aclanesh jayu shta pava lhavoyey pava lhac'uclesh ja itôvat'esh t'ajuya na chiytseclôlhey acôjqu'e pa lhniish —nan yie' na Lhcaanvacle, yiey na Tsha'nuvo'esh ti Chivatvan'e—, vooy lhacôm'a pava lhavoyey ti mônlhee pa chinôtsiyesh'e yiey ja cotsjat'e ja itôvat'esh pava ti chiyilhônsham, yiey na chiyuy'een na Tsha'nuvo'esh ti Chivatvan'e.

⁸ Pa nanjooylha ca nanclaneshch'e pa vôcô lhcufayjat'eshjop pa sasch'e lhacôm'a pa lhôtje yiesh pava lhavaclay,

⁹ pava napu' lhshanantiyôc shi' pan yiesh lhôtje shi' pan yiesh pa yitsavalhch'e t'aclô', shi' pa lhôtje yiesh pa t'acôjlhôc, pava lhech isjop jayu nanclanesh'e vatjuulh pava lhshnantiyôc,

¹⁰ jan lhanfanash ti chinclanesh'e pa vôcô ti vatcufayjat'eshjop ti chivaniisclanch'e. Pa nanjooylheesh ja vatcasinô ca ninapjunsham yiey ja itôvat'esh pava chiylhônsham.

¹¹ Taj ti pa t'ôj pa vôcô shi' lhacôm'a pa t'asjaan, pa nu'ja pa lhshatech, pava lhcaclôy, pava lhavaclay shi' pava lhasamjuy

¹² —ja't'ajesha chiyipjôclônsha pa jayanaj—, pa nicha'jey yiey pa tavashay'e is'e fach'ee na vat'ichavat, pan chiyfos'een pa shnomaj, ca naclapju'ec'oya pa shnomaj pava yeclôy ca nilhônsham.

¹³ “Ca lhacôm'ataja napi lhtachifas Israel lhavos ca nasnatajesh pa niysa' ca nichintôôytajeesha, shi' ca amtaja papu ca nitôôytajch'e pa ti t'ajuyeshjulh nava lhayôjijates na Lhcaanvacle vooy lhavaatsha pa natmeneshlhavach ts'ivee,

¹⁴ vooy ca nitôôytajch'e pa lhsasch'e ti yisnatesh ts'ivee pa isjop jayu ca natcufa'yeshvatam pa ve'lha vôcô nich'a uj ti lhcufayjat'eshjop pa lhsasch'e. Pa nicha'jey t'ajuyish jayu na chiyuy'een na Tsha'nuvo'esh ti Chivatvan'e,

¹⁵ jan yie' japi nitaôvclasa'esh japi lhchifas pa nichaajsha'ne ts'ivee pa lhshatech pa lhech vôcô nich'a uj yiey t'ajuyish'e na Lhcaanvacle, pa lhech yie' ca nisej'ôcji lhcôyish ts'ivee.

¹⁶ Pa nanjooylheesh ja chiytsôôtjatshi ti vatcasinô'esh ca nichaaj pava napu' lhavoyey pa vôcô nich'a uj yiey na Tsha'nuvo'esh ti Chivatvan'e,

¹⁷ pa nivayitesh lhpa lhpasche pava lhavoyey pa nisichatesh pa napu'yama pat'ajô'jesh yiey t'ajuyisn na Lhcaanvacle, ca natjuyesha ja sivôclôc lhayeech.

¹⁸ Pa nip'aclanesh jayu pava napu' lhavoyey pava lhac'uclesh ja itôvat'esh jan yie' na Lhcaanvacle, yiey na Tsha'nuvo'esh ti Chivatvan'e. Vooy lhacôm'a pava mônlhee lhavoyey pa nôtsiych'etsham ja cotsjat'e ja itôvat'esh ti chiylhônsham, nan yie' ja chiyuy'een na Tsha'nuvo'esh ti Chivatvan'e.

¹⁹ Shi' ca nanclaneshch'e lhacôm'a pa vôcô pa lhôtje, pa ninapjunsham jayu yiey ja itôvat'esh;

²⁰ pa lhech lhfanisheesh jayu pa lhech jayanaj pa nivo'yeshch'e pa lhanfanash pa vôcô ti vatcufayjat'eshjop pa sasch'e; pa lhech lhjunasheesh ja vatcasinô ca natcumeshjulh ti chiyvômjatemch'e pava lhsasch'e ts'ivee, vooy pa sasch'e pa chinvômjatch'e jayu.

²¹ Pa nanjooylha ca nayjatshi pa lhech vôcô pa vat'ichavat, pa ninapjunsham jayu, pan lhanfanash pa vatjutsa' vôcô nich'a uj, lhayaash pa lhech lhcufayjat'eshjop pa lhsasch'e japi lhtachifas.

²² “Ca nicaajtaj pa chinvacleyan ti yisnatesh pa sasch'e ti t'ajuyeshjulh nava lhayôjijates na Lhcaanvacle lh'Dios, pa tamenlhavach jayu ti nintôych'e.

²³ Vooy ca nitôôytajch'e pa sasch'e ti yisnatesh, pa isjop jayu ca nanchaaj pa lhcufayjat'esh pa fusuc amem pa lhayasha.

²⁴ Pa nichaajsha'ne jayu pa lhshatech pa fusuc, pa nisej'ôcji lhcôyish jayu yiey t'ajuyish na Lhcaanvacle, yiey jan chiyclôn'esha'neen pava yaquisetes ti chinapjunsham, ti chiycufa'yeshjop pa sasch'e.

²⁵ Pa nanjooylha ja vatcasinô ca nit'ajayesheyshi lhpa lhpasche pava napu' lhavoyey pa yaquiset vatcufayjat'eshjop pa sasch'e, shi' ca nip'aclanesh pava lhac'uclesh ja itôvat'esh pava chiylhônsham, pa nanjooylhach'e ca nôtsiy'ôcji ja itôvat'esh pava lhavoyey mônlhee

²⁶ pa ninapjunsham lhacôm'a pa lhôtje yiey ja itôvat'esh jan lhanfanash pa lhôtje pa vatcufayjat'esh ti chivaniisclanch'e. Pa lhech lhjunashesh ja vatcasinô ca natcumeshjulh ti chiyvômjatch'e pa lhsasch'e pan chinvacleyan, vooy pa lhech sasch'e pa chinvômjatch'e jayu.

²⁷ “Ca nicaajtaj papi nivaclesha'ne atesha ca nasnatajesh pa niysa' ti nintôych'e pa natmeneshlhavach ti t'ajuyeshjulh nava lhayôjijates na Lhcaanvacle,

²⁸ vooy ca nitôôytajch'e pa sasch'e ti yisnatesh pa isjop jayu ca nichaaj lhpa tashinshtayche amem pa lhayasha ti lhcufayjat'eshjop pa sasch'e ti yisnatesh.

²⁹ Pa nichaajsha'ne pa lhshatech pa lhech yaquiset ti tcufayeshjop pa sasch'e, pa nanjooylha ca nisej'ôcji lhcôyish yiey ja chiyiesh'e ti chiylhônsham'in.

³⁰ Pa lhecheesh ja vatcasinô pa nit'ajayesheyshi lhpa lhpasche pava lhavoyey shi' ca nip'aclaneshch'e java lhac'uclesh ja itôvat'esh java chiylhônsham, vooy lhacôm'a pava lhavoyey mônlhee pa nôtsiych'etsham na itôvat'esh.

³¹ Pa isjop shta ca nanclanch'e lhacôm'a pa lhôtje jan lhanfanash ti chinclanch'e pa yaquiset ti vatcufayjat'eshjop ti chivaniisclanch'e, pa ninapjunsham yiey ja itôvat'esh ti yacônch'e pa lhniish na Lhcaanvacle. Nôque lhjunash ja vatcasinô pa natcumeshjulh ti chiyvômjatemch'e pa sasch'e papi lhech, vooy pa sasch'e pa chinvômjatch'e jayu.*xc*

³² “Papu lhech ca nanchaajtaj lhpa tashinshtaj ti lhcufayjat'eshjop pa sasch'e, pa isjop jayu ca nanchaaj lhpa ôcjeeclô amem pa lhayasha.

³³ Pa nichaajsha'ne jayu pa lhshatech lhpa lhech tashinshtaj, pa nanjooylha ca nisej'ôcji lhcôyish ti lhcufayjat'eshjop pa sasch'e pa nôvesh'e ja chiyclôn'esha'neen pava yaquisetes ca ninapjunsham.

³⁴ Pa lhecheesh ja vatcasinô pa nit'ajayesheyshi lhpa lhpasche pava lhavoyey pa lhech yaquiset vatcufayjat'eshjop pa sasch'e pa nip'aclanesh jayu java lhac'uclesh ja itôvat'esh pava chiylhônsham, vooy lhacôm'a pava mônlhee lhavoyey pa nôtsiych'etsham ja itôvat'esh.

³⁵ Pa nanjooylhajat ca nanclanch'e lhacôm'a pa lhôtje jan lhanfanash ti chinclaneshch'e pa tashinshtaj ti chiycufa'yeshjop ti chivaniisclanch'e, pa ninapjunsham jayu pa lhôtje yiey ja itôvat'esh, pa nu'esham pava vatcufayjates ti chinapjunsham ti yôclôjesh na Lhcaanvacle. Nôque lhjunash ja vatcasinô pa natcumeshjulh ti chiyvômjatemch'e pa lhsasch'e papi lhech ti yisnatesh, vooy pa sasch'e pa chinvômjatch'e jayu.