Levítico 27 - Nivaclé Bible

Pava chiyvenchatesh pa Dios

¹ Pa Lhcaanvacle yiyôjiesha pa Moisês pa yit'esha:

² “Anfacleem napi Israel lhavos nôque lhjunash: Ca nicaajtaj papi yen ti yishayan na Lhcaanvacle pa nifaclemey yiey pan tajulh'esham pan t'ajôjqu'e pa ve'lha nivacle,

³ pa ve'lha yitsuuj tôlh'e' veinte pa namjey papi sesenta pava lhnincôpes pa yinôôclhanite'ma pa t'ajôjqu'e pa chiyney pava cincuenta tinshanjayesh pa clesanilh clim, yiey pan yitsjulh'ejop ti chit'acumesh'een pa is'ôcji lhtôvash;

⁴ ca lhechtaja lhpa ve'lha ôcjeclô pa niney jayu pava treinta tinshanjayesh pa clesanilh clim.

⁵ Pa vooy papu tôlh'e' cinco yamjey veinte pava lhnicôpes pa niney jayu pava veinte tinshanjayesh pa clesanilh clim ca lhechtaja pa nivacle, vooy lhpa ôcjeclô pa niney pava diez tinshanjayesh pa clesanilh clim.

⁶ Vooy pa t'ajuya papi taôvclas ve'lha pa lhjive'cla pa namjey pava cinco lhnincôpes, pa niney jayu pava cinco tinshanjayesh pa clesanilh clim pa ve'lha yitsuuj, pa vooy lhpa ôcjeclô pa niney jayu pava tres tinshanjayesh pa clesanilh clim.

⁷ Vooy papi yash'apee ti sesenta pava lhnincôpes pa niney jayu pava quince tinshanjayesh pa clesanilh clim papi yitsjôy, vooy papi ôcjeclôy pa niney jayu pava diez tinshanjayesh pa clesanilh clim.

⁸ Taj ti papu yaash ti ts'aclaay ca nishayantaj pa chiyney, pa chiychajeyshi jayu pa vatcasinô ca jaspa ninôôclhanite'ma pa nich'a chiyney, yiey pa ca t'ônashtajeesh ca niisinatajop pan yisnateshjop ti nifaclemey.

⁹ “Ca lhechtaja pava aclôyelh ca istajajop ti lhtisshelh pa Lhcaanvacle, pa apjôclônelhem ca ajutelhey pa Lhcaanvacle pa chin'isinatelh'am jayu,

¹⁰ pa sasjop jayu ca ancayôjatelhey paelh aclô'elh pan lhjunash pa is ja't'ajesha pa niysa'. Nan lhjunash ca ancayôjatajelhey paelh aclô'elh, ti acu'faytajeshelh, pa chiyajulhjatey jayu ca chin'isinatem pava lhech napu'.

¹¹ “Ca lhechtaja pa aclô'elh niysa' ti saselhjop'am ca atisshelh pa Lhcaanvacle, pa acha'jelheyshi jayu pa vatcasinô

¹² jaspa yinôôclhanita pa t'ajôjqu'e pa chiyney yiey pan lhjunash pa aclô'elh. Pa chiyney yinôôclhanita pa vatcasinô pa tajulhey jayu ca chinatcumeshelh'ajulh.

¹³ Ca eetajesh ti lhachaj pa aclô', pa tajulhey jayu ca ajut pava ve'lhanôjesh t'iya'esh ca ashjat'apee pava chiyney.

¹⁴ “Papu ca nivenchatajesh pa lhajpôyich pa Lhcaanvacle, pa vooy pa vatcasinô pa yinôôclhanita jayu pa t'ajôjqu'e yiey pan lhjunash pa jpôyich. Yiey pan yitsjulh'ejop pa vatcasinô pa tajulhey jayu ca chinatcumeshjulh.

¹⁵ Taj ti pan yivenchatesh pa lhajpôyich ca nentaj ti yachajlhavne, pa tajulhey jayu ca nijut pa ve'lhanôjesh t'iya'esh ca nashjat'apee pan t'ajôjqu'e ti chiyitsjulhem'ejop, pa vooy pa lhajpôyich pa napecleyjop jayu ca nitsôt'ajesh.

¹⁶ “Ca nicaajtaj papi yivenchatesh pa Lhcaanvacle pa t'iya'esh pa lhcootsjat, pa vooy pa t'ajôjqu'e pa lhcootsjat pa chiyitsjulheshemch'e jayu yiey pan lhjunash ca nivacalhtaj pava yi'shi', pa chinatsjulheshch'e pava cincuenta tinshanjay pa clesanilh clim pa ve'lhae ts'ivee pava doscientos veinte pa tc'a'sham pava cebada.

¹⁷ Ca chinvenchataj pa cotsjaat pa chinatsjuulhjop pa yincôôp ti chiyin'atee, pa nôôclhaa jayu pa t'ajôjqu'e pa chiyan'eshi.

¹⁸ Taj ti pa chiyvenchat ca nôjtaj pa yincôôp ti chiyin'atee pa vooy pa vatcasinô pa natsjulheshch'e jayu pava tinshanjay pa t'ajôjqu'e jayu, pa nanclaneyshijop pa t'ajôjqu'e ca natsjuulhtajch'ejop pan tc'a'sham pava chiyetônjop pava yincôpes pava amc'oya namjey pa yincôôp ti chiyin'atee.

¹⁹ “Ca niteetajesh pan yivenchatesh pa lhcootsjat ca nachajtajlhavne, pa tajulhey jayu ca natcufa'yesh pa ve'lhanôjesh t'iya'esh pa nashjat'apee pant'ajôjqu'e ti chiyitsjulheshemch'e, pa nitsôt'ajesh shta pa lhcootsjat.

²⁰ Taj ti ca ninteetajesh ca nachajlhavne, pa vooy pa lhech cotsjaat pa natcashaaysha pap'elh, pa sasjop jayu ca ve'lheesh ca nachajlhavne.

²¹ Meelh pa lhech cotsjaat ca camamtajee pa yincôôp ti chiyin'atee, pa lhechesh jayu pa chintsôôtjatesh pa Lhcaanvacle, pa vooy pa vatcasinô pa chiyjuteem jayu pa lhech.

²² “Ca nicaajtaj papi yivenchatesh na Lhcaanvacle pa cotsjaat ti tcashaya, ti nintsôt'ajesh papi tôlhshaam,

²³ pa lhech pa vatcasinô yitsjulheshch'e jayu pan yitsôt'ajesh yiey pant'ajôjqu'e pa cotsjaat namjey pa yincôôp ti chiyin'atee, pôque nivacle yishayan jayu tatsha pa lhech nalhu pa tc'a'sham pant'ajôjqu'e pa cotsjaat, pa niisinatem jayu pa Lhcaanvacle.

²⁴ Pa vooy pa yincôôp ti chiyin'atee, pa isjop jayu ca chinachajem pan tcashayesh, nôque yich'e' pa isa'jop ca nitsôt'ajesh jô pa lhcootsjat.

²⁵ “Lhacôm'a pava t'atsjulheshelhch'e tajulhey ca t'ajôjavatjulh pa tc'a'sham pa lhcaclecli pa tinshanja lhey siclo lhjunashjulh pava veinte geras, pa lhech pa chincumesh'een pa is'ôcji lhtôvash.

²⁶ “Ca nicaajtaj pava vatjutsa' lhcles pava aclôyelh pa yitsôt'ajesh na Lhcaanvacle pava lhech vatjutsa', pa sasjop papu ca nivatvenchatesh. Ca lhechtaja pa vôcô lhaôs ja't'ajesha pa tashinshtaj lhaôs pa nitsôt'ajesh na Lhcaanvacle.

²⁷ Ca lhechtaja pa vatôclô ti nichin'isiyan, pa lhech isjop jayu ca chinachajlhavne pant'ajôjqu'e ti chiyan'ec'oya, pa chinashjat'apee pa ve'lhanôjesh t'iya'esh pa t'ajôjqu'e. Taj ti ca ninteetajeesh ca nachajlhavne, pa isjop jayu ca natcasha'yesh yiey pant'ajôjqu'e ti chinem'e.

²⁸ “Ca nicaajtaj papi yivenchatem na Lhcaanvacle pava t'iyasesh pava yitsôt'ajesh, ca lhechtaja papi nivacle, pava lhclôy ja't'ajesha pa lhcootsjat yitsôt'esh papi t'ajôôjam, pa ampapu ca nivatvenchatesh ca isa'emjop ca natcasha'yesh pa tanca nachajlhavne shta. Pa lhacôm'a pava chiyvenchatesh pava lhech matas chiy'isinatem ti chiyjutey na Lhcaanvacle.*xr*

²⁹ Pa tanca lhecha jayu ca isa'jop ca chinachaj papu ca ve'lhaa papi chiyetônjop tatsha ti chiyvômjat, pa isjop jayu ca nivaf.

³⁰ “Pa t'iya'esh pava napu'nôjesh pava chiycavcalhesh'e na cotsjaat nan lhjunash pava lhtôsjey shi' pava aacjuy lhavanjay, pava lhech yitsôt'ajesh na Lhcaanvacle ti chiyvenchatem pa lhech.

³¹ Ca nicaajtaj papi yen ti yachajlhavne pa lhech t'iya'esh pava napu'nôjesh, pa tajulhey jayu ca nishayanch'e pa t'ajôjqu'e pa nashjat'apee pa ve'lhanôjesh t'iya'esh.

³² “Ca nicaajtaj pava napu'nôjesh vatôclôy ja't'ajesha pava tashinshtas, pa chiyvenchatesh na Lhcaanvacle pa ve'lha,

³³ pa ya aj ca natcumeyshijop pava isis pava niysisa ca nuyjat'ôcji pav'elh. Ca nôque lhanfanashtaja ca chinuyjatajvanôcji pa vatjutsa' nan lhjunash shta paelh ca chinancayôjatey pa mônlhaae jayu ca chinvenchat pava lhech, pa nôque lhjunash pa sasjop jayu ca chinachaj'in.”*xs*

³⁴ Navôque vatyôjijates tô'lha pa Lhcaanvacle ti yijuteyjop pa Moisês papi Israel lhavos ti yiey lhpa utiyuc Sinaí.