Levítico 25 - Nivaclé Bible

Pa nincôôp ti chiyichayan shi' pa nincôôp camemc'oya pa lhanfanash

¹ Pa Lhcaanvcle yiyôjia pa Moisês ti yi'apee lhpa utiyuc Sinaí pa yit'esha:

² “Anfacleem japi Israel lhavos navôque: Meelh avaatsheelh ca amtajelhey ja cotsjaat ti jajutelh'am jayu, jô lhech cotsjaat isjop jayu ca chinichayan ca asclaneshelhemshi na Lhcaanvacle.

³ Isjop jayu ca avancu'elhshi pava acac'ovteselh ca môôjelhch'e pava ve'lhayama yincôpes. Shi' shta ca môôjelhch'e pava ve'lhayama yincôpes ca at'ovôselh'apeen pava avôtjayetacuyelh shi' ca anclanelhshi pava lhay,

⁴ vooy pa napu'yama nincôôp pa chinichayan jayu lhacôm'a ja cotsjaat ca asclaneshelhemshi na Lhcaanvacle; pa lhech nincôôp pa ya aj ca avancuelh'e pava acac'ovteselh pa ya aj ca at'ovôselh'apee pava avôtjayetacuyelh.

⁵ Pa tanca lhecha ca at'ovôselhch'e pa trigo ti tôlhshi' lhavaatsha ca ninôjtajeshch'e pa yôj'esha'ne chiycavcalhesh, pa ya aj ca anclaneelhshi pava lhay pava avôtjayetacuyelh ti nichint'ovôs'apee; jô lhech cotsjaat isjop jayu ca chinichayan lhacôm'a.

⁶ Vooy pava tôlh'e' lhavaatsha pa cotsjaat ti chiyichayan, pa tajulhsham jayu ca atujelh avaatsheelh, papi acavoselh yitsjôy shi' papi ôcjeclôy, shi' shta papi chiycumjat shi' papi vena tôlhshi' ti yielh'atshi,

⁷ shi' pava aclôyelh shi' pava yaquisetes yalhanashch'een ti yi'shi' ja cotsjaat. Lhacôm'a pava tôlh'e' ja cotsjaat t'ajuya jayu ca chintuj.*xg*

⁸ “Pa isjop ca atsjulheelh pava napu'yama yameyc'oya pa yincôôp, nôque chiyit'esha napu'yama pava yincôpes ca atsjulheshelhch'e pava napu'yama, pava lhech pa yamvatsham jayu cuarenta y nueve pava nincôpes,

⁹ vooy pa napu'nôjesh nalhu pa jive'cla napu'yama, ja Lhnalhu'esh ti Chiyvômjatch'e, pa afuyuelhch'ejop jayu pa tashinshtaj lhac'u' yiey jan tuc'a'e ja cotsjaat.

¹⁰ Vooy pa nincôôp cincuenta pa lhanfacleelhvatam jayu avaatsheelh ti chiy'isinat pa nincôôp: pa lhech lhnincôp'esh ti camamc'oya pa lhanfanash, pa lhanfacleelh jayu ti camamema lhacôm'a papi tsitenas'e pa vatavtsateyish. Lhacôm'a papi nivacle vapecley jayu yiey pa t'ajôôjam shi' pan yie' pa lhcootsjat'esh.

¹¹ Pa lhech nincôôp cincuenta t'ajuyelh'a jayu ti camamc'oya pa lhanfanash pa nincôôp, vooy pa lhech sasjop jayu ca avancu'elh'e, pa ya aj ca at'ovôselhch'e pa trigo ti tôlh'e' lhavaatsha, pa ya aj ca at'ovôselh'apee pava ôtjayetacuy pa ya aj ca anclaneelhshi pava lhay,

¹² lhayaash pa lhech nincôôp ti chiy'isiyan shi' ti camamc'oya pa lhanfanash ti t'ajuyelh'a. Tsi'sha ti lhtujelh jayu pava tôlh'e' lhavaatsha pa cotsjaat.

¹³ “Pa lhech nincôôp ti camamc'oya pa lhanfanash pa alhacôm'aelh avaatsheelh ca mapeclelhey jayu pava acootsjativshayelh.

¹⁴ Ca nicaajtaj papi tcashayesh ja't'ajesha tcashayeshelhvane pap'elh pa lhech cotsjaat, pa nisa'jop ca ninashjatesh pa ca nitôôlhsha pa lhech;

¹⁵ pan tcashaya pa isjop ca nishayan pan t'aplhu'eshch'e ti nich'a tôlh'e' ti camamc'oya pa lhanfanash, vooy pan tcashayesh isjop ca chint'alhesha ca nishayanch'e pava lhech nincôpes ti vacalh pava jôjjeclay amc'oya;

¹⁶ Ca naashtajesh pava nincôpes pa vatcavcalhech ti amc'oya, pa yaash jayu pa chiyjôjiyanch'ejop; vooy pava shichaam pava nincôpesesh pa shichaam jayu pa chiyjôjiyanch'ejop, lhayaash pa ti chiycasha'yesh chiyjôjiyanch'ejulh pava vatcavcalhjes.

¹⁷ “Ya aj ca atejeshiin papu pa'na. Pa atônôclitshelhem ca avijataneshjulh na lh'Dios, lhayaash yivaatsha ya Lhcaanvacle lh'Diosyish.

¹⁸ Ôfisjatelhch'eyam nava yiyôjijates pa asnatshelh nava jasclaneshch'e. Ôfisjatelhch'e pa acano'elhvach jayu yiey na vatavtsateyish;

¹⁹ vooy na cotsjaat tô'lha jayu pava lhay, vooy avaatsheelh pa acano'elhvach jayu yiey jô lhech pa lhtujelh jayu pava lhay namjey ca nape'tajeshelhsha'ne.

²⁰ “Ameesh lhôn ca ataniy'ôseshelh avaatsheelh: ‘¿She pa shtatuj jayu pa napu'yama nincôôp, ca sastajajop pa ca shtacôvjiyan pa tanca shtanclanshi pa ca nivacalhtaj?’

²¹ Ya'lhech janchenelh'ay jayu pava isis ajunashelh ca amtajelha pa ve'lhayama nincôôp, pa lhech vatcavcalhech tajulhsham jayu pava pu'jana nincôpes;

²² nôque lhjunash pa lhtujelh jayu pava chiyisclan ti lhcôvjiyanelh shta pa pu'janayama nincôôp, pa mônlheesh jayu ca amtajelha pa yichatjulhyama nincôôp ti lhtujelh jayu pava lhtôsjey chiyisclan, ti jôjjeclay yameyjop ti vacalh.

²³ “Ja cotsjaat tanca lhetlha nôqueshi ca chincasha'yesh: ja cotsjaat tsitsôt'ajesh vooy avaatsheelh tsi'sha ti lhnaashelh atesha jan lhjunash papu ti janyivcop atesha.

²⁴ Pa lhe'naa pa ca naôvtaj'e caajelh'am avaatsheelh pa cotsjaat ti chinatsôôtjateshelh, pa isjop ca nivashanem papin vatjutsa' ti yitsôt'ajesh ti yivooyjulh ti chiyachajey ca natcasha'ya.

²⁵ “Ca lhechtaja pa ve'lha japi avelhavot'elh ti ts'acla'yesh ti tcashayesh pava lhavanjas, pa lhech lhavelhesh jô isjop jayu ca ninachey pa nachajem pa lhasha' pan tcashayesha.*xh*

²⁶ “Nan lhjunash papu ca amtajeem pa lhavelh ti iseemjop ca nachaj pava lhavanjas, taj ti vooy lhavaatsha iseemjop ca niniyit'apee ca nachajlhatam,

²⁷ pa natsjulheshch'ejop jayu pa t'aplhueshch'e ti nich'a ti tcashayesh, pa yachajem jayu pan tcashayeshelhvane yiey pat'ajôjqu'e pa lhpeso ti yivaclhiteshjop, vooy pa lhech pa chiyachajem jayu pava lhavanjasesh pa yitsôt'ajesh.

²⁸ Taj ti ca nintajulhtajeesh'apee pava yajulhjatajsham ca nachaj pava yitsôt'ajesh lhavanjas, pa mônlhaaesh jayu pan tcashayeshelhvane pa namjey pa yincôôp ti camamc'oya pa lhanfanash pa mônlhaae pava chiytsôt'ajesh, vooy pan tcashayesh pa nachaj jayu pava lhavanjas.

²⁹ “Ca nicaajtaj pa ve'lha tcashayesh pa jpôyich yiey pa yitsaat chinashclaf, pa yivooyjulh jayu ca nachaj ca natcasha'ya nôqueshch'e pa ve'lha yincôôp yiey pan chiyitsjulh'ejop ti chiycasha'yesh.

³⁰ Taj ti vooy nan lhjunash pa jpôyich ca nichinachajtaja pa ve'lha yincôôp pa mônlhaaesh jayu yinjot pan tcashaya shi' papi lhcles. Pa sasjop jayu ca chinvashan ti yamey pa nincôôp ti camamc'oya pa lhanfanash.

³¹ Pa vena lhjunash pava jpôyjey yiey pava yitsates nichinashclafjop, pa lhjunashch'ejulh jayu pava vatcac'ovtes, isjop jayu ti chiyachaj pa chivashan jayu ca namtaja pa yincôôp ti camamc'oya pa lhanfanash.

³² “Vooy japi levitas yajatesh jayu ti vooyjulh ca nachaj pava tcashaya jpôyjey yi'shi' pava yitsates.

³³ Ca nicaajtaj pa levita ti ninachaj pa lhajpôyich ti tcashaya, pa isjop jayu ca nitay'ôcji, vooy ca namtajeyjop pa nincôôp ti camamc'oya pa lhanfanash pa chinjuteem shta, lhayaash ti ve'lheem ti yitsôt'ajesh papi levitas yi'shi' papi Israel lhavos pa jpôyich ti yi'shi' pa lhavtsaat.

³⁴ Vooy pava cotsjativshay yiey pava jotoy yitsôt'ajesh pava lhavtsates papi levitas, pa sasjop jayu ca chincasha'yesh, lhayaash ti ninvô'mesh ti yitsôt'ajesh.

³⁵ “Ca nicaajtaj papi avelhavot'esh ti ts'acla'yesh ti nach'ay, pa isjop ca efenesh jan lhjunash pa vena tôlhshi' ti nash'ajop, pa an'avcop jayu yiey pa ajpôyich.*xi*

³⁶ Pa ya aj ca anjôclesh pa'na pa ya aj ca ashjatem'apee pava lhpi'ôyanesh; pa vena ajunasheesh, anôclitem pa ajovayijulh na a'Dios pa an'avcop pa avelh yiey pa ajpôyich.

³⁷ Pa ya aj ca ashjatem'apee pa peso ti t'alhesh'a,*xj* pa ya aj ca ac'uyjatem'apee pa t'ajôjqu'e pava vatcôs ti lhjutey.

³⁸ Yivaatsha ya Lhcaanvacle, a'Diosyishelh, ti c'ayjatelh'e ja Egipto ti jajutelh'am ja cotsjaat Canaán ti a'Diosyishelh.

³⁹ “Ca nicaajtaj pa ve'lha achifa ts'aclaay ti yi'ajop, ti vatcasha'yesh'a, pa ya aj ca ajôney papi lhancashaclesh ca acumjataj;

⁴⁰ ajônch'e pa vatcumjat lhavo' ja't'ajesha pa yijo'ajop. Pa t'acum'am'in jayu pa namjey pa nincôôp ti camamc'oya pa lhanfanash,

⁴¹ nanjooylhach'e pa lhech ca ayjat'e jayu pa ajpôyich pa u'ja papi lhcles, ca jaspa napecley shta papi lhavelhavot shi' papi yitsôt'ajesh t'ajôôjam;

⁴² lhayaash papi lhech ti yicavosesh ti jayjat'een ja Egipto, pa sasjop ca chincasha'yesh jan lhjunsh papi lhancashac.

⁴³ Ya aj ca avijatayanesh pa ca afanisheesh; vena ajunasheesh, anôclitem pa anjovayijulh na a'Dios.

⁴⁴ “Ca entaj papi acashaclesh yitsjôy ja't'ajesha papi ôcjeclôy, pa acashaya pap'elh lhtachifas yiey papi avjôyelhch'e.

⁴⁵ Isjop shta ca acashaya papi vena tôlhshi' ti yielh'atshi, shi' papi vatacles ca nanvat'astaj'een yiey na avtsateyishelh; papi lhech isjop ca acashayelha ca natsôt'ajeshelh

⁴⁶ pa an'ateelh'ec'oya ca nanôyôjeshelh papi acleselh ca avaftajeelh; pa yajateesh jayu ca nicumjat'in papi lhech. Taj ti nive'lhaa jayu avaatsheelh napi Israel avoselh ca naashc'oya ca ojeya pa ca lhfanisheesh ti ve'lheelhch'e lhavelhavot.*xk*

⁴⁷ “Ca nicaajtaj pa vena tôlhshi' ti yi'shi' na acootsjat ti acôjjiin, pa vena lhjunash pa ve'lha achifa, tajulhshi pa vena tôlhshi', ti ts'aclaay pa tcashayesh pa vena tôlhshi' ja't'ajesha peelh vena tôlhshi',

⁴⁸ pa yivooyjulh ti tcashaya ti chiyvashan lha'ma ca nanjooylhach'e ca nancashayuesh. Pa isjop jayu ca chinachaj pa ve'lha lhavelh,

⁴⁹ pa lhatjooc, pa lhavelhesh atesha ja't'ajesha pa ca naôvtaj'e papi lhavelhavot'esh jô; shi' shta lhavaatsha isjop jayu ca nachajlhatam, ca nicaajtaj pava yijuyjata ti yisnateshjop,

⁵⁰ pa natsjulheshch'e pa lhech pan tôlh'e' ti tcashaya pa namjey pa nincôôp ti camamc'oya pa lhanfanash: vooy pa t'ajôjqu'e ti tashaay isjop jayu ca t'ajô'jach'ejulh pava nincôpesesh, shi' pa t'aplhu' ti chit'acumesh'in pa chinatsjulhch'ejop jayu pava chiyshayanesh papi t'acuumjiin.

⁵¹ Ti jôjjeclay acloj pava nincôpes ti amc'oya, pa naash pa chinshayanesh pa t'ajuya ti chiyachaj pa peso ti chiycasha'yesh;

⁵² taj ti ca napu'taja pava nincôpes amc'oya ti yamey pa nincôôp ti camamc'oya pa lhanfanash, pa shichaam jayu pa t'ajôôjqu'e pava chiyetônjop nincôpes ti amc'oya.

⁵³ Pa isjop jayu ca chinjôney pa lhancavo ti chivatpeya'shelh pa nincôôp ti chiyshayan; pa aj ca avashanem ca chincômclôqui pa lhech.

⁵⁴ “Nan lhjunash ti nichinachaj ti yameyjop pa t'aplhu'a, pa chiyvashan jayu pa nincôôp ti camamc'oya pa lhanfanash ca chinu'ja papi lhcles,

⁵⁵ lhayaash napi Israel lhavos ti yicavosesh; tsitsôt'ajesh ti yicavosesh; ti jayjat'e ja Egipto. Yivaatsha ya Lhcaanvacle lh'Diosyish.