Levítico 24 - Nivaclé Bible

¹ Pa Lhcaanvcle yiyôjiesha pa Moisês pa yit'esha:

² “Acheney japi Israel lhavos ca nanchaaj pa lhape' isshi' pa oliva, jaspa tanca nivô'mesh ca yajateesh ca chintseclô'lhey java itôtas.

³ Vooy ja Aarón pa ayôjiesha jayu ca nasclansha'nec'oya, jaspa nôqueshch'e pa tulh ca nitujey ca nint'ôseesha'ne yiey t'ajuyish na Lhcaanvacle jan yie' ja Tsha'nuvo'esh ti Chivatvan'e, nôvey ja fach'ee ja sivôclôc lhayeech jan yie'jop lhja vatcaqueclitôshi yeclônilh yich'e' ja chivatpeya'esh. Nôque vatyôjijat ninvôômji nitô'lhesh'e papi vatanavot pa namja papi lhcles.

⁴ P'alhaa ca nasclan'ec'oya java itôtas yiey lhja t'ajuya clesanilh cojiyaj tsi'sha ca jaspa nitujey yiey t'ajuyish na Lhcaanvacle.

Lhpa yucuve ti Chiyieshjop

⁵ “Pa acum'e ca asnatesh pa isshi' climshi ca ajotesh pava doce yucuvec, ti yichatjulh kilos y medio ti ve'lhee ts'ivee,

⁶ pa an'apee ja vattsaccunjavat'esh ja clesanilh cojiyaj ti yie' t'ajuyish na Lhcaanvacle, pa napu'eeshch'e pava chiyivcaavjuyanesh pa ve'lhayama pa t'ajô'ja ts'ivee.*xb*

⁷ Pa aney ts'ivee pava lhcaavjuclesh pa chiytseclô'lha, ti t'ajuya jayu lhpa yucuve ti vatcufayjat'eshjop ti chiyaychavalhch'e ti chiylhônsham ti chiyisclaneshemshi na Lhcaanvacle.

⁸ Côque isjop jayu ca chinan'e ca ya aj ca ameem yiey t'ajuyish na Lhcaanvacle yinjôt pa nalhu ti chit'ichayshi, jan lhjunash ti ôyjôlhôyech'esh ti vatcufayjat'esh t'ajuya japi Israel lhcles.

⁹ Na lhech chiyetônjop jayu yajatesh ja Aarón shi' papi lhcles,*xc* papin isjop ti tuj jayu lhpa lhech yucuve yiey na is'e', lhayaash java vatcufayjates ti chiylhôneemsham ti chiyisclaneshemshi na Lhcaanvacle, navôque ya'shesh ti lhasnôyjesesh.”

Chiyivalh'apee papi vena t'ônasha pa Dios

^10-11 Papi yi'shi' papi Israel lhavos pa nivacle ti nivat'ajesh lhpa lhamimi Israel lhavoque ti lhtataesh pa Egipto lhavo'. Lhpa lhamimi lhey Selomit, lhpa lhech lhôse pa Dibri, ve'lheelhsham pa Dan. Pa lhech nivacle shi' pa ve'lha Israel lhavo' naashelhvanôcji yiey pa vat'ichavat, jan t'aplhuque pa lhaôs ti lhamimi'esh lhpa Israel lhavoque ti vena t'ônasha pa yeyimatan pa Lhcaanvacle. Pa lhechesh pa chiychajey t'ajuyish pa Moisês,

¹² pa yiclôvalh ts'ivee ti jôjjeclay mônlheesh pava yit'eshem pa Lhcaanvacle ca lhfanisheesh.

¹³ Vooy pa Lhcaanvacle tasinôyshem pa Moisês ti yit'eshem:

¹⁴ “Ayjatshi na vat'ichavat nan niysa' na t'ônashyam; ti t'ajayesh'apee na lhshatech lhacôm'a napi tach'ana, ca nôôtjatesh'in ca nivômjatesh pava utes lhacôm'a japi vatachifas.

^15-16 Vooy papu ca lhech t'ônashtaja napi Israel lhavos pa anfacleem navôque: Papu ca vena t'ônashtaja ti yeyimatan na Lhcaanvacle na lh'Dios, pa tajulhey ca chinachaja pa lhsasch'e lhavaatsha pa chinvômjat ca nôôtjatesh'in pava utes napi lhtachifas. Lhech lhjunasha papi vena tôlhshi' nan lhjunash japi tsitenasshi na vatavtsateyish, ca vena t'ônashtajaa na lhey na Lhcaanvacle, pa nitanutsjayesh pa lhavafi.

¹⁷ “Papi yayjat pa lhamônlhajayash pap'elh, pa tanutsjayesh jayu pa lhavafi.*xd*

¹⁸ “Papu ca niclôntaj pa ve'lha vôcô pa tajulhey ca nancayôjat'e pa lhech yaquiset peelh yaquiset.

¹⁹ “Vooy papi tamenesh atesha pa lhchifa pa tajulhey ca chinclôyitesh pan yic'amenesh ti yisnatesh:

²⁰ Ca nic'apôctejtaj pa chinpôcjet vitsha, ca nanclantajshi pa vatôseej pa chinanclanshic'oya vitsha, ti namat'e pa vattsevte pa chinamat'ec'oya vitsha;*xe* tajulhey ca chinclôyitesh lhavaatsha pan yic'amenesh ti tôlheyjop.

²¹ “Papi yiclôn pa ve'lha yaquiset pa tajulhey ca nancayôjat'e lhc'o'vat. Papi ca niclôntaj pa nivacle, pa tanutsjayesh jayu pa lhavafi.

²² “Na lhech vatyôjijat chiyjuyjata papi vena tôlhshi' nan lhjunash japi tsitenasshi na vatavtsateyish.*xf* Yivaatsha ya Lhcaanvacle a'Diosyishelh.”

²³ Lhechesh pa yasinôquiem pa Moisês papi Israel lhavos, vooy papi lhech pa yayjatshi pa vat'ichavat pan niysa' pa t'ônasha pa Dios, pa lhech yie' ti yiclôn ts'ivee ti yôôtjatesh'in pava utes. Pa yisnatesh papi Israel lhavos pan t'ônashem pa Lhcaanvacle ti yiyôjiesha pa Moisês.